عن الحب والعرش والجنة.. 5 أسئلة جدلية طرحها الأطفال على الشيخ علي جمعة

حجر كبير أُلقي في بحيرة راكدة أثار موجة من الجدل بين الناس.. تشبيه موجز لما أحدثه برنامج رمضاني فاجأ المشاهدين بضيوفه من الأطفال وتلاميذ المدارس ليطرحوا أسئلتهم الجدلية والمفاجئة، والوجودية أحياناً، ورغم براءتها إلا أن بعضها غاص في صميم الإيمان والإسلام، وبعضها الآخر فاض في العلاقات الأسرية، وفجرت حالة من النقاش والجدل المجتمعي.
خلال برنامجه "نور الدين"، فوجئ الشيخ الدكتور علي جمعة، مفتي الجمهورية السابق وعضو هيئة كبار العلماء بالأزهر الشريف، بأسئلة ضيوفه من الأطفال والتلاميذ، لتثير حالة من الجدل على منصات التواصل الاجتماعي، بين مؤيد لآراء الشيخ المستنيرة، ومن يراها تؤسس لعقيدة تفسد على النشء دينهم.
في التقرير التالي يرصد مصراوي أبرز 5 أسئلة طرحها الأطفال على الشيخ علي جمعة، وردوده، أثارت عاصفة من الجدل:
1- لماذا خلق الله العرش؟
في رده على سؤال أحد الأطفال، قال الدكتور علي جمعة مفتي الجمهورية السابق إن الشريعة لم توضح المادة التي خلق الله منها العرش، لافتا إلى أن عرش الرحمن، يمكن أن يكون خُلق من اللؤلؤ أو الذهب أو الجواهر أو الزمرد: «العرش حاجة مبهرة، وعظيمة، فخمة وكبيرة أوى، وتشعر بنوع من الأمن والخشوع جواك».
أما عن أسباب خلقه، فقال جمعة: "ربنا سبحانه وتعالى رسم الدنيا على وضع معين وهناك عالم الأرض حوله مجره وهى مجموعة ضخمة جدا من الكواكب والأرض بتلف والشمس أيضا..الكون منها حاجات لسه مشوفنهاش ..فالكون المرصود اللى احنا بنشوفه 93 مليار سنة ضوئية .. الضوء بيجرى بسرعة قوي 300 ألف كيلو في الثانية الواحدة .. يعني من هنا لمرسى مطروح ناخد ثانية واحدة، والشمس بعيدة قوى والضوء ياخدها في 8 دقايق، اما باقى الدائرة الكونية 575 مليار سنة ضوئية، يعني سدس الكون شايفينه، وخمسة أسداسه لم نراه .. لسه قدامنا كتير ..وربنا بيقول في كتابه: "وَمَا أُوتِيتُم مِّنَ الْعِلْمِ إِلَّا قَلِيلًا"..لما ربنا خلي الكون يلف فخلاه يطوف حول العرش، زى الكعبة كده بنلف حولها تشبها بالملائكة الذين يلفون حول العرش، وربنا عمله مخلوق عظيم جدا ومبهر علشان لما نعرف شأنه نعرف إن الله سبحانه وتعالى قهره واستولى عليه فنسجد لله سبحانه وتعالى".
2- "ليه ربنا خلقنا، وليه مش بنشوفه؟"
أحد الأسئلة البريئة التي طرحتها طفلة، ليرد الدكتور علي جمعة، قائلًا: "ربنا خلقنا وقال لنا (وما خلقت الجن والإنس إلا ليعبدون)، فربما سبحانه وتعالى خلق الملائكة والجن وخلقنا وخلق عوالم كتيرة زينا علشان نعبده".
وتابع: "كل عالم من العوالم دول بيعبد ربنا بيطريقته، الملائكة لا يعصون الله أبدا، إحنا خلقنا وعندنا عقل واختيار، وأسجد لنا ملائكة وقال لنا انتم لو استقمتكم هتكونوا أفضل من الملائكة، وفى منا اللى بيستقيم ومنا من لا يستقيم".
أما عن جزئية "ليه مش بنشوف ربنا؟" قال جمعة: "ربنا خارج الدائرة، هل إحنا نقدر نشوف أمواج الردار، أو تيار الأشعة اللى يعمل بها حاجات فى جسمنا، الإنسان بيشوف بعين والضوء وبينعكش على الحاجة، طيب فين الضوء اللى هينعكس على ربنا".
وتابع: " الضوء لا ينفع يتسلط على أى حاجة، وربنا ليس مخلوق ومش ممكن يكون مخلوق، ربنا خارج الدائرة الكونية التى فيها كل المخلوقات، ويوم القيامة هنكون على طرف الدائرة وساعتها هنشوف ربنا، بس إزاى منعرفش، يبقى كل اللى علينا إننا نعمل عمل صالح علشان نشوف ربنا".
3- هل يدخل الجنة غير المسلمين؟
سؤال في صميم العقيدة، تلقاه جمعة من طفلة تقول "إيه سبب دخول المسلمين فقط الجنة، رغم أن هناك ديانات أخرى ولها رسل من السماء مثل المسيحية التي أرسل بها سيدنا عيسى عليه السلام"، ليرد فضيلة المفتي السابق قائلاً: «مين قالك إن المسلمين بس هما اللي هيدخلوا الجنة؟ دي معلومة مغلوطة!».
واستشهد بقول الله تعالى في الآية الكريمة: «إِنَّ الَّذِينَ آمَنُوا وَالَّذِينَ هَادُوا وَالصَّابِئينَ وَالنَّصَارَى مَنْ آمَنَ بِاللَّهِ وَالْيَوْمِ الْآخِرِ وَعَمِلَ صَالِحًا فَلَا خَوْفٌ عَلَيْهِمْ وَلَا هُمْ يَحْزَنُونَ».
وأضاف جمعة أن الدين عند الله الإسلام، وجميع الأديان تسمى إسلاماً "الآية واضحة جدًا، إن الدين عند الله الإسلام، كله اسمه إسلام عندنا".
4- هل الحب بين الولد والبنت حرام؟
توجهت طالبة بهذا السؤال إلى الدكتور علي جمعة: هل ينفع أقابل شاب وبيكلمنى فى الحب هل كده حرام ولا حلال؟.. فقاطعها الشيخ: "هل فى عفاف ولا مفيش، يعنى خرجوا مع بعض ومسك إيديها وسبل لها بعينها يبقى كده مفيش عفاف".
فردت الطالبة: "بس الأهل عارفين، ومفيش تلامس، يبقي كده الحب حرام؟".
فرد الشيخ عليها: "طالما مفيش عفاف حتى لو الأهل عارفين يبقى كده ممنوع، وهتبقى آثمة لو استمرت فى هذه العلاقة".
5- "هل ينفع أقول لزميلتي بحبك وحشتينى؟"
سؤال آخر من أحد طلبة المدارس وجهه للشيخ علي جمعة، قائلًا: هل الشات بين ولد وبنت يعتبر خلوة أو حرام؟.. ليرد فضيلة المفتي السابق: "الشات لا يعتبر حرام، ما دام في علانية ولا يوجد به أى شيء حرام، اللى هو فيه خلوه حرام".
وقاطع الطالب، مفتي الديار المصرية السابق بسؤال: "واحد كاتب لصديقته بحبك وحشتينى، هل ده يعتبر حرام، ووالدها لا يعرف وكلام فى السر".
ورد عليه جمعة: "وأنا كمان هكتب لك كده، بس لو أبوها عارف، مفيش مشكلة، لكن لو مفيش حد عارف، يبقى خطأ ويبقى فى سر، وهيكون فى كلام مش مضبوط وهيبقى فى كلام فيه سر ونخاف يطلع عليه الناس".
واضافت جمعة "البنت ممكن تقول لباباها، أنا فلان بيساعدنى وبحبه، خلاص بقى أبوها عارف وأمها عارفه والكل بقى عارف، ولو حصل أى خطأ بين الأبناء هيقوموهم ويعلموهم الصح حتى لا يقدحوا في العفاف.
اقرأ أيضًا:
منها حكم دفع الزكاة أو الكفارة أو الفدية لغير المسلم.. 3 أحكام مهمة يوضحها المفتي
ما حكم سماع الأغاني في نهار رمضان؟.. المفتي يوضح
هل ملامسة الكلاب تؤثر على صحة الصيام ؟.. تعرف على رد المقتي
حكم من يصوم ولا يصلي وقطرة الأذن والسواك أثناء الصيام.. 3 أحكام مهمة يوضحهم المفتي
أهم الفتاوى والأحكام الشرعية والآراء الدينية