آخر كلام !!

* يا جماعة حرام عليكم واتقوا الله فى مصر.. فإنجازات حكومتنا الذكية نعمة اللى ينكرها.. يعمى!
ارتفاع أسعار كل شىء حتى المش والجعضيض..إنجاز.. الاحتكارات اللى مالية البلد ومش عارفين يعملوا معاها حاجة.. إنجاز.. وصول عدد العاطلين إلى 2.8 مليون شاب قاعدين على القهاوى والأرصفة.. إنجاز.. استمرار الحكومة رغم انتهاء عمرها الافتراضى.. إنجاز!
وربنا يسامحنى على كل اللى قلته ده.. إن.. «جاز»..!!
* مش عارف الناس متغاظة ليه؟!
طالما أن سعر الطماطم بقى أغلى من التفاح.. طب ما يطبخوا بالتفاح.. فيها إيه دى..؟!
أما الغلابة من «مهدودى الدخل» اللى مش لاقيين اللضة.. فيبقوا يطبخوا.. بالجوافة..!!
* والله العظيم حرام أن تكون إذاعة القرآن الكريم بهذا المستوى وهى أحد خطوط دفاعنا ضد الهجمات الشرسة للمتطرفين والمدعين والمتفذلكين والمتحذلقين فى أمور الدين!
يا جماعة مطلوب إعادة هيكلة إذاعة القرآن الكريم وتطويرها وتدريب مذيعيها من أكبرهم لأصغرهم على أصول الحوار السليم.. وفوق كل هذا وذاك اختيار الموضوعات التى تفيد المسلمين المعتدلين بدلا من التفتيش فى الكتب الصفراء بتاعة ابن حنيذة وابن الهيجاء فكلها من عينة العلم الذى لا ينفع والجهل الذى لا يضر!
أنقذوا إذاعة القرآن الكريم يرحمنا ويرحمكم الله..!
* الرئيس الأمريكى السابق جورج بوش، والذى اعترف بأنه لم يقرأ كتابا واحدا فى حياته، وعد المثقفين بصدمة عمرهم الشهر القادم، حيث سيصدر أول كتاب من تأليفه عن حياته فى البيت الأبيض كتبه بذات نفسه من الجلدة للجلدة..!
يا عم بوش.. كل شىء جايز حتى خلف العجايز، اللى خلى الراقصة إياها اللى ما بتعرفش تفك الخط تكتب مسلسلا 30 حلقة.. حلقة تنطح حلقة.. يبقى مش هايخلى حضرتك تعمل حتة كتاب.. لا راح ولا جه؟!!
* فيه كلام كثير عايز أقوله عن منتخب العجزة والمشلولين اللى فضحونا فى أفريقيا فضيحة اللحمة البتلو فى سوق الجمعة.. لكن بصراحة كفاية عليهم كده.. فالضرب فى الميت.. حرام!
* كلمة ورد غطاها:
* شفت ناظر المدرسة اللى فى مطروح اللى خلى التلامذة يشربوا من الجردل؟!!
** وإيه يعنى يا سيدى لما الولاد يشربوا من الجردل إذا كان الناظر نفسه بيستحمى فى «كنكة»..!!