" ثانوية عامة" هاشتاج ساخر .. ميدو: زي النهاردة هكون مطرود من البيت.. أحمد: نص الطلبة شايلة فيزياء.. محمد: أكفل طالب بالدرجات الزيادة.. سارة: مرسي بقى رئيس ب 51%

بعد ظهور نتيجة الثانوية العامة وحالة الرعب التي انتابت الكثير من الأسر والطلبة من حصولهم على مجاميع ليست بالكبيرة فقد دشن النشطاء هاشتاج "ثانوية عامة" للتخفيف عن الطلاب الذين لم يحصلوا على مجاميع كبيرة، ولكن في قالب ساخر.
ميدو حبيب: "زي النهاردة السنة إلى جاية هكون مطرود من البيت #ثانوية عامة"
أحمد عمر: "المجد لمادة الفيزياء اللي نصف الطلبة شايلة فيها #ثانوية عامة"
Sherwellah: "نداء إلى الإخوة الناجحين في #ثانوية عامة لو حد قررلك مستقبلك يا هتندم يا حالتك النفسية هتبقى زفت طول حياتك.. ملعون أبو اللي يختارلك شكل حياتك".
محمد عاطف: "الكلام كله انهاردة ينحصر في: إن شاء الله، يارب، شكرا، الله يبارك فيك #ثانوية عامة"
محمد مراد: "طب مثلًا واحد جايب 99% وهو علمي رياضة، يدخل هندسة ب 94% وال5% الباقيين يديهم لواحد جايب 90%؟ مش دى تعتبر صدقة ؟ #أكفل طالب #ثانوية عامة"
لينا الشورى: "لو أهلك رغموك تدخل كلية ما وأنت كنت عايز كلية تانية، امشي ورا هدفك وحلمك متسمعش كلام حد #ثانوية عامة"
أحمد هادي: "ملحوظة: #ثانوية عامة ليست مقياس، فلا صاحب ال 99% يعيش أفضل من الجميع، ولا الحاصل على 50% يحيا بين القبور".
ميدو النوساتي: "أنا بحذر #ثانوية عامة ليه من #هندسة على رأي #حمزة نمرة (لو شوفت زبون خطوته جايباه وقلبه دليله، سيبه على عماه) يا هناه يا هناه اللى يلبس عندنا".
منة الله عثمان: "من الآخر كدة! كلية القمة هي الكلية اللي هتتميز فيها مش الكلية اللي مجموعك يكفيها! #ثانوية عامة".
سارة 65: "ولو فاكر إنك فاشل عشان مجبتش مجموع فى ثانوي افتكر إن محمد #مرسي بقى رئيس ب 51% فرصتك لسه موجودة! #ثانوية عامة #ثانوية زفت".
Pf_ahmed أحمد عزت: "مرة عيل إخواني سقط في الثانوية أبوه دخل عليه عشان يضربه الواد عمل نفسه بيصلي #ثانوية عامة"
حسام عماد: "#ثانوية عامة سيبك من أي حد يقولك بلاش تخش هندسة وبلاش تخش طب وبلاش مش عارف إيه.. اللي يقولك كده قوله اطلع أنت منها وهاتنى مكانك"
إيمان محمود: "وزي الوقت دا من سنتين تلاتة تقريبا.. كنت عايشة أسود لحظات حياتي #ثانوية عامة".
AhmedAbdAlmoaty: "صفحة على #Facebook بتقول 'مهم تم تسريب نتيجة ال #ثانوية عامة '.. يا ريتك ما سربتها".
محمد سعيد: "الناس اللى عاملين هيصة على الثانوية العامة، أحب أفكرهم أن مرسي والعريان هندسة وطب ومنصور والبرادعى والببلاوى حقوق مش بالمجموع #ثانوية عامة".
Kariiiiiiiiiim: "احفظ خطاب من خطابات مرسي وقوله لأبوك وأنت بتقوله النتيجة.. هينسى أنت في سنة كام أصلا.. #ثانوية عامة"
آلاء محمد: "أصل أنا جبت 60 بس قولت لأمي إنى جايب 70 أمى بقي راحت قالت لأبويا إنى جايب 85 أبويا بقي ميسكتش لا راح قال لأصحابه إنى جايب 95 #ثانوية عامة"
دعاء مرجان: "أنا مكنتش جبت مجموع وكنت دخلت تجارة فرنسية وريحت نفسي. فككوا من هندسة وطب والله. #ثانوية عامة"
سوما مالك: "#ثانوية عامة بجد مفيش أحقر من الناس إلى يسألوك جبت كام تقولهم الحمدلله يقولولك طب أنا عرفت ع فكرة".
باسم محمد: "ربنا مع كل واحد مش عجبو نتيجتو وأكيد ربنا شيلك حاجة تعوضك إن شالله #ثانوية عامة"
أحمد: "سماع دوى ضربات بالحزام متتالية مصحوبة ببعض ضربات الشبشب مع وجود ألفاظ +18 من الشقة اللى جنبينا وبعد السؤال تبين أن جارنا طالب #ثانوية عامة".