من قلب مصر

ايوة انا اللي شاركت في وقفات للافراج عن انس مالك وخيرت الشاطر في عهد حسني مبارك وانا اللي انبهرت بيهم لما شفت اخلاق شبابهم في الميدان وقلت باعلى صوتي قد ايه انا بحترم وبحب الاخوان لما كنا شركاء في اهداف الثورة .
(وللعلم انا لسة بحترم شبابهم سواء اللي انفصلوا عن الجماعة او لسة عندهم امل يغيروها مهما اختلفنا في وجهات النظر).
وانا اللي دعمت الرئيس مرسي بعد ما فاز في الانتخابات برغم اني كنت مقاطعة لكن دعمي ليه كان دعم لبناء البلد.
وانا اللي هاجمته لما خان كل تعهداته وكذب في وعوده وانا اللي بهاجم الاخوان دلوقتي لما مش بس انحرفو عن اهداف الثورة لا دول بيدمرو بلد وبيقتلو شعب بيطالب بالحرية والاحترام .
اللي شايف ان ده تلون يراجع مفاهيمه من تاني عشان انا بدافع عن افكار ومباديء مش اشخاص ولا كيانات ، ومش معنى اني احترمت جماعة بسبب مواقف اني افضل احترمها وادافع عنها لما تغير مبادئها 180 درجة ولو رجع بيا الزمن هاخد نفس القرارات اللي اخدتها عشان هتبقى نفس العوامل موجودة ومكنش في اختيارات تانية.
بعد ما للاسف بعض التيارات السياسية فرضت علينا سيناريوهات مكنش المفروض نقبل بيها.
انا معنديش حاجة اخجل منها عشان يتعمل فيديوهات تسمى فضيحة اسماء عشان بتكلم عن اهمية وجود رؤية وعشان شكرت في الاخوان.
الي بخجل منه اللي بيقرا عنوان فيديو او مقال ويسلم بيها من غير مابيفكر بخجل ان يكون ده تفكير البعض من اهل بلدي.