أنا ونظيف

بعد إعلان مجلس الوزرء "بيان" عقد قران الدكتور أحمد نظيف الشهر القادم.. لا أخفي عليكم أنني أصبت بحاله من الهم والنكد ليس لزواجه، فالرجل منا يحتاج الي "ونيس" وهذا حقه الطبيعي والشرعي ولا يحق لي انا المواطن الغلبان التدخل فيها بالقبول أو بالرفض.
زواج رئيس الحكومة كان كافياً لأن يصيبني بالأرق الذي كان بادياً علي وجهي لدرجة أن زوجتي الطيبة صاحبة العقل الراجح سألتني ( فيه ايه ) ومن منطلق إيماني بأن " ما خاب من استشار حتي لا تتحول حياتي إلي نكد وعلي رأي المثل "ابعد عن الشر وغني له" .. قلت لها: بصراحة رئيس حكومتنا حطني في ورطة كبيرة أوي .. ردت مستنكرة وبصوت عالي: يا "نهار اسود" احمد نظيف "حته واحده".. هي الحكاية ناقصة.. انت شكلك بتدور علي المشاكل "امشي جنب الحيط " الحكومة دي قادرة وانت مش قدهم وعندك عيال والا انت غاوي بهدلة ..
بنبرة حزن خرج صوتي: يا ستي انت فهمتي الموضوع غلط.. دا نظيف هيتجوز في شهر فبراير وطبيعي لازم نشارك رئيس الحكومة بتاعتنا فرحته ونقدم له هديه كويسة تليق بمقام سعادته.
قالت في"اندهاش واستنكار وتعجب" مين يقدم لمين؟!!
رددت عليها وأنا أتحسس جيوب بنطلوني " يا ست أنا طبعاً .. علشان منظره قدام زمايله رؤساء وزراء العالم يقولوا عليه ايه "الشعب مش بيحبه ولا بيقدره" لازم يبقي فيه مجاملة.. وبعدين الراجل يستاهل ..
بعدها وضعت يدها علي رأسها كأنها اقتنعت : "والله ممكن لكن هو فيه حد بيتجوز في الأيام دي "طب يستني شوية لحد ما تعدي" الازمة الاقتصادية وربنا يفكها علينا وبعدين احنا المفروض في حالة حداد علي شهداء نجع حمادي وضحايا السيول يعني بصراحة كده مش وقته خالص".
ونظرت الي نظره تدل علي غيظ كبير بداخلها وقالت لي " اتهرب منه.. قول انك مشغول - مش فاضي - عندك مشوار مهم و اكيد هتلاقي بدل الحجة 50 "..
حكاية الهروب لم تعجبني فقلت لها : عيب دا الراجل له افضال كثيرة علينا ..نظرت الي سقف شقتنا المتواضع وقالت: "افضال ايه بس خلي الطابق مستور" ولولا العتب والناس تتكلم علينا ونبقي مش مقدرين الراجل لكنا قدمنا هدية ولا روحنا الفرح من أساسه.. علي العموم تبات نار تصبح رماد والعبد في التفكير والرب في التدبير.."
وكعاده الستات المصريات بعد حديث مطول من الرغي فاقت وسألتني هو صحيح "نظيف"عزمك علي فرحه؟!
وكان هذا السؤال صدمة كبيرة علي لم أتوقعه وصرخت فيها كأنني العارف ببواطن الأمور.. الكبار في الدولة لا يعزمون الشعب علي أساس إن الشعب ملكهم.. يبقي انا معزوم من غير دعوة وبعدين تفتكري العريس هيعزم 80 مليون واحد عالفرح.. الراجل كتر خيره عمل الموضوع "عالضيق " حتي لا يحرج احد وهو عارف ظروفنا كويس عشان كده الراجل أعفي المواطنين من تقديم التهاني يكفي فقط فرحة القلب بزفافه.
فكرت ملياً ثم قالت الحمد لله مش قلت لك ان ربك هايعدلها وطالما أن الموضوع كده يبقي خلاص ريح دماغك لا هدية ولادياولوه قالوا زمان العروسة للعريس والجري لل.....؟ وطالما الموضوع كده ابعت له "مسدج" تهنيه فيها عالجوازة واكيد هو هيقدر ده وأكيد الرجل "مش" هيزعل منك وبعدين ( لا يكلف الله نفسا الا وسعها )
نهرتها بشدة : يا ستي منظرنا ايه أمام العالم .. رئيس الحكومة يتجوز والشعب لا يشاركه فرحته لازم أشارك .. العالم كله ينتظر هذا الحدث الهام علشان كده اعلنوا عنه قبلها بشهر "عشان" نعمل فرح "حاجة كده تليق بمقام سيادته" ده رئيس حكومة ومش شخص عادي.
قالت لي : براحتك بس ابعد عن ميزانيه البيت "اللي عايز يجامل يجامل من جيبه" وبعدين هو مش محتاج هدية منك ولا من غيرك .. احنا ندعي له ربنا يسعده ويوفقه وتكون عروسته قدم السعد علي الشعب المصري.
ذهب تفكيري الي نوع الهدية التي تقدم الي رئيس حكومة.. اباجوره .. غساله .. ثلاجه .. تليفزيون .. تذكرت ان الدكتور نظيف يعشق التكنولوجيا ان جهاز "لاب توب" جديد موديل السنة هيكون حاجة تشرف!! ولما سألت عن سعره دخلت في حاله اغماء لم افوق منها الا بعد فرح د.نظيف.