"زعله من تامر حسني ووصفه بتربي الفنانين وما تعلمه من أحمد رمزي ورحلة طفولته".. أبرز ما قاله أحمد السقا في "السيرة"

حل الفنان أحمد السقا، مساء أمس الجمعة، ضيفا على برنامج "السيرة" الذي تقدمه الإعلامية وفاء الكيلاني، عبر فضائية "دي إم سي"، وتحدث خلال الحلقة عن طفولته وعلاقته بوالديه وسبب "زعله" من الفنان تامر حسني ووصف البعض له ب"تربي" الفنانين وما تعلمه من الفنان الراحل أحمد رمزي، وغيرها.
ونرصد لكم أبرز ما قاله أحمد السقا، في التقرير التالي :
- "أنا زعلان من تامر حسني، وأنا بحبه جدا، ولو مش بحبه مش هزعل منه.. زعلان منه عشان هو في فيلم (الفلوس) كلمني وقالي إنه عايزني أعمل معاه مشهد، وهو الحقيقة كان جاملني في مسلسل (ولد الغلابة)، وبعد ما عملتله المشهد فوجئت إن الفيلم نزل إنه بطولة تامر وأحمد السقا وصورة معاه على الأفيش، كلمته قولتله إيه اللي بيحصل ده، مرة قالي دول فانز، ومرة قال دول الشركة المنتجة، قولتله أنا معرفش حد منهم يا تامر أنا معرفش غيرك، ودي أثرت عليّا جدا نفسيا وفي شغلي".
- "لو تامر حسني قابلني حاليا، وقالي كلمتين حلوين الموضوع هيخلص .. لكن أنا زعلت، لأن أنا لا يمكن أعمل فيه كده، ميصحش كده، وهو كان بإيده يمنع الكلام ده، لكن اللي حصل حصل وأنا مسامحك يا تامر لكن مشاكلك كترت".
- "وفاة الراحل هيثم أحمد زكي، أثرت فيا جدا، لأن علاقتي به كانت قوية وعلى اتصال دائم ببعض طول الوقت وكان بالنسبة لي حاجة كبيرة أوي".
- "أمي كانت بتضربني طول الوقت وأنا صغير، لأني كنت طفل شقي، وكنت بتنطط كتير من فوق السطوح، ووالدي كان بيسميني الزيبق، عشان كنت بخرج من البيت من غير ما حد يعرف عني حاجة".
-" أول مرة شفت فيها زوجتي مها الصغير، كانت في الجامعة الأمريكية، وبعدها بسنة ونصف كنا متجوزين، ولما اشتغلت مذيعة، استطعنا حل مشاكل كتير بيننا".
- " تعبت نفسيا من الشائعات التي طاردتني بموضوع الانفصال عن زوجتي مها الصغير، وكل بيت يوجد فيه مشاكل واتبهدلنا كتير بصراحة، ولكن الحمد لله".
- " تركت الكرة بعدما فشلت في اللعب بالدوري الممتاز، وفضلت ألعب لأندية الدرجة الثانية والثالثة فقط، وآخر نادي لعبت فيه كان نادي الصيد في دوري الدرجة الثانية".
- " لو رجع بيا الزمن، لأستمريت كضابط شرطة .. كنت فاكر أن كلية الشرطة ضرب نار وركوب خيل بس لقيت الموضوع غير كده خالص، ومقدرتش أستمر، ولكن لو استمريت كان هيبقى ليا الفخر".
- " كان عندنا حظيرة من المواشي ببلد جدي في ميت غمر".
_" لما كنت بعمل خطأ أو مصيبة أيام الطفولة، كنت بطلع على الشجرة وأفضل قاعد عليها لمدة 6 ساعات خوفًا من والدي".
- " لما أبويا مات حسيت إني عريان، وحسيت بقيمته بعد رحيله".
- " لم يضايقني وصف البعض لي بتربي الفنانين.. وده ثواب .. ونزلت مقابر كثيرة وأول مرة وأنا في تانية ثانوي ولم أخاف من ذلك، وطول الوقت أذهب إليها وأقرأ الفاتحة للأموات".
- "ابن عمتي كان يركبني على الحمار، ونروح الغيط ونجيب اليوسفي، وكان عندي وقتها 10 سنوات، ولما كبرت حبيت الخيل لدرجة كبيرة".
- " تعلمت من الراحل أحمد رمزي، الرضا وكنت طول الوقت جالس معاه في الساحل الشمالي نشوي ريش ضاني" .