الحلقة التانية من رغاى و صاحبه مطنشه

رغاى اول مذيع يجرى حوار مع مبارك من مستشفى شرم الشيخ
مشهد 1 داخلى ............ رغاى يجلس امام مبارك
رغاى : سيادة الرئيس تسمح
مبارك : الله قولها تانى ونبى يا بنى
رغاى : طب بلاش ابنك ده عشان خاطر امى بس مش حمل مرمطة
مبارك : سمعهانى تانى الله يكرمك ويخليك لاهللك
رغاى : ايه هى يا عم الحج اللى اقولها تانى
مبارك : قول سيادة الرئيس ولا استنا تشرب ايه الاول
رغاى : لا شكرا يا بو علاء - بس ايه يا عم الكرم ده امال ايه اللى سمعينه بقولك يا
بوعلاء ايه رايك فى اللى حصل لك فى اخر ايامك
مبارك : يا رغاى يا بخت مين بات مظلوم ولا بتش ظالم مسير الايام تبين الحقيقة يعنى انا سمعت ان فى ناس بتقول انى بسرق من 30 سنة ده كلام انت تصدق انى اعمل كده
رغاى : لا يا بوعلاء ليه يعنى يحسبوا 30 سنة كلهم عليك مش فيهم 30 شهر رمضان وعندك عيد صغير 3 ايام فى 30 سنة وعيد كبير 4 ايام فى 30 سنة وشيل الجمعة وشهر كنت تعبان فى فرنسا انا رغاى اه بس احب اقول اللى ليه واللى علية الايام ده متتحسبش انت مسرقتش فيها
مبارك : والله ما رضيت اقول حاجة بس احب اطمن المصريين اللى بيخرجوا كل يوم جمعة يوم الاجازة بتاعتهم بدل ما يرتاحوا بيروحوا التحرير فى عز الشمس يدعوا لى ان ربنا يشفينى الحمد لله انا بقيت كويس ونفسى اسرقهم كمان وكمان وارجع ايام الماضى واشوف ولادى وهما بيسرقوا ادام عنية عشان اعرف انام
رغاى : انت حاسس ان الناس دول بيدعوا لك ولا بيدعوا عليك
مبارك : لا سيبك من كلام الوكالات الاجنبية دول عاوزين مصيبة للبلد بس على مين ده انا الحج حسنى
رغاى : حاسس باية وانت فى الظروف ده
مبارك : حاسس انى طير فى السما وبرفرف من السعادة وولادى حوليه شفت الناس اللى قدام المستشفى قد ايه عشان يطمنوا علية ومن ادبهم كلهم واقفين حفين فى عز الشمس ومسكين جزمهم فى اديهم شفت الادب طب اقولك حاجة العسكرى اللى برة ده اللى واقف حرس كل شوية يخش يطمن ويقول لسه فى الروح ويضرب كف بكف من الفرحة مش مصدق المعجزات طب اقولك اللى بيجيب الاكل كل وجبة اول ما يشوفنى بيفضل يدعى فى سره يجى ربع ساعة انا فى المحنة ده عرفت قيمة مصر وقيمة ولادها بجد الشعب ده عظيم ربنا يقدرنى عليهم
رغاى : وايه هى قيمة مصر فى نظرك
مبارك : هضرب لك مثل صغير منتخب مصر جاب جون من يوم اللى حصل لى
رغاى : ولا ضربة جزاء - بس بصراحة مفكرتش ليه
مبارك : انا اقولك ليه الاب الروحى مش موجود -الامل - الاخلاص - الوفاء - عوامل كتيرة انا حاسس بشعبى انا عاوز ارجع لهم فى اسرع وقت عشان الحق المنتخب يعنى مصر لو كسبت جنوب افريقيا يبقى فى امل فى الامم الافريقية وممكن ناخد الكاس والاغانى الوطنية تشتغل وهيبقى مولد
طب تصدق باية يا رغاى انت
رغاى : بالله
انا وحشتنى الظيتة وابو تريكة والصور فى المطار والمسائل ده انت فاهم بقى
رغاى : تحب تقول ايه لشعبك
مبارك : اقولهم متخافوش انا هبقى زى الجن بس موضوع المدعى العام يعدى وان شاء الله ادى دقنى لو ختوا تعريفة من الفلوس بتاعتى او بمعنى اصح اللى خدته القرعة ؟؟؟ وهما عارفين الباقى
رغاى : يعنى انت بتعترف ان معاك فلوس
مبارك : قلبى قلبى مش قادر اتكلم الدكتور بسرعة هيغم علية
رغاى : ايه يا عم النجم الممثل ما كنا حلوين قلبك ايه بقى ما تفكك من الكلام ده
مبارك : الدكتور الحقونى بيسال على فلوس برة برة برة
رغاى : لا يا عم حسنى انا بسال على الفلوس اللى ليك عند الشعب الفلوس اللى انت سيبها للشعب يتفسح بيها وكل يوم يجيلك شرم الشيخ عشان يدعيلك انا بسالك هتخدهم امتى
مبارك : اه ايوه ايوه الله يطمنك خلاص قولوا للدكتور يسك على الموضوع انا خفيت الحمد لله
رغاى : يعنى انت بخير دلوقتى
مبارك : ابعد عن فلوسى تلاقينى بخير تقرب عندها قلبى يقف
رغاى : يا سلام عليك يا حج وعلى افكارك
مبارك : بقولك ياض يا رغاى انت يا بو دم خفيف
رغاى : تحت امرك يا ريس
مبارك : ممكن تليفونك اعمل مكالمة منه لحسن سوزان بترن لى او امينة زى ما بتقول علينا يا رغاى
رغاى : اتفضل يا باشا
مبارك : الو ايه يا امينة
سوزان : امينة ليه كده بقى انت هتعمل زى الواد اللى مشردنا على النت ومسمينا امينة وسى السيد
مبارك : طب تصدقى الواد ده عندى وبكلمك من تليفونه
سوزان : يبقى اتكلم براحتك بقى طالما مش غرمانين حاجة
مبارك : اصيلة زى مانت مهما يحصل خايفة علية ده انت فعلا امينة الواد مغلطش
سوزان : قوله انا زعلانة منه عشان مسمى جمال جيمى وعلاء ركس عيب عليه كده
مبارك : عاوزه منه ايه وانا اخليه يعملة
سوزان : بلاش يسمى علاء ركس انا كنت بقول يخليه روى اشيك
مبارك : انا فتحت الاسبيكر وسمعته
رغاى : ايوه انا سمعت وكل اللى عوزاه هيتعمل بس انا متهيا لى مش فارقة ركس من روى المهم طالعين لابوهم وخلاص - طب ممكن تقولها ينفع اعمل معاها تحقيق صحفى
مبارك : بقولك يا ام روى الواد الرغاى عاوز يعمل معاكى تحقيق
سوزان : تحقيق ايه يا خويا انا ناقصة مانا كل يوم فى تحقيق ربنا يخليك لينا نفض له
مبارك : لا ده واد دمه خفيف هيهزر معانا شوية بدل النكد اللى احنا فية اوك
سوزان : ماشى يا سى السيد انا اقدر اكسرلك كلمة
مبارك : هههههه سى السيد تانى طب بصى اضربى التحجيبة البيضة مع العبابية البيضا اللى وخدنهم هدية واحنا فى السعودية مع السبحة يعنى ظبطى الاداء عشان يعرفوا اننا بركة
يالا سلام يا امينة
سوزان : الله يسلمك يا سى السيد
مبارك : اى خدمة يا عم ايمن يا رغاى اقنعتها انك تعمل حوار بلاش كلمة تحقيق ده لحسن بقيت اضرس منها ماشى
رغاى : الف شكر يا باش - ممكن الموبايل بقى
مبارك : موبايل - انت عبيط ياض الريس يمسك فى ايده حاجة ويرجعها - يلا ياض اخلع من الاوضة وجعت دماغى قال موبايل قال
رغاى : ربنا يخليك لمصر خد يا باشا
مبارك : ايه ياض ده
رغاى : كارت ب 25 اشحن ياريس
الى اللقاء فى الحلقة الثالثة