"كان فتى أحلامي".. ساندرا نشأت تكشف تفاصيل فيلمها عن الراحل عبد السلام المحجوب

كشفت المخرجة ساندرا نشأت تفاصيل، فيلمها عن اللواء الراحل محمد عبدالسلام المحجوب، وزير التنمية المحلية الأسبق، ومحافظ الإسماعيلية والإسكندرية الأسبق، قائلة: "كنت أتمنى أن الفيلم يتعرض قبل كده، ولكن تأخر عرضه كان كسل وظروف حاجات كتير مني يعني، ولكن هو شافه وبعته ليه أول ما خلص".
وأضافت "ساندرا" في مداخلة هاتفية لبرنامج "يحدث في مصر" على فضائية "إم بي سي مصر" اليوم الثلاثاء: "أن خبر وفاته كانت لحظة دمها تقيل شوية، ولكني كنت فخورة إني أروح له وأسجل معاه وابنته إيمان عبدالسلام المحجوب كانت متواجدة أثناء تسجيل الفيلم"، موضحة: "هو ليه مكانة عندي مكنش يعرفها وعرفها بعدين، لأن أول جائزة في حياتي في مبروك وبلبل أخدتها كانت في الإسكندرية وهو سلمها لي وهو كان وقت ذاك محافظ الإسكندرية".
وتابعت: "لما تسلمت الجائزة منه تسلمتها بعنف وهو وقتها ضحك اوي و روحت قولتله إني زعلانه إني أخدتها متأخر ولكني مبسوطة اني اخدتها منك ومن وقتها وعبد السلام المحجوب دا النجم بالنسبة لي"، مؤكدة: "هو كان النجم بتاعي زي أحمد رجب كده لأنهم ناس بتعمل والناس مش بتشوفها وتعمل ومش بيهمها سلطة أو مال أو يتقال عليهم ايه هما كانوا بيعملوا واجبهم وهو قالي في الفيلم مش مهم هاخد ايه ولا حد يعرفني ولا عارف صورتي".
وأردفت المخرجة ساندرا نشأت: "هو كان مثال للنجوم اللي بدور عليها وبالنسبة لي هما المثل الأعلى اللي أحب إني أقربله، وكنت متابعة له دائمًا، وعندما كان يتم سؤالي عن فتى أحلامي زمان كنت أقولهم عبدالسلام المحجوب ولما كبرت وعرفت كنت عايزه احكيله كل دا، ممكن كان الوقت متأخر شوية لكن كان نفسي أقوله إن في ناس كتير بتحبه لكن مقالتلوش".
وأكدت: "من خلال الفيلم شفت إن اللواء الراحل عبدالسلام المحجوب كان متواضع جدًا وهو راجل مصرى جدًا ومش فارق معاه حاجه ولا عايز يتكلم ويتكلم بإلحاح مني، وهو كان رجل مخابرات وكان بيقول دائمًا مش مسموح لي أقول أي شيء، ولما أحنا عرفنا كان بالنسبة لنا ساحر أكبر ونجم مش معقول".
وأشارت: "كان نفسي أعرف البني آدم دا بيفكر ازاي رجل المخابرات دا، ولما بتشوف وهو بيتكلم كان بيتحول في جملته وهو بيقول أنا رجل مخابرات، فهو كان متواضع وكان يرغب في الفرحة بأولاده"، موضحًا: "أنا منفعلة لأني قمت بتسجيل حوار معه ومع الراحل أيضًا الاستاذ ياسر رزق الكاتب الصحفي الراحل وهنعرضه إن شاء الله، فهم مكنوش عايزين حاجة لا من الرئيس السيسي ولا من مصر ولكن عايز يقول اللي عنده وشهادتهم في وقت معين مهمة عشان الناس تشوف شايفين مصر ازاي من وجهة نظرهم، ولديهم رصيد كبير لمعرفة رأيهم وهما مش محتاجين حاجة، وخسارة الجيل ميعرفوش تفاصيل حياة الشخص دا".