30 تصريحا ل مصطفى فهمي.. تفاصيل خلافه مع فاتن موسى لأول مرة وسر الطلاق الغيابي

حلّ الفنان مصطفى فهمي، ضيفا على برنامج "الحكاية" الذي يقدمه الإعلامي عمرو أديب، عبر قناة MBC مصر، مساء الاثنين.
وإليكم أبرز تصريحات مصطفى فهمي خلال اللقاء:
- كشف أن أول أعماله في السينما، حيث كان فيلم "النداهة" عام 1975.
- بدايتي الحقيقية في عالم السينما عند قيامي بتمثيل ثاني أفلامي "أميرة حبي أنا" مع الفنانة سعاد حسني، ثم تلاها فيلم "الجنس الناعم" مع النجم محمود عبد العزيز.
- تحدث عن سر احتفاظه بجماله رغم تقدمه في العمر، قائلا "بلعب رياضة كتير ومبحبش المشاكل وده يدي مية في المية عمر بديل، بحب السفر وبحب أقعد على البحر كتير".
- وعما إذا كان هناك وصفة معينة يتبعها للحفاظ على رشاقته، أوضح "الوصفة إني نهاري أحب النهار أكتر من الليل، أحب أروح ألعب رياضة وأقعد في الشمس، على البحر، الليل بالنسبالي قليل جدا بسهر لكن على خفيف ومش دايما على حسب المناسبات".
- وردًا على تأكيد عمرو أديب على أنه يبدو أصغر من عمره، قال مصطفى "خمسة وخميسة يا عمرو ارحمني امسك الخشب".
- أنا إنسان نهاري ولا أعشق السهر، وغير مهتم بوسائل التواصل الاجتماعي باستثناء تطبيق واتس آب.
- لا أتابع السوشيال ميديا مطلقا وليس لي أي حسابات على تلك المواقع.
- أنا وحسين فهمي أشهر عزاب في الوطن العربي حاليًا وحظنا وحش في الستات وخصوصًا اليومين دول.
- علاقتي بحسين فهمي بقت كويسة جدًا اليومين دول بسبب إننا غير مرتبطين.
- الفنان يحتاج لزوجة بمواصفات خاصة، لأن الفن مش شغلانة محددة المواعيد، التصوير ممكن يوم يستمر أحيانًا لحد الصبح.
- المرأة هي المرأة سواء مصرية أو أجنبية، فيه ستات بتكون مقررة تنكد على زوجها ولو عايزة تريحه هتريحه.
- مشكلة المرأة تتمثل في صعوبة أن يفهمها الرجل، وعاد ليؤكد استحالة الأمر، مرجعًا السبب في ذلك إلى أن المرأة متغيرة جدا.
- فيه ست بتبقى عايزة تعكنن عليك ودي مش حالات نادرة دول كتير أوي كده، تلاقيها بتقول يا داهية ليكون مبسوط لو شافت الراجل داخل بيته مبسوط.
- لما أكون مش قادر أكمل لازم أقرر إنهاء العلاقة.. مش هينفع أكمل في علاقة وسط خناقات لا تنتهي، أكمل في حياة أنا مش مبسوط فيها ليه؟
- أنا من النوع اللي لما أحس إني مش قادر أتفاهم مع الشريك بحط خط وأنهي.
- قررت أن يكون طلاقي لفاتن موسى وهي في لبنان لأن ملهاش حد في مصر، لما حصل كنت عارف عواقب الطلاق الغيابي، لكن رغبة مني أنها تكون في وسط بيتها في وسط أهلها، هنا مين هيحتويها، وهيحصل صويت.
- الطلاق مكنش مفاجأة.. إذا كان أخوها قال قبل السفر بليلة روحوا اتطلقوا.
- مكتب المحاماة الخاص بي نزل بيان بعد الطلاق، وقلنا فيه إن كل متعلقاتك موجودة والمؤخر بتاعك موجود مقلناش الرقم، وعربيتك اللي جايبهالك هدية موجودة، من فضلك لما تيجي القاهرة أو مندوبك بلغينا في المكتب.
- كلمت أخوها من حوالي سنة ونص، قلتله الحياة بقت مستحيلة وزي ما دخلنا بالمعروف نخرج بالمعروف، شال إيده وقال ماليش دعوة بالموضوع ده.
- بعدها بكام شهر حصل خناقات بينا تاني كلمت والدها قلتله الحياة مستحيلة، رد عليا ما معناه دي مش مشكلتي أنتوا اللي قررتوا تتجوزوا مع بعض، وأنتوا كبار واتصرفوا مع بعض، رديت قلتله بشكرك.
- وعرض في البرنامج تسجيلات صوتية متبادلة بينه وبين والدها، وطلب منه أن يتحدثا لحل المسألة، وكشف كيف كان رد حماه، والذي وصف مصطفى بأنه صاحب حكمة ومسؤولية "ما بريدك تكون تعبان ولا أريد لابنتي أن تكون تعبانة أبدًا".
- الطلاق شيء صحي عندما تصل الحياة لمرحلة عدم القدرة على التفاهم.. وتيجي تاخد حقوقها.. وحقوقها كل موجودة.. بس أخد رد اعتبار.. لازم أخد حقي.. في قانون في البلد.. تشهير تشهير بشكل قبيح.. بعد الزمن ده كله أنا طلعت في الآخر حرامي غسيل.
- لما بنكون قدام الناس لازم نضحك ومش معناه أنك في بيتك سعيد، بتروح البيت بيحصل الخناق، وأخر سنتين كانت كده، الكوباية بتتملي لحد ما بتيجي القشة الأخيرة بتوصل لمرحلة أنك مش قادر تكمل.
- القشة الأخيرة كانت لما حصل بيني وبينها مشكلة قبل سفرها للبنان لحضور خطوبة أختها، وقتها كان فيه ضرب في لبنان وقررت عدم السفر، وكان أخوها يجلس في بيتي قبلها بأسبوع، وعندما صرحت بعدم رغبتي في السفر وقعت الخناقة، وكانت كبيرة لدرجة أن أخوها قال كده مينفعش انزلوا اتطلقوا بقى، قالت أنا مش هتطلق أنا أطلق وأنا اللي أخد قرار الطلاق.
- تعبير فاتن الأخير جعلني أقرر في نفسي داخليا أن الطلاق والانفصال سيقع وأن الحياة بيننا لن تستمر.
- وردا على اتهامها له بأنه غدر بها لعدم قيامه بإخبارها بوقوع الطلاق، قال "لأ قلت وقبل ما تسافر كانت عارفة.. الغدر هو اللي بيحصلي أنا دلوقتي، التشهير والسب والقذف اللي بيحصل على السوشيال ميديا، فيه أسباب كتير الكوباية اتملت مش من الهوا".
- بلدنا مفيش أحلى ولا أورع من كده، مصر بتتقدم وبتجري خلال عهد الرئيس السيسي.
- أنا محضرتش الملكية ولكن قرأت عنه، ولكني عاصرت جمال عبد الناصر وكنت أحبه وتربيت على خطبه وكلماته، ولكن بعد محنة 1967 حدث شرخ في حبي له، ومش ده كان شعوري لحدي ده كان شعور كل جيل النكسة.
- مستوى الفن بشكل عام هبط لأكثر من 90% عن زمان.
- وعن أحدث أعماله قال الفنان مصطفى فهمي، أقوم بدور رئيس المخابرات المصرية في فيلم "السرب" مع الفنان أحمد السقا، مضيفًا أنه استوحى الشخصية من خلال قراءة جديدة لسيرة رؤساء المخابرات في مصر.