ضحية "تحرش العمرانية": " لما ضربني الناس موقفتش جنبي..وكنت مرعوبة أنزل الشارع"

كشفت ضحية التحرش ليلى، المعروفة بإسم "فتاة العمرانية"، تفاصيل تعرضها لواقعة التحرش أثناء عودتها من الدرس، قائلة: "كنت راجعة من الدرس وأنا في ثانوية عامة وأثناء سيري في الشارع فوجئت بأحدهم يسير بجواري بسيارته، واعتدى عليا لفظيًا بألفاظ خادشة للحياء.. قالي كلام فظيع مش كويس.. وحاولت تجاوزه وإكمال سيري".
وأضافت "ليلى"، في مداخلة هاتفية ببرنامج "كلمة أخيرة"، المذاع على فضائية "أون إي"، اليوم الأحد، قائلة: "عندما حاولت سؤاله بعد سبي وقلتله حضرتك بتكلمنى أنا؟، فوجئت بيه بيضربني بالقلم على وشي"، متابعة: "كنت خايفة اوي منه وقررت مانزلش الشارع تاني وقتها، صحيح تعرضت لمعاكسات قبل كده بس المرة دي كانت سباب وشتايم وضرب على وشي، ووقتها أصبت بالصدمة والذهول إزاي أتضرب؟، وماعرفتش أتصرف؟، لكن صاحبتي ساعدتني وأخدت رقم العربية".
وأكملت: "الناس في الشارع سألوه أنت بتعمل كده ليه؟، وهدوه ومشوه ورغم أني بنت المنطقة بس ماحدش وقف جمبي"، متابعة: "بعد ما صاحبتي صورت رقم العربية قلت لماما، وأخدت بعضي ونزلت اعمل محضر في القسم بتشجيع أمي واوبويا وأصحابي".
وأكدت أنها كانت مرعوبة من الواقعة، مستطردة: "قلت لنفسي لو الشخص ده ماتقبضش عليه هيكرر فعلته معايا ومع بنات تانية وأكيد عملها قبل كدا"
وحول مشاعرها بعد القبض عليه، قالت: "ماكنتش متخيلة يتقبض عليه بسرعة وبشكر كل اللي دعمني ووقف جمبي وبشكر كل الناس وأصحابي وأهلي والشرطة".
ووجهت رسالة للفتيات اللاتي يتعرضن للتحرش قائلة: "ماتسكتيش هيتجاب حقك وماتخافيش كنت الأول زمان بخاف أتكلم في مثل هذه المواقف، لكن المرة دي إتحركت وماقدرتش اسكت بعد مامد إيده علي وماتوقعتش ده أبداً".