"يا ابن بلدى" قصيدة من مشاركات القراء

قوم يامصرى عَلّي صوتك ...وامسح الدمع الحزين

ده النهار رافض سكوتك ...شد عزمك قول آمين

ارفض العهد اللي ولى ..وامحي ظلمك م الكتاب

دى الحرية علينا طله ...والرسالة عايزة جواب

حط ايدك ع الطريق ...ياابن بلدى بلاش عتاب

واجعل الشمس رفيق.. فارده ايدها مش سراب

وارمى همك أو عذابك ...يلا عدى بدون رجوع

ده الشهيد عمره ما سابك..ومات فى حضنك بالدموع

والدماء سالت في أرضى ...بالزهور كانت فروع

هتفت باسمي وعرضي ...شاريه فينا بدون خضوع

قوم يا مصري افرد دراعك ..خد بايدها وامشى بيها

هى حضنك وكل باعك .. ..لو باعوها اشتريها

مين باقيلك بعد ناسك ...مين فى صدره حاضن ولادك

مين بيبكى لجل زادك ...مين يحبك غير بلادك

أنت باقى وهى باقية ...والكتاب يكتب سطور

أنت ربان وساقية ...والنهار.... عايز عبور

حط ايدك فى ايد اخوك ..وابني تانى فى حته نور

ده العزيمة عاوزة صكوك ..وأنت ماضي لو صبور

قوم يا مصري عَلى صوتك ...وامسح الدمع الحزين

ده النهار رافض سكوتك ... شد عزمك قول آمين