البرغوثي يستحضر طغاة مصر في قصيدة

القاهرة: حل الشاعر الفلسطيني تميم البرغوثي ضيفاً على برنامج "آخر كلام" تقديم الإعلامي يسري فودة على قناة "اون تي في" حيث ألقى قصيدة حيا بها الثورة المصرية والشعب المصري العظيم وقال تميم في قصيدته الذي عنونها ب "يا شعب مصر".
يا شعب مصر اللي سبق ضحكته غضبه
ما يطلع الصبح إلا وصحبتك سببه
يا مخلص الأرض من وحشتها في الأكوان
يا حجة الشمس تفضل طالعة ساعة كمان
مستأذنة وهي مش عادتها الأستئذان
متونسة بالميدان وبعشرته ونسبه
يا شعب يا مصلي قدام العساكر صف
يجري الجريح من وراء لقدام لخاف ولا خف
تدوس عليه العربية تحوله لمية ألف
يالا العجب يقتلوه ويتوقعوا هربه
يالا العجب يقتلوه ويتوقعوا غيابه
اللي اتقتل لسه واقف هو واصحابه
ما بهدل الأمن غير من ماتوا واتصابوا
والصبح ما نور الا لما الشموس غربوا
اضرب عليا أنا مش جاري يا قناص
من امتى خوفنا ابن الكلب ضرب رصاص
كل اللي شاف الشهيد بقى تاره تاره الخاص
الدم صاحي وعنيد ولا تقبلهوش ترب
با شعب يااللي دفع ثمن الشوارع دم
احفظ اسامي اللي ماتوا في الشوارع صم
الشارع اللي اصطفا وقصر الامارة لم
ملوك قليلة الرباية ركبوا واتركبوا
شعب بغزالة اتخنق قلب التاريخ في يومين
لابس عباية جحا وهو صلاح الدين
بيكرم الأنبيا ويهزأ السلاطين
والفجر خيره وحبات الرمال عربه
يا شعب مصر أكم فرعون وفرعونة
ضربتهم ضرب سجادة في بلكونة
ضرب الملوك تربية صالحة ومتقونة
ما يبقوا بنى آدمين إلا إذا اضربوا
ضرب الملوك مصلحة
ضرب الملوك تأديب
ما احلى المماليك وهي بتجري في السراديب
ولولا ضرب شجرة الدر بالقباقيب
ما بين أغا ومش اغا كانوا التتار غلبوا
بعدين مبارك سادات فاروق محدش دام
هو احنا شعب كده مبيعشلناش حكام
عقبال جيرنا وحابايبنا كمان