يا شعب مصر

يا شعب مصر ياللى سبقت ضحكته غضبه ما يطلع الصبح الا وصحبتك سببه يا مخلص الأرض من وحشتها فى الأكوان

يا حجه الشمس تفضل طالعه ساعه كمان
مستأذنه وهى مش عادتها الأستئذان
متونسه بالميدان وبعشرته ونسبه
يا شعب ومصلى قدام العساكر صف
يجرى الجريح من ورا لقدام لاخاف ولاخف
تدوس عليه العربيه تحوله لميت ألف
ياللعجب يقتلوه ويتوقعوه هربه وغيابه
اللى اتقتل لسه واقف هو واصحابه
مابهدل الامن غير من اللى ماتوا واتصابوا
والصبح مانور الا لما الشموس غربوا
اضرب عليا انا مش جارى يا قناص
من امتى خوفنا يا بن الكلب ضرب رصاص؟
كل اللى شافوا الشهيد
بقى تاره تاره الخاص
الدم صاحى وعنيد ولاتقبلوش طربه
يا شعب ياللى دفع تمن الشوارع دم
احفظ اسامى اللى ماتوا فى الشوارع صم
الشارع اللى اصطفى وقصر الاماره لم
ملوك قليله الربايه ركبو واتركبوا
شعب بغزاله اتخنق قلب التاريخ فى يومين
لابس عبايه جحا وهو صلاح الدين
بيكرم الانبيا ويهزء السلاطين
والفجر خيله وحبات الرمال عربه
يا شعب مصر كام فرعون وفرعونه ضربتهم ضرب سجاده فى بلكونه
ضرب الملوك تربيه صالحه ومجنونه
مايبقوا بنى أدمين الا أذا انضربوا
ضرب الملوك مصلحه
ضرب الملوك تأديب
محلى المماليك وهما بيجروا فى السراديب
ولولا ضرب شجرة الدر بالقباقيب
مابين اغا وباش اغا كان التتار غلبوا
بعدين مبارك سادات فاروق محدش دام
هواحنا كده شعب مبيعيشليناش حكام
عقبال جيرانا وحبايبنا كمان
يا سلام
لو كل من له رئيس نصحى نلاقيه قلبه
يا مصر لسه
ولسه الثوره بلة ريق
ماينتهيلك طريق الا ويبدا طريق
يا شعب مصر تعال نتفق يا شقيق
رج الملك قبل ما تنعم عليه بلقبه
رجه كده شوف ان كان الملك شغال
وأسأل عليه المكوجى وأسأل عليه البقال
واهم حاجه فى صفاته انه يكون يتشال
متربى عال لما يمشى يلتزم ادبه
بتكون فى احسن حالاتك وانت مش محكوم
بتبقى رايق ولاظالم ولا مظلوم
وبعدين ده أيه الغبى ده اللى يهددك بالشوم
يا مخلى الف احتلال ينزل على ركبه
يا شعب انت اللى كارم كل من حكمك
الدوله دى عارفه تحكم من بس كرمك
كشرلها وهى هتجيلك تبوس قدمك
مفيش حاجه اسمها مليون راجل واتخصموا
سايق عليك النبى ماتقول كفايه يا شيخ
الملحمه لما تخلص يبدأ التاريخ
وبكره جايه حروب فيها بكى وصريخ
وبكره نصرك يخض الشمس من لهبه
سايق عليك النبى ما تقول كفايه كده
من النهارده انتصاراتك هتبقى كده
ياشعب مصر اللى رجالته وبناته كده
حلال عليه لبن العصفور لو طلبه
سايق عليك النبى ما تقول كده كفايه
افرح وكمل
وماتقولش كده كفايه
الثوره دى بدايه زى الهجره والميلاد
الثوره دى بسمله كمل بقى الأيه
مع كل مره قرايه حسنها يزداد
والايه تجرى تسلم اختها الرايه من غير نهايه وحتى الوقف مش معتاد
وبكره ايامنا تبقى حكايه وروايه
عن ناس يباتوا حفايا يصبحوا اسياد
25 يناير يا شباب حصل ايه
؟
لو قلنا يعنى عالساعه 3 الفجر كان حد فينا طول او جد حاجه عليه؟
او جاب سلاح او ملايكه بشروه بالنصر؟
كان يختلف فينا ايه عن اى يوم قبليه؟
نمنا غلابه صحينا احنا ولاة الأمر
كان عرش مصر فى أوضنا وأحنا ناسينه
رامين هدومنا على شماله وعلى يمينه
طردنا عنه الحرامى غصب عن عينه
ونزلنا على الميادين بأدينا جارينه
وبقوا الملوك فى الشوارع والعبيد فى القصر
وفى يوم وليله أكتشفنا ان احنا والنبى مصر
ومصر مش حد تانى غيرنا يعنى بيه
وكل واحد سأل طب كنا ساكتين ليه؟
وشعب مين اللى كان الظبط حاكمينه؟
بدوله شومه ومختومه بختم النسر
وكل واحد قرا اللى كان على جبينه
رفع بدمه يمينه هديه وهدايه
ان كانت الانبيا على المياه مشايه
لأجلك يا مصر مشينا باسمين عالجمر
يا مصر وافتكرى اصل الدنيا ناسايه
الملك ده حقنا ومفيش فراعنه جداد
مش بس مصر اتغيرت من وقفه الميدان
فى حته نورت فى طبيعه الانسان
ارقينا وارقيهم يا عم الشيخ
يا شعب مصر
قصيده لتميم البرغوتى