كلنا هيباتيا

هيباتيا - دي كانت فيلسوفه وعالمة رياضيات "وثنيه".
كانت بتنادي بالحريات و الفلسفه العقلانيه . بس للاسف الفتره اللي كانت موجوده فيها , كان في تطرف مسيحي ضد كل ما هو غير مسيحي , نتيجه الاضطهاد الدموي اللي عاشوه المسيحين علي ايد ديقلديانوس (امبراطور وثني كان مشهور بتعذيبه للمسيحين بوحشيه )
و فعلا قام بعض المسيحيين (الأصولين ) وقرروا ان هيباتيا ضد الكنيسه وضد الدين
و.. في يوم كانت مروحه مشيوا وراها وهجموا عليها وشدوها من شعرها وجردوها من هدومها وسحلوها في الارض وفي الاخر حرقوا جسدها !!!
هيباتيا رمز من رموز التنوير والفلسفه في تاريخ الانسانيه , لو عاوز تقرا اكتر عن هيباتيا :
http://ar.wikipedia.org/wiki/هيباتيا
..
ليه كل العنف ده ؟؟
ليه كان في ناس بتنادي بالتسامح و المحبه وفي نفس الوقت يحروقوا و يعذبوا و يقتلوا؟
ليه بيكرهوا اللي ضد الدين؟؟؟
عشان ببساطه العنف بيولد عنف , الضغط الكتير يقلب بانفجار , غضب ثم لذه انتقام !
في وقتنا ده .. حتي الاخوان والسلفيين , عنفهم ناتج عن معتقلات امن الدوله , نتيجه زوار الفجر , نتيجه اللي شافوه علي ايد داخليه العادلي ...
شعور الضعيف لما يتملك , شعور المقهور لما يحس ان تحت ايده سلطه , يقدر ينفس عن نفسه .. شعور المواطن المقهور في شغله , في الموصلات , في طابور العيش ..
المواطن ده لما يروح بيته ويشوف ابنه مابيذكرش مثلا او حتي ميكملش أكله ! يكون عاوز يقوم يكله وممكن يفضل يضرب فيه بطريقه وحشيه و يبرر وحشيته أنه بيربيه !! ..
ولما مراته تقوله صباح الخير بهزار او تنسي مثلا تكوي قميصه يكون عاوز يضربها او يقتلها او علي اقل تقدير يطلقها .. إسقاط , او بالمعني الشعبي بتاعنا "مش قادر علي الحمار بيتشطر علي البردعه " ..
حتي التحرش إسقاط ! مش عارف يتجوز , مجتمع بيقهره , يلاقي واحده غلبانه ماشيه في حالها , يأذيها و يتلذذ انه يشوفها تتألم جواها و هي مش قادره تتكلم ! علطول يحس بانتصار داخلي .. يشبع النقص اللي جواه .. يبقي راجل بينه و بين نفسه !
خطورة الشعور بالقهر ده لما يختلط بأوامر دينيه , الانسان المقهور يحس في انتقامه ده , انه بيقدم خدمه لربنا.. أضرب حد عشان ربنا .. اشتم واحده عشان ربنا.. شوه , هين , اقتل عشان ربنا !! يحس ان الله – القادر علي كل شيئ – خالق السماء و الارض و خالق الانسان نفسه , مستني خدمه منه !!
للاسف السلوكيات اللي زي ديه مش عاوزة صوم و صلاه , قد ما عاوزة تربيه نفسيه صح .. عاوزه ثقافه , توعيه , تنوير , مش عاوزه كتب دين , لكن عاوزه روح الدين .. عاوزه انسانيه , حب , تسامح , عدل !
بالمناسبه الملحد او اللي مش متدين عارف ان القتل غلط , عارف ان التحرش جريمه .. عارف ان الكذب ضعف , مش محتاج يروح الجامع عشان يدرك ان السرقه سلوك خطأ , مش محتاج يقرأ كتاب دين عشان يعرف ان الزنا سلوك مكروه .. الدين مش بيعلمنا نكون بشر ,.. الدين وظيفته انه يحسن من سلوكنا كبشر , يهذب ضمايرنا , يرتقي بينا ..
بس للاسف فيه ناس بتدعي انها بتحب ربنا اللي مش شايفه وهي مش قادره تحب اخواتها في الانسانيه اللي هي شايفاهم !