بالصور.. أطرف مواقف رواد «فيس بوك» بعد الفشل في الثانوية.. دعاء: «جبت ملحق وسافرت مارينا».. جهاد: «صححت النتيجة عشان مزعلش بابا».. سوما:«جبت 2 من 20».. وعلى: «أخويا عايرنى بالملحق»

تبقى ذكريات نتيجة الامتحانات محفورة في أذهان الجميع، خاصة إن كان الفشل مصاحبا لها، حيث روى رواد موقع التواصل الاجتماعي «فيس بوك» ذكرياتهم الطريفة مع الرسوب في الامتحانات، وكيف تلقوا خبر النتيجة.
-خبيت عليهم في البيت وقلت نجحت
قال كريم:"أنا في أولى ثانوى كنت مقضيها بلاستيشن وكورة وصياعة وجبت ملحقين.. خبيت عليهم في البيت وقولت نجحت.. وجابولي كولا ووزعوا على الشارع واكتشفوا الحكاية.. بس الحمد الله ما اتضربتش".
- جبت 2 من 20
وأضافت سوما: "والله كنت جايبة 2 من 20 ولم روحت اتفقت مع المستر علشان أدخل معاه درس النص تاني قالى جايبة كام قولتلة 2 قالى انتي محلاتيش حاجة خالص، قولتلة لا كتبت اسمي وسطرت الورقة وطلعت.. قالى تعبتي يابنتي قولتله ما أنا حسيت بكدا ومرضتش أكمل الامتحان".
- بغير النتيجة
وقالت جهاد: "أنا كنت باخد الشهادة وكنت بمسح الرقم اللى مش عاجبني وأكتب رقم تاني وبابا وماما كانوا بيفرحوا بيا مساكين".
وأضاف عبدالله: "أنا نتيجتي طلعت من يومين وطلعلي راسب ثانوية أزهرية لسه مروح البيت إمبارح خسيت 3 كيلو لحد دلوقتي.. لكم أن تتخيلوا ما يحدث".
- جبت ملحق وسافرت مارينا
وكتبت دعاء: "أنا في الثانوية جبت ملحق إنجليزي وبابا اليوم ده حجز رحلة مارينا وأنا أعيط وقلت له روحوا إنتو عشان أنا مستهلش قالي ولا يهمك وتتعوض ومتزعليش.. الله يرحمه".
- سقطت وخبيت على بابا
وروى محمود: "أنا كنت ساقط في مادتين في إعدادي، ويوم ما النتيجة ظهرت كان والدى مسافر السعودية يشتغل هناك وأنا لما عرفت النتيجة قفلت على نفسي الأوضة وفضلت زعلان، ومقلتش لحد أني جبت النتيجة والبيت كلو كل اللى رايح واللى جاي يدخل عليا الأوضة ويكلمني ويفهمني أن والدي مسافر عشان خاطرنا أنا وأخواتي نعيش كويس بقيت أنا الحنين اللى زعلان على فراق والدى والحقيقة أنى كنت زعلان عشان أنا ساقط كانت نتيجة نص السنة".
- أفرح ولا أزعل إني نجحت
وقال شريف: "أنا فضلت نايم وخفت أصحى لحد ما تليفوني رن وهب الخبر مبروك النجاح، أنا بقيت محتار أفرح ولا أزعل على درجتى، فقولت أكمل نوم وخلاص".
- ملحق عربي في 3 ثانوي
وذكر على: "الحمدلله طول أيام الدراسة جايب درجات تمام بس في 3 ثانوي جبت ملحق عربي سمعت كلام يقطع القلب وأنا عادي وأهلي زعلانين، أخويا الصغير كان بيقول أبو ملحق عربي كنت غش زي الناس طول عمرك موكوس كده".
وتابع أحمد: "في 2 ثانوي جبت 2 في الرياضة، وفي 2 إعدادي جبت 11 من 25 في الرياضة برضو".