رضا حامد: عادل إمام قالي أنت ممثل جامد.. وهذا سبب انسحابي من "بودي جارد"

قال الفنان رضا حامد، إنه اختلف مع فرقة مسرحية "بودي جارد" بعدما قضى معهم 9 سنوات، وذلك أثناء استضافته في برنامج "كلام الناس" على شاشة قناة "MBC مصر".
أضاف حامد: "هو حصل خلاف بيني وبين الفرقة، مش بالضرورة يبقى الأستاذ عادل إمام طبعا، حصل إني مبقتش موجود، أنا اشتغلت معاهم 9 سنين عرض على المسرح، واللي جابني الأستاذ عادل، هو صاحب فضل إني جيت المسرحية، وحصل قبل كده لقاء مع الأستاذ أسامة كمال وذكرت أشياء أعتقد إنها اتفهمت غلط على السوشيال ميديا، أنا مقولتش حاجة غلط تجاه الأستاذ عادل".
واستكمل حامد: "حصل موقف معين، يعني أنا لما أبقى صاحب مسرحية، أنا النجم الأوحد في المسرحية، وأنا مش عايزه، ومش عايزه يعني يعمل حاجات معينة، ودي ممكن تسيء للعرض، خلاص ملوش لازمة إنك تعمل الحاجات دي، خلاص هو حر، ده عادل إمام بتاريخه، لازم أصحح وأفهم الناس إن عادل إمام ده تاريخ كبير، ربنا يعفو عنه إذا كانت ظروفه الصحية مش كويسة".
وأضاف: "لا أنسى له موقف أنه مسك كتافي كده، وقالي ياض يا رضا، أنت ممثل جامد قوي، فدي حاجة من الحاجات اللي أنا مش ناسيهاله".
مسرحية "بودي جارد"، بطولة الزعيم عادل إمام، تأليف يوسف معاطي، وإخراج رامي إمام، وانطلقت عروض المسرحية بمشاركة النجوم: "عزت أبوعوف، مصطفى متولي، سعيد عبد الغني، وشيرين سيف النصر، وعُرضت في الفترة بين 1999 و2010.
تدور أحداث المسرحية حول السجين "أدهم" الذي يعقد صفقة مع رجل الأعمال المسجون "سعد"، المتهم بسرقة 700 مليون جنيه، بحيث يعمل حارسًا شخصيًا لدى زوجته "عائشة" التي تقع في حب "أدهم"، وبمرور الوقت يكتشف ذلك "كاظم" صديق "سعد" ويبلغه بذلك الاهتمام المبالغ فيه، فيكتشف "سعد" خيانة زوجته، ثم يلفق تهمة ل "أدهم"، بينما يحاول الهرب بما سرقه من مال، إلا أن "أدهم" يقف عقبة في طريقه.