فراغ وتضييع وقت.. محمود سعد يعلق على منع مطربي المهرجانات - فيديو

علق الإعلامي محمود سعد، على قرار هاني شاكر نقيب الموسيقيين بمنع مطربي المهرجانات من الغناء.
وتساءل "سعد": "هل بلدنا الكبيرة تدمرها أغنية؟!" فين الفكر؟، متابعا:"الغنا زي ما يكون في مجموعة من أسماء المطربين، والبعض معترض على هذه الأسماء، فهناك أسماء زنانة في عالم الغناء، والطبيعي حال ظهور مثل هذه النوعيات من الغناء لا يمكن أن تؤثر على المجتمع".
وتابع:" في أوائل السبعينات طلع أحمد عدوية والصحافة هاجمته وكان تقريبًا لازم ينتحر"، وضرب سعد، مضيفا:"أغنية "كركشنجي دبح كبشه يا محلى مرقة لحم كبشه" فيها إيه دي هل دي ممكن تتمنع؟"، احنا حفظناها، زي ما حافظين الأطلال".
وأضاف في فيديو بثه على صفحته ب "فيسبوك"،:"ممكن في أغنية بتهيص كدة يعني احنا سهرانين مهيصين نكون عايزين نسمع أغنية الدنيا زي المرجيحة، المزيكا والغنا الناس بتسمعه حسب ذوقها، ولما قولت الأطلال أعظم أغنية في القرن الماضي من حيث المقاييس هل معنى كدة انك لازم تحبها؟، بس لازم نعرف ان الأغنية دي فيها المواصفات الصح بالنسبة للغناء".
واستطرد:"طه حسين قال لو عايز تقيس مستوى ثقافة شعب قيسه بالأغنية، لأن الأغنية أهم وسيلة فنية تؤثر في الناس، انت تسمعها وتغنيها حد يقدر يمنعك غير هاني شاكر، مفيش حد يقدر يمنعك، وبالتالي تقدر ترددها في أي مكان، ولكن القياس مش كده، احنا عندنا الأوبرا ومطربين كبار وأسماء زنانة وملحنين وشعراء".
وقال:"سيب الناس تغني وتتبسط، وفي نفس الوقت هناك مقاييس ورقابة علشان الخروج عن المسائل الدينية والحساسة، الحقيقة أن ما يحدث نوع من أنواع الفراغ وتضييع الوقت".
وتابع:"لازم يكون في غناء هابط علشان يكون في غناء كويس، علشان نخلص من الغناء الهابط، اعط فرصة للناس تغني يعملوا حفلات للناس".
واختتم:"لكي تقاوم الغناء الهابط سمّع الناس الغنا الحلو مش بالمنع".