يا خسارتك يا شهيد صبحت مجرد صورة في خبر... صبحت تفاصيل حياتك امنياتك قصة مماتك شوية حواديت وعبر... الدم نازل من ثغرك و لا حبات الندى... بلون شربات الفرح اللي بينسقى... و يا خسارتك ليه ده الخسارة عندنا... ده انت رحت للي احسن مننا... شايفاك عريس على الجنة رايح بهليلة و زفة... من غير عطور و لا بخور روايح المسك من حواليك هافة... سامحني على دموعي اللي بيتسابقوا على خدودي غصب عني... سامحني لو مش قادرة اقول ان فراقك مش واجعني... سامحني يا بني لو جريت الملم فرشتك... محفظتك هدومك صورك بدلتك... سامحني لو خبتهم... سامحني لو خفت المسهم... لاجل ما تتبقالي فيهم ريحتك تأنس وحدتي... لاجل ما اسرح بخيالي و اقول لروحي انك هنا... يمكن راجع بعد سنة... هاسمع صوت مفاتيحك من ورا الباب... و هالقاك لقا الاحباب... هتحضني و هتقولي وحشتيني يا ست الحبايب... و ارد اقولك يا بكاش ده انت مبقالكش يومين غايب... يعني لحقت توحشك امك... ويستنى قلبي يسمع اجمل كلام منك... يعني معقولة يا امه متعرفيش..ان حضنك و حشني... اكلك وحشني ..دعاك وحشني .. دلعك وحشني.. حتى زعيقك ليا وحشني... امشي من وشي يا واد طلعت عيني و جوه عيني ضحكة مستخبية... و كلام عن انانيتي و اني مش بساعدك و اني مبتحملش المسئولية... و ارجع افوق على صوت الخبر... و ناس حواليا دموعها مطر... و ناس تعزيني و تقول ده قدر... و اسال نفسي تاني يعني انت المرة دي بجد مش راجع... بس انا يا بني و الله حاساك سامع... و الكفوف من حواليه تتخبط لا حول ولا قوة إلا بالله... مينفعش نقول كده ده قضاء الله... يا ناس حسوا بالنار اللي جوايا... اصل اللي مات يا خلق ده ضنايا... انا مش زعلانة ان ربنا اخده عنده شهيد... انا زعلانة انه مات على ايد واحد عبيط... قالوا له لما تموت ابن بلدك في الجنة هتتهنى... و هوه على نار جهنم عدل هيتشوى... لا يا ابني تعالى هاقولك على سر استنى... هو انت فاكر انك كده نصرت الدين... يا خي مرمغوا خلقتك في الطين... قالولك ده القصاص في الايات و في السور... ياخي ادعي عليك بايه و انت فيك كل العبر... واللي قتل يقتل و لو بعد حين... اه يا عالم بقر و بغبغانات و تابعين... قالولك ده كلب و عميل و كافر... و لعزة الدين مش ناصر... رد عليا يا ابو عقل تخين و قولي فين مخك... هو انت شفته قتل امك قتل اختك... هو ده في نظركم الدين... طب عرفته طب قابلته طب عاملته طب عاشرته.. . مين اللي قتلته ده بصله كده... مش يمكن ابن عمك ابن خالك... مش يمكن كان في يوم صاحبك و جارك... مش يمكن اصلا مكنش جزء من تارك... و لا هو في نظرك اللي موته هي بدلته... و جزمته و هيئته و شغلته... اه ده الذنب اللي ملوش غفران... و الله صدق من سماكم خرفان... بدعي عليكم من قلبي دعوة ام... مسعتش في يوم تغير حكم... و لا تعرف يعني ايه اخوان... و لا ليها مصلحة مع فلان... يا رب تعبنا من السرطان... اللي سارح في عقول الشبان... يا رب قادر تشفي كل مريض... و قادر تغير حالنا اكيد... و قادر تقرب يوم العيد...
