كلام مسئول

17/9/2010
محمد صلاح: يا مساء الخير فاكرين الراحل عبد البديع القمحاوى اللى كان بيقول ياللى اتحرمتوا من التعليم الفرصة لسه قدامكم من غيرما تدفعوا ولا مليم اذاعتنا ناوية تعلمكم الناس القدام فاكرينه طبعا كان برنامجه فى الاذاعة اسمه يا اهل بلدى مؤسسة لوحده فى مكافحة الامية الراجل الشرقاوى الطيب اعتمد طريقة لمحو الامية من طين الارض من محاصيلها وفلاحيها كان عارف جمهوره وهوجوا الاستديو فى ماسبيرو بتروح وتيجى كانه شايفين صوته قبل صورته يمكن ناس كتير ما شفهوهاش الحرب على الامية فى مصر قديمة بداها على مبارك من 150 سنة ما هو الامية مش عاوزة اى سهو او خطا ممكن بقى تزيد واحنا قاعدين نفكر فى حاجة تانية خالص هى نسبتها دلوقتى للاسف يعنى حوالى 28% يعنى علشان ساعتها هنبقى بنتكلم فى 80 مليون فى 28 على 100 يعنى 22 مليون و400 الف امى بلاش خلينا احسن نقول 28% بعد ما حصل طفرة فى تحدى الامية فى مصرفى الفترة فى الخمسينات والستينات خصوصا فى الارياف رجعت تطل براسها تانى فى التمنينات تكدس الفصول وندرة المدرسين والتسرب من التعليم فلقت نسبتها 45 زى فى الستينات اتحركت الحكومة ركزت حبة فتم انقاذ كتير من بيرالامية المظلم ونزلت النسبة ل 28,6 % الكلام دا حسب احصائيات الامم المتحدة دا معناه ان ترتيبنا ال12 على على الدول العربية عندنا خطط طبعا للنزول بالامية الى 10% لكن عايزين نسد منابع الامية المفتوحة نمنع التسرب من التعليم شوية مدارس جديدة كدا علشان التكدس وانا عارف ان مبقاش فيه حتت ارض اصلا نبنى فيها مدارس الارض كلها اتباعت واتزرعت بيوت اللى اتحرموا من التعليم قد ايه الفرصة قدامهم ؟ الحكومة ناوية تعلمهم من غيرما يدفعوا ولا مليم ولا محدش ناوى يعلمهم عن الامية هيكون لينا النهاردة كلام مسئول .
تقرير
خاضت مصر مبكرا تجارب عدة للتغلب على تزايد معدلات الامية فى البلاد اختلط فى بدايتها بمفاهيم الوطنية ومكافحة الجهل واللحاق بركب الامم المتقدمة لكن الامراخذ شكل منهجيا بانشاء الهيئة العامة لمحوالاميةوتعليم الكبار تنشط الهيئة بفروعها ال26 فى غالبية المحافظات المصرية للقضاء على الامية اوعلى الاقل لتحجيمها ومحاصراتها وذلك وسط ظروف صعبة بينما الذين تستهدفهم غيرمتفرغين للتعليم ربما ينضمون لصفوف محو الامية للحصول على شهادة لاستكمال مصوغات تعيينهم فى وظيفة متواضعة وليس للتعليم من اجل التعليم وربما يتحدث البعض عن حوافز ضرورية لجعل الكبار يقبلون على التعليم اكثر من الحوافز الادبية والمعنوية ينظر البعض الى قضية التعليم الالزامى باعتبارها ستقضى بالتدريج على الامية ويتم التسرب من التعليم الاساسى يغذى وبانتظام بحيرة الامية فى الوقت الذى لا تلقى فيها جهود محو الامية الى مستوى المشروع القومى او الشاغل للحكومة والناس فالقناعات السائدة ان تعليم الكباريحتاج الى تجسيد اللامركزية حتى يمكن اطلاق المحليات وجهود المجتمع المدنى وكذلك قرارات اخرى لعلاج الامية يبدا بمكافحة الفقروبتحقيق التنمية الشاملة وتذهب رواه اخرى الى التركيز على منح الاطفال فرص تعليمية متكافئة والارتقاء بجودة التعليم وتطويرالبرامج المدرسية فى المرحلة الابتدائية واستهداف فئة عمرية محددة من الكبار والاهتمام بالاناث ورسم خريطة للامية للتركيز على محافظات محددة لمحاصرة الامية
محمد صلاح: ساعات البعض منا بيقول نحو الامية سخرية بقى ولا احساس بعدم الجدوى ولا بالفشل او يمكن قاصدين ان اللى رايحين نحو الامية اكتر من جايين نحوالامية متهيالى المسالة اكبر من كده بكتير والمحو لازم يستمرحتى لوكان الدكتوررافت رضوان رئيس الهيئة العامة لمحوالامية هيكون لينا معاه كلام مسئول ومن كلام الدكتور رافت رضوان شهادة محوالامية اصبحت مهزلة وتباع ويفوق سعرها احيانا شهادة الدكتوراه ولذلك يجب وضع المزيد من الضوابط لمنع التلاعب, التعليم هو الاداه الوحيدة للتغييرفبدلا من ان تربى الشعب المصرى على اعطائه السمك - علينا تعليمه كيف يصطاد ؟ وقال الدكتور رضوان هناك علاقة وثيقة بين الفقر والامية ولوعالجنا ما فى المجتمع من فقرسنقضى على الامية لان الارتباط بينهما عضوى التعليم تراجع كاداه للانحراف الاجتماعى واذا كان الابن الكبير تعلم وتخرج دون ان يعمل فالطبيعى ان يقررالاب ان لا يعلم الابن الصغير قضية محوالامية وتعليم الكبار قضية باردة سياسيا فالسياسيو يتحدثون عنها فى اطارالشعارات والحملات التى لاتفيدفى حل الاشكالية لحاجاتها لنظم فنية واضحة لا لحملات من ثقافة مجتمعنا ومن امثاله القديمة ان التعليم فى الصغر كالنقش على الحجر والتعليم فى الكبر كالحفر فى الماء على واقع المثل عايزين بقى ايه ؟ نقضى على الامية كالحفرنخليها بعيد بقى شوية عن البحر بلاش نخليها على الرمل بس ندى امل مكافحة الامية ضرورة حياة الدكتوررافت رضوان رئيس هيئة الجهازالتنفيذى بالهيئة العامة لمحو الامية هيكو لينا معاه دلوقتى حالا كلام مسئول
محمد صلاح: ارحب بالدكتور رافت رضوان رئيس الجهاز التنفيذى لمحو الامية منورنا يا دكتور اهلا وسهلا
د/رافت رضوان: اهلا وسهلا
محمد صلاح: دكتور رافت واحد ما بيعرفش يفك الخط يعنى ما يعرفش الالف من كوز الدرا هو دا الامى ؟ فيه تعريف محدد للامى ؟ اللى متعلمش اللى ما بيعرفش يقرا ولا يكتب
د/رافت رضوان: هناك تعريف فى القانون وهناك تعريف دولى للامية التعريف القانونى اللى عندنا للامية ان الامى هو الشخص الذى تجاوز سن ال15 سنة ولا يجيد القراءة والكتابة
محمد صلاح: يعنى لو عنده 14 ميبقاش امى ؟
د/رافت رضوان: لو عنده 14 ما بيبقاش امى لانه دا المفروض بيبقى خاضع لقانون التعليم الاساسى ويجب ان يكون ملتحقا فى مدرسة
محمد صلاح: احنا بنتكلم عن اللى ما بيعرفش يقرا ولا يكتب وما التحقش نسميها دا اللى هيبقى امى يعنى
د/رافت رضوان: دا اللى المفروض تتدخل الدولة بسرعة تديله فرصة علشان ما يخشش فى الامية
محمد صلاح: تلحقه يعنى
د/رافت رضوان: اه طبعا المفروض يعنى
محمد صلاح: طب دلوقتى حضرتك رئيس الجهاز التنفيذى للهيئة العامة لمحو الامية ايه اللى بتقدمه ؟
د/رافت رضوان: الهيئة دى الحقيقة انشات بقانون 8 لسنة 91 وانشات بصورة يمكن تبدوغريبة بعض الشىء يعنى قبل ما احدد اسم رئيس الهيئة مشكلة محوالامية فى مصراللى بقالها مدة طويلة قوى يعنى ولما نشوف بدايات الامية نلاقينا بنتكلم من على مبارك بنتكلم من اول قانون صدر للنظر فى اجادة القراءة والكتابة كان مجلس الشيوخ وكان شرط الالتحاق اوالترشيح لمجلس الشيوخ هوان تكون تجيد القراءة والكتابة
محمد صلاح: ما كانوش بيضربوا شهادات ؟
د/رافت رضوان: لا لا خالص الحقيقة تجارب كثير بدات منذ الاربعينيات فى 44 صدرقانون صدر قانون 10 لسنة 44 اللى جرم الامية ووصل انه الامية الذى لا يلتحق بفصول محو الامية يحبس لمدة شهر والمتعلم الذى لا يعلم الامى يحبس لمدة شهر وصولا الى قيام الثورة
محمد صلاح: لوعملناه دلوقتى يبقى نص البلد هتتحبس لا اللى ما اتعلموش ولا اللى اتعلموا
د/رافت رضوان: الحقيقة الامربرضه يدعوا للاعجاب برضه ثم انشا حاجة اسمها المجلس الاعلى لمحو الامية برئاسة رئيس مجلس الوزرا وكان السياق العام هوانه مشكلة الامية مشكلة مركبة لانها بامانة مش مشكلة قراية وكتابة هى مشكلة اقتصادية مرتبطة بالفقريعنى لما تبص على حاجة غريبة عدد الاميين وعدد الفقراء فى مصر تلاقى تقريبا الرقم واحد مرتبطة بحاجات ثقافية واجتماعية عندما نجد تقريبا هديك مثال لتعليم الفتيات بالذات علشان كده تلاقى وجهة النظر هو ايه ؟ ان تكون الهيئة برئاسةالسيدرئيس مجلس الوزراء شخصيا لحد دلوقتى رئيس الهيئة هوالسيد رئيس مجلس الوزراء والمفروض انها بتضم تقريبا كل الجهات التى يجب ان تتضافر جهودها لمحو الامية
محمد صلاح: يا دكتور فيه ارقام كتير بالنسبة لعدد الاميين والاميات طبعا يعنى ارقام صادرة من جهات داخلية مصرية وارقام صادرة من جهات خارجية الرقم بالظبط انت راجل رئيس الهيئة يعنى الجهاز التنفيذى عنده الرقم كام ؟
د/رافت رضوان: انا عايز اقول حاجة الناس بتخلط بين رقم دولى ورقم على فكرة مفيش حاجة اسمها رقم دولى كل الارقام التى تصدرها المؤسسات الدولية من المؤسسات المحلية لان مفيش حد دولى بيجى يعد الاميين فى مصرهو التعداد العام بس انا هقول لحضرتك يعنى يمكن الناس بيكون عندها ثقة شوية فيه الارقام الصادرة عن مؤسسة محور زى الامم المتحدة مثلا على اساس مالهمش غرض بس الامم المتحدة لاتاخذ ارقام فى تقاريرها الا من جهات رسمية الحقيقة حالة الامية فى مصريقيسها كل 10 سنوات الجهازالمركزى للتعبئةوالاحصاءخلال التعداد اللى هو بيتم كل 10 سنوات ايه اللى بيحصل الفرق دوا انه الامم المتحدة لا تعترف الا بالتعداد فبتقعد البيانات لمدة 10 سنين ذات الرقم يعنى احنا مثلا كانت الامية من تعداد 96 تبلغ الامية 39 % فضلت النسبة دى موجودة لحد ما صدر تعداد 2006 اللى هوصدرفى 2007 فكان اى رقم بتقوله الناس تقولك الامم المتحدة 39% محدش بيقرا انه فيه علامة موجودة مع الرقم دا وموجود تحت ما يطلق عليه يعنى اشارة الى ان هذا البيان هو تعداد 96
محمد صلاح: التعداد بقى يا دكتور علشان انا هتوه فى السنين ؟
د/رافت رضوان: تعداد 2006 هو الرقم اللى هيبقى موجود فى الوثائق الرسمية خلال السنين الجاية ولمدة 10 سنين كان عدد الاميين فى مصر بيبلغ 17 مليون ونسبة الامية 29,7 % الكلام دا فى 2006 النهاردة احنا فى 2010 لواحنا بنقول نظام لحسابات الامية بنقول انه عدد الاميين فى مصر بيبلغ تقريبا 15,4مليون ونسبة الامية كلها تبلغ 29%
محمد صلاح: دكتورعلى مبارك عمل فصول محو امية من 150 سنة وبعدين عندنا كوبا قضت على الامية فى سنة وماليزيا فى 3 سنين هواحنا ليه معندناش حل للقصة دى ؟ يعنى دايما نلعب فى الرقم من 10 لى 15 % ؟
د/رافت رضوان: اقول لحضرتك حاجة ببساطة شديدة جدا الامية هى المازق الحقيقى انا لما اتوليت ملف الامية سالت هى ليه الاعداد يتزايد؟هما الاميين بيزيدوا بالانقسام ؟ لا ما بيزيدوش بالانقسام الاميين بيزيدوا نتيجة التسرب من التعليم طول ما عندك تسرب من التعليم وطل ما انت مش قادر فعلا تحقق التعليم الى الجميع التعليم الجيد مش التعليم الحالى من دون هذا هيبقى هذاالامر وجود نحو الامية عامل زى ينشف ميه والماسورة مكسورة فانت عمال تبذل جهد مخيف علاجها الحقيقى زى الطلوع على سلم نازل
محمد صلاح: الصعود الى الهاوية ؟
د/رافت رضوان: بالظبط كده لانه بالامانة لما تشوف حجم الجهد الذى يبذل فى تعليم الكثيراحنا زمان قلنا التعليم فى الصغركالنقش على الحجروالتعليم فى الكبرهومحاولة تشكيل هذاالحجرالتعليم فى الصغر اسهل اكثرانتظاما اكثر انضباطا اقل تعرضا للمشاكل
محمد صلاح: ما تقولى بقى ليه كوبا فى سنة وماليزيا فى 3 وفلسطين والبحرين قللوا واحنا لا ؟
د/رافت رضوان: شوية حاجات زى ما بقول لحضرتك كوبا لما عملت الكلام دا عملته سنة 62 كانت تجربة ثورية تجربة احنا شفنا الجانب الحول بتاعها بس ما شفناش الجانب الوحش وكلنا بنتكلم كاستروكان فى الامم المتحدة هوجم من الرئيس الامريكى فى الوقت دا كيندى وقاله انت رئيس الاميين فرجع وقرر محو الامية قفل الجامعة لمدة سنةوخرج طلبة الجامعة ومدارس الثانوى بالمشاعل واللى هى السارى الشجر دول وخرجوا الى الجبال والى المزارع يعلمون خفض الامية فى سنة واحدة اكتر من 60 % بس الحقيقة الامية مش كده
محمد صلاح: يعنى احنالو قفلنا سنة ومكتب التنسيق واللى جاب ال90% وال 95%
د/رافت رضوان: مش كده الحلول الثورية دى الكلام دا كان ايام الستينات
محمد صلاح: طب ماليزيا ؟
د/رافت رضوان: ماليزيا اعتمدت برضه على برنامج يوم من اجل ماليزيا
محمد صلاح: تخيل بقى يوم من اجل مصر ما احنا عاملين نتغنى بمصر ومصر هى امى والحاجات اللطيفة دى طب ما نعمل يوم من اجل الامية
د/رافت رضوان: بامانة كده عايز اقول لحضرتك اول حاجة الواحد لما مسك الملف دا كان مليان مشاكل كانت المشاكل هى عدم وجود امكانيات يعنى مقدار مايخصص لمحو الامية يصل تقريبا الى 150 مليون
محمد صلاح: 150 مليون فى الايه؟
د/رافت رضوان: فى السنة
محمد صلاح: الحكومة بتدفعهم يعنى ؟
د/رافت رضوان: اه فى كل العالم النسبة تصل الى 6% من حجم ميزانية التعليم حجم ميزانية التعليم السنادى 50 مليارلو ضربت 6% فى 50 مليار المفروض ان انت توصل لى 300 مليون انت بتعمل تقريبا نص الرقم فعامل زى الواحد بتدى جرعة مخففة الجرعة المخففة ليها اثرسلبى باستمرار مثال لما يبقى عندك عيان بياخد مضاد حيوى بياخد 100 جرام فلا تخف ولا تحافظ على فلوسك بامانة الامر كذلك هل هناك طاقات فى المجتمع ده يمكن توظيفها ؟وكانت وجهة نظرى هى الاتى عندنا فى التعليم الجامعى 3 مليون طالب وطالبة 3 مليون طالب وطالبة دول لو كل واحد محى امية واحد فى السنة تخلص الامية فى 4 سنوات
محمد صلاح: الافكارالجميلة وردية جميلة وحلوة بس المهم تنفيذها
د/رافت رضوان: بالظبط كده وتقدمت بالفعل بمشروع اسمه "كل واحد يعلم واح"د كان النموذج واضح تماما النموذج بيقول ايه التعليم الجامعى مليان وانت لا تستطيع حتى ان تكلف شخص خلال الاجازة الصيفية انه هويستغل ال3 شهور الميتين دول اللى احنا بنشكوا من ولادنا
محمد صلاح: بيقعدوا فى النت كافيه والقهاوى والكلام دا يعنى ؟
د/رافت رضوان: دا دول كمان فى النت كافيه لكن خلينا فى الصعيد وخلينا اتكلم فى الحتت دى لا بيبقى فيه نت كافيه
محمد صلاح: فيه قهاوى ؟
د/رافت رضوان: حتى القهاوى مكلفة يعنى علينا برضه انه احنا نخرج بره ونقول اذا كانت نسبة الاسراو نسبة الفقراء الذين يعيشون يبلغ عددهم 16 مليون احنا بنتكلم فى الصعيد ضعف هذه القيمة والامية مركزة
محمد صلاح: قدمت المشروع حصله ايه بقى ؟
د/رافت رضوان: المشروع وافقوا عليه ثم انتهينا الى لجان ومن لجان الى لجان واللجان الى لجان وبامانة نحن امام هذا التحدى لدينا 3 مليون طالب بيقضوا 3 شهورفى الصيف من غيرمجهود دا يساوى 9 مليون تقدر توظفهم المجتمع دا لما كان عنده ازمة سياسية فرض التربية العسكرية فى الجامعات
محمد صلاح: طب انت مش بتكلم ليه ؟
د/رافت رضوان: انا لا اتوقف فى الحديث عن هذا الامر يعنى بامانة ايضا علينا ان نعرف
محمد صلاح: رئيس الهيئة رئيس الوزرا والمصلحة داخل المشروع اللى اتقدم واتوافق المفروض عليه واللجان دى انه فيه وزارات اخرى بتنفذه وزارة التعليم وجهات اخرى برضه رئيس الوزار فوق الكلام ده
د/رافت رضوان: المفروض ان هذ الامر هو كده ان احنا بجدوكانت فكرة انشاء الهيئة وان يكون رئيسها هورئيس مجلس الوزراء هو كدا ان انت تديها الزخم والقوة التى يمكنها من انها تفرض على ما هو متاح من هذا الكلام المشكلة بقى بتكمن فى بيروقراطية الصغار بيروقراطية الصغارهى قاتلة كل الافكار الجميلة فى هذا المجتمع لانه بيطلع واحد يقولك لا لا ازاى نعمل مش عارف ايه ؟ تخش فى التفاصيل والشيطان بيدخل فى التفاصيل بامانة ما نحن بصدده السيد رئيس مجلس الوزراء وافق فورا واصدر تعليماته بهذا الصدد واصدرالامر بانه يتم اتخاذ هذا الامرمن خلال يا اما المجلس الاعلى للجامعات يا اما يصدر فى صورة قانون
محمد صلاح: اصل بتوع المجلس عندهم مشاكل التعليم والثانوية العامة والمجاميع
د/رافت رضوان:اقترحنا حتى مشروع تانى 5 مليون موظف فى الجهاز الادارى تصوربنقول انه نسبة كبيرة منهم ما بتشتغلش 10%من هذا العدد يساوى نص مليون اديهم اجازة بمرتب بمكافاتهم بحوافزهم وقعدهم فى بيوتهم وقول لواحد كل المطلوب منهم طول السنة تعلم 10 يعمل 5 مليون فى السنة
محمد صلاح: الموضوع بتاع الخدمة الاجتماعية اللى هو ماينفعش يتعين الى لما يكون ادى الخدمة السكرية وجزء منها الخدمة العامة
د/رافت رضوان: طبعا مفيش تعينات الان فلم تعد هناك خدمة عامة احنا بيخرج من الجامعات سنويا من 250 الف الى 300الف اللى بيتقدم للخدمة العامة 40 الف معظمهم وظائف مرتبطة بالتعليم علشان هما اللى هيبقو مدرسين
محمد صلاح: طب يا دكتور تقنيا المسالة ماشية باى شكل
د/رافت رضوان: لا طبعا كل التقدير والحب والرحمة على الاستاذ عبد البديع قمحاوى كان رائدا من الرواد
محمد صلاح: يعنى انا كنت فى الجامعة بس كنت بسمعه
د/رافت رضوان: ورقة وقلم ومرايا وبراية وياريت تخلى بالكم معايا ياللى اتحرمتوا من التعليم الفرصة لسه قدامكم كان نداءا من القلب وكان ممزوجا بالحماس ومملوء بالحيوية وانا شرفت بان انا التقى بيه قبل ان يتوفاه الله
محمد صلاح: الله يرحمه كان راجل جميل
د/رافت رضوان: لانه مدرسة مدرسة حقيقية
محمد صلاح: احنا ماشين فى اى مدرسة دلوقتى ؟
د/رافت رضوان: المجتمع اتغيرمن ساعة ما فتحنا على البترو دولارات اصبح اساس المجتمع المصرى عايزتطلع لفوق سافرالخليج هات فلوس كان الاول الخليج دلوقتى مش مهم تجيبها منين ؟
محمد صلاح: ما علشان الخليج معدش يستوعب الاعداد دى
د/رافت رضوان: ولوانت استاذ حمدى وراكب عربية يعنى سيات ومعلم مش عارف ايه ما بيعرفش يقرا ويكتب المجتمع سيقف ويضرب تعظيم سلام للى راكب مرسيدس واستاذ الجامعة يقولوا استنى شوية خليك على جنب التغير الاجتماعى دا خلى موضوع التعليم يعنى انا واحد من الناس اللى كانه فى الفصول بيسالنى سؤال فى مرة من المرات بيقول ايه بقوله يا حاج حتى لو انت متعلمتش مضيعش مستقبله قاللى اعلمه ليه ؟ ما اخواته الاتنين خدوا دبلومات وقاعدين فى البيت بطالة المتعلمين بتنعكس سلبا على هذا الكلام فبقى عندنا تراجع دور التعليم بطالة المتعلمين كل دا خلانا نقاتل فى قضية زى ما بقول لحضرتك عكس التيار وهو انه انت لازم حاجة جاذبة الحاجة الجاذبة دى هى اللى بتعلم الناس مهارات حقيقية انك لو عايز تعلمه القراية والكتابة على مهله من خلال حاجة اخرى زى ما ابنك ما بيحبش الدوا فتديله الدوا بحاجة معسلة بحاجة حلو بدانا الحقيقة يبقى عندنا برنامج صحى يبقى بنتكلم على ايه ؟ بدل ما كنا بنقول كاف كورة او كاف كلب بقينا بنقول كاف كبد وبنتكلم على التهاب الكبد الوبائى
محمد صلاح: ايوه بتجذبه ازاى ؟ ازاى تجذب الامى اوالامية علشان يتعلم اصلا ؟
د/رافت رضوان: الحاجة الاولانية انت مازالت بتعتمد على العامل الاساسى فى المجتمع المصرى وقوةالعلاقات الانسانية والعلاقات الشخصية والعلاقات الاسرية احنا عندنا المدرس وهو عماد العملية التعليمية مدرس محو الامية دا هو شخص تعلم سواء حصل على دبلوم او على مؤهل عالى ولم يجد فرصة عمل وبيدور على حاجة يزود بيها دخله فبيجى يدرب معانا على برامج محو امية ثم يبدا يطبقها بس بيعمل ايه دا بقى ودا اللى بيخبط على البيوت ودا اللى بيلف على البيوت ويقعد يقنعه بيعمل كل حاجة وفى الاخر على فكرة مستوى دخله
محمد صلاح: بياخد كام ؟
د/رافت رضوان: بياخد للاسف من 80 جنيه ل 100 جنيه
محمد صلاح: من 80 لى 100 جنيه دكتور خليك معانا
فاصل
محمد صلاح: المدرس بياخد من 80 لى 100 جنيه فى محو الامية دا بعد كده عايز يتمحى فقره اصلا بقولك ايه يا دكتور معانا دكتور من اهالينا يعنى اللى خاضعوا لتجربة محو الامية هنتفرج عليه نشوف الناس اللى محو اميتهم وقاعدين مع مدرس بياخد 80 جنيه
تقرير
مواطن: محو الامية حلو يعنى مش وحش يعنى
مواطنة: الميعاد بتاع الساعة 5 دا كويس جدا بيكون الواحد خلص المسئوليات اللى وراه وجه من 5 لى 8 دا كويس جدا
مواطنة: يعنى جوزى بس مش عايزنى اتعلم وخلاص فمحاولة يعنى ان شاء الله ربنا يهدى
مواطنة: يمكن فى الاول صعب شوية بس انا كنت متعلمة قبل كده فافتكرت كنت ناسية وافتكرت وهكمل ان شاء الله
محمد صلاح: الست عايز تروح وجوزها هو فيه مشاكل عائلية ممكن تؤدى الى كده يعنى ؟ يعنى الست عايزة تتعلم والراجل رافض اكيد مش العكس الراجل عايز يتعلم والست هترفض ليه
د/رافت رضوان: الحقيقة دى مشكلة بنعانى منها لانه لما بنبص للامية فى مصر هى امية ريفية يعنى على ال17 مليون اللى احنا اتكلمنا عنهم فى بداية 2006 11 مليون سيدة فالسيدات تمثل 60% وفى الريف النسبة تلتين كمان علشان كده الظروف الثقافية بجد دا واحد من التحديات اتللى احنا بنواجها وعلشان كده بنغير المفهوم احنا بنعمل ما نطلق عليه الفصل فى العيلة
محمد صلاح: فصل ما بين الجوزين يعنى ؟
د/رافت رضوان: فصل محو الامية انت بتعمل حاجة قريبة قوى من الهوم دليفرى احنا بنعتمد دلوقتى على ما يطلق عليه الروابط السريعة وعملنا تجربة يمكن فى الاسماعيلية تبدوا غريبة من شوية اخترنا من كل 5 عائلات بنت واخدة دبلوم ولا حاجة قلنا للبنت دى تخدم عيلتها ليس فقط فى محوالامية لكن فى محو الامية وفى الصحة الانجابية وفى المشاكل البيئية فى كل الحاجات المرتبطة بهذا الكلام بقى هنا مفهوم الخدمة مبقاش انى انا بمحو امية مفهوم الخدمة بقى انه انا بخدم عيلتى بخدم خالتى بنت خالتى عمتى بنت عمتى والتجربة دى تجربة من التجارب المرشحة لجائزة العالم فى اليونسكو السنة دى لانك انت بتلعب على القيمة الثقافية اللى موجودة فى المجتمع واحنا بنحاول لانه محو الامية مش هيتم بالاساليب التقليدية مش هيتم بالموارد المادية الضئيلة دية
محمد صلاح: اخبار المجتمع المدنى ايه ؟ والاحزاب والكلام دا يعنى الناس دى بدى دور؟ لانها واحدة من اهم القضايا يعنى وممكن تحل مشاكل كتيرلو الناس اتعلمت بجد يعنى
د/رافت رضوان: نقول حاجتين الحقيقةالمجتمع المدنى مقسم الى تقسيمات واضحة فيه جمعيات اهلية وبامانة لدينا دورمتزايد ومتصاعد للجمعيات الاهلية وانا يعنى بستغل هذا البرنامج لاتوجه لهم بالشكر لانه فعلا لدينا جمعيات اهلية الان نستطيع ان نفاخربها على مستوى العالم لدينا تجربة فى الجيزة شاركت فيها جمعيات اهلية قوية وقادرة ماليا جمعيات اهلية قادرة علميا وجمعيات اهلية قريبة من الناس بانينا منظومة ادرس توصل للناس لانه ايه اللى بيجيب محوالامية عاوزمعونة مالية طب الدولة لا تستطيع ان تدفع معونة مالية جبنا الجمعيات الكبيرة والقادرة ماليا وقلنلها ما ترعى الفصول دى تبقى رعاية وشلنا حكاية كانت زمان الجمعيات دى بتفتح فصل بس الفصل بتاعها فصل درجة اولى لدرجة فصل زى اللى احنا شوفناه دلوقتى نلاقى كراسى كويسة لكن الفصول الحقيقية هى مش بالصورة اللى احنا شوفناها فقلنا لجمعيات الكبيرة دى انتى لما بتفتحى فصل بتعملى جذب الناس بتسيب الفصول التانية وتحاول تدخل الفصل ده ققلنالها انتى جمعية كبيرة ارعى المنطقة وتبقى كل الفصول الى موجودة فى هذه المنطقة تحت رعايتك لدينا جمعية فى الجيزة بترعى 3 احياء جمعية اخرى بترعى حى جمعية اخرى عندنا تقريبا ال8 احياء بتوع الجيزة تحت رعاية جمعيات طب الجمعيات دى قادرلاة ماليا لكن محو الامية كمان عملية فنية فيه عندنا جمعيات فيها اساتذة جامعة ومتخصصين فبدانا ناخد هذه الجمعيات اللى هى قادرة تقدم المساهمة والدعم الفنى وخدناها وقلنا دى تبقى الجمعية الداعمة ثم فيه بقى الجمعيات الصغيرة اللى هى قريبة من الناس اللى هى موجودة فى اقصى المنطقة وقريبة جدا من الناس وقادرة انها تحرك الناس فيه جمعية محتاجة لدعم مادى يعنى احنا كهيئة بطلنا حكاية ان احنا نشغل مدرس ب 80 جنيه ورحت للجمعية وقلتلها ايه ؟ اعملى فصل وانا هتعاقد معاكى على الفصل بالكامل انتى تجيبى المدرس وبتجيبى المشرف وبتجيبى كل حاجة ويبقى التعاقد حزمة على بعضها ال143 جنيه اللى احنا كنا بنتكلم عليها قللنلها يا جمعية خوديهم الحمد الله ان احنا ما وصلناش بقينا بنتكلم على 215 جنيه
محمد صلاح: اووه دا العملية فتحت بقى كدا
د/رافت رضوان: يعنى قياسا على كل ما تم توفيره التجربة فى الجيزة اثبتت ان المجتمع المدنى قادر على انه يلعب دورالجانب الاخراللى هوالاحزاب والنقابات والاتحادات بامانة دورهم بيغلب عليه دور الشوبزنس عن جانب ان انت بتعمل حاجة يعنى عايزيتصور جنب محوالامية يقوم فاتح فصل علشان يقول احنا بقلنا دور فى محو الامية
محمد صلاح: مشيوا المصورين قفلوا الفصل
د/رافت رضوان: لابيخليه شوية كدا لتصويرات اخرى لكن انا ما زال الدوربيحتاج الى لانه محو الامية زى ما قلت وانا باشير الى هذا الكلام الناس بتقول ايه ؟ هيئة محوالامية ما عملتش حاجة الناس مش قادرة تفهم انه هيئة محو الامية مش دورها محوالامية هيئة محوالامية هى جهة التخطيط والتطبيق والتقييم والمتابعة
محمد صلاح: فيه اجهزة اخرى وجهات اخرى ووزارات اخرى ومحدش بيعمل حاجة
د/رافت رضوان: كل المجتمع افاجا بواحد يقولى هيئة محو الامية ماشى واحد مش عارف يقولك نكبرالهيئة لو كبرنا الهيئة الاذى سيغير هو حركة المجتمع الحقيقية والمنفذين الفعليين يعنى الراجل او الست اللى انت عايزتمحى اميتها بتقوله ايه المميزات يعنى لازم هو بنفسه يحقق فايدة لنفسه انا عايز اقول لحضرتك على حاجة اى حوادث سلبية عندما لا يكون لديك نظام قوى جدا لمتابعتها وتنفيذها بتنقلب الى ماساه يعنى ايه ؟. يعنى نيجى دلوقتى نقول ايه شرط استخراج رخصة القيادة هو انه يكون حاصل على شهادة محو الامية مجموعة حاجات الحاجة الاولانية هى انت بتمتحنوا فى ورق وبتمتحنوا فى اشارات وبتمتحنوا فى كل حاجة طب ما هو قدامك اصل الامية حالة يعنى انا برجوا السادة المشاهدين انا بخش فى حاجات فنية شوية
محمد صلاح: ادخل يا دكتور ادخل براحتك
د/رافت رضوان: لكن حضرتك انا اتعلمت فرنساوى 3 سنين فى ثانوى وكنت جايب نمرة عالية جدا فى الثانوية العامة الجملة الوحيدة اللى فاكرها منه انا لا اتحدث الفرنسية
محمد صلاح: ليه فين جومابل امينة والحاجات دى ؟
د/رافت رضوان: جو ن بارل فرنسيه هى دى الجملة الوحيدة معظم الناس اللى اتعلمت اتعلمت انجليزى لمدة 6 سنين فاكره منه ايه فيه حاجة اسمها الارتداد للامية اى امتحان واى شهادة دالة على مستوى الشخص فى لحظة الامتحان فى الامتحان ده فقط لا غير يعنى انا ممكن اخش الثانوية العامة وانجح ب 50 % فى الامتحان لو كان الامتحان اصعب شوية كان ممكن اسقط
محمد صلاح: هو دا اللى انا ذاكرته هو دا اللى انا عارفه
د/رافت رضوان: بالظبط كده انما بعد الامتحان دا باسبوع انا ممكن اسقط انا هفترض الحالة السليمة اللى هى مفيهاش الكلام اللى انت قلت عليه اللى هو ضرب الشهادات وكل الكلام دا انا بتكلم فى الحالة السليمة الامى يرتد للامية عند مستويات التعلم الدنيا فى خلال 6 اشهر بنسبة 32 %
محمد صلاح: ما يرتداش ازاى يا دكتور تتابعه ولا تعمل ايه ؟
د/رافت رضوان: نتابعه ودا عبء اضافى يعنى تخيل حضرتك مطلوب مننا 3 حاجات مطلوب مننا نسد المنبع اللى هوالتسرب من التعليم اللى هو الماسورة المفتوحة اللى عمالة تضخ مئات الالاف من الاميين سنويا مطلوب ان احنا نمحو امية العدد بتاع ال17 مليون مطلوب نحافظ على استمرارية تعلمهم مرحلة ما بعد الامية لك ان تتصور انه كل الكلام دا مطلوب
محمد صلاح: ما هو اللى بيرتد اصلا كل حاجة غلط كان بيعملها وكان شايف انها غلط بيرجع يعملها عادى وهو فرحان ومبسوط
د/رافت رضوان: علشان كده فى شهادات محو الامية وانا كنت ضد فكرة ان تكون هناك حوافز سلبية الحوافز يجب ان تكون حوافز ايجابية بمعنى نجاح تجربة المكسيك وتجربة تشيلى والدول اللاتينية الحقيقة يعتبر ما يطلق عليه العقد الاجتماعى المهم بمعنى ايه ؟ الدعم بمعنى ايه انا بدى كيلو سكر وكيلو زيت قلت ايه ؟ اللى هيمحو اميته فى خلال سنة هيزيد الدعم بتاعه من كيلو سكر الى 2 كيلو سكر من كيلو زيت الى 2 كيلو زيت اللى هيمحو خلال سنتين هيزيد لكيلو ونص اللى مش هيمحوا بعد 4 سنين هنشيل عليه الدعم فبدات تعمل ما يطلق عليه المسئولية الاجتماعية ان انت تكافىء اذا بذلت الجهد لكن المجتمع يجب ان يكون حريصا على فكرة بقى ايه
محمد صلاح: دا موضوع العيش واخد موال بقاله 70 سنة
د/رافت رضوان: يعنى الحقيقة احنا نهينا الموضوع ومع المرور دلوقتى بنقولهم ايه ؟ ارجوكم ما تعتدش بشهادات محو الامية اعمل امتحان احنا فى امريكا لما امتحنا سواقة على فكرة كنا بنعمل تحاليل ما تمتحنه بدل ما تقوله الاشارات الاشارة دى ايه ؟ والاشارة دى ايه ؟ ما تكبهاله فى ورقة ويكتب اسمه مش محتاج تقوله هات شهادة ومتجبش شهادة لان فيه ناس حاصلة على شهادات زى ما احنا عارفين ولا يجيد القراءة والكتابة شوف بقى اسم الهيئة هيئة محوالامية وتعليم الكبارالعالم كله اللى تخلص من محوالامية ابقى على هيئة تعليم الكبارلان المجتمع يجب ان يديرعملية تعليم الكباردية للارتقاء بالمهارات الثقافية والفنية المرتبطة بتحديات التنمية يعنى هقول لحضرتك على حاجة انا خلصت كادر التعليم وانا عندى 23 سنة من 23 لى 60 مفيش حد بيرعانى تعليميا مفيش حد بيقولى انت اتعلمت ايه ؟
محمد صلاح: يا تعلم نفسك يا محدش هيعلمك
د/رافت رضوان: فى العالم الحقيقة هيئات تعليم الكبارالست اللى عندنا اتعلمت وقعدت فى البيت وربت ولادها وفجأة ولادها كبروا وبقى عندها 45 ، 50 سنة وما وراهاش حاجة فى البيت عايزة تكتسب مهارات حياتية جديدة مين اللى يعلمها ؟ ومين اللى يديرهذا الكلام المجتمع الحقيقة بيربى هذا الفكرفى العالم المتقدم هيئة تعليم الكبار فى اليابان ميزانيتها 12 مليار
محمد صلاح:12 مليار احنا عندنا المدرس من 80 لى 100
د/رافت رضوان: من 80 لى 100 ويمكن اقل شوية فبامانة امرمحوالامية هو انا كنت فى مؤتمر لسه فى نيجيريا الاسبوع اللى فات وكان فيه اميرة هولندا هى بتقول ان احنا اكتشفنا فجاة ان نسبة الامية فى هولندا وصلت لى 12% فى دولة من الدول المتقدمة جدا المعيار والمقياس مختلف احنا قياسنا كمان مرن شويتين تلاتة المؤشرات بتاعته تحتاج الى مراجعة مستمرة لانه عندما يكون المقياس مرت زى بتاع الثانوية العامة يجيب 100% ويخش الجامعة ويسقط فى اول سنة الحالة دى هى حالة عامة للمجتمع هيئة محو الامية مش غريبة عنها كل هذاالامربيقول انه محتاجين لمزيد من التكاتف محتاجين المزيد من ان المجتمع يعلم ان التحدى الاول الذى نعيشه هوتحدى التعليم شوف الرقى فى المجتمع بنتكلم عن مادة لكن رقى المجتمع كله بين المجتمعات الاخرى احنا فى عصرالمعلومات والمعرفة فى عصر القوة الاساسية بتاعته هى القوة الرقية واللينة مصرطول عمرها قوتها كانت فى القوة الناعمة مصر عمرها ما كانت غنية إلا بناسها إلا بفكرها إلا باسهامتها الفكرية والثقافية هذا الامر لما تبقى فيه نسبة امية سواء كانت 30 حسب تعداد 2006 او 25 زى انا ما بقول احنا بنتكلم عن ربع المجتمع الى ربع المجتمع المصرى خارج نطاق الخدمة هذا تحدى خطير لكل الكلام اللى احنا بنتكلم عليه عن الموقف والمكانة والوزن والثقل لان ثقلك فى الاخر هو بوزن ما تقدمه فى الاخر للعالم على الحضارة الانسانية
محمدصلاح: معانا تقرير جدا مما بعض اللى اتكلموا عن العوائق اللى خلتهم ما تعلموش يعنى الوضوع صعب يعنى نشوف وبعدين نتكلم
تقرير
مواطن: ماكنش فيه فرصة انى اتعلم اتجهت للشغل علشان خاطر العيال وكده بس ما كنش فيه فرصة علشان اتعلم اشتغلت علشان اشوف ورايا ايه
مواطن: والدى كان راجل كبير ومكملتش تعليمى وكنت بصرف على البيت من صغرى
مواطن: كنت عايزاشتغل علشان ابويا فقيروعاوز اكون نفسى
مواطن: انا جيت اشتغل فى مصرعلشان اجيب مصاريف لبس المدرسة وكده يعنى انا ابويا فقير على قد حاله
محمد صلاح: الكبير بيقولك وانا هشتغل ولا هتعلم يعنى والصغيراللى عايز يساعد ابوه واللى عايز يكون نفسه بتشوفوا الكلام دا ازاى؟ دا انت عايز اولا تعالج اوضاع اقتصادية واوضاع اجتماعية وبعدين بتعالج العقول والمفاهيم والافكارولا ايه مش كده ؟
د/رافت رضوان: بالظبط كده شوف حضرتك انه الكلمة التى تكررت بين الجميع هى كلمة الفقر والدى فقير مش لاقى يعنى الكلمة الاكيدة ودا التجاوز الخطير بين الامية والفقر
محمد صلاح: ما هو اصل هتبقى البيضة ولا الفرخة يعنى هل بالمستوى دا هنعالج والراجل المدرس بياخد 80 جنيه ؟
د/رافت رضوان: عايز اقولك تانى برضه مرة تانية حاجتين اولا هى لاالبيضة ولا الفرخة كان لازم يبقى فرخة وديك
محمد صلاح: المشكلة معندناش ديك بقى ؟
د/رافت رضوان: القضية واضحة القضية واضحة محاربة الفقر بفكرة محاربة الفقر لا تؤدى الا الى زيادة الافكارالمثل الصينى الذى قيل اعطيه سمكة ولكن علمه كيف يصطاد منذ الالاف السنين
محمد صلاح: يعنى فيه ناس بتعمل كده بس فيه ناس برضه بتعمل كده بنحاول نعلمها نصطاد مفيش فايدة
د/رافت رضوان: بالظبط كده محتاجين نعمل حاجتين اسمها نتص السمكة ونص الصيد هو دوا النموذج التنموى الجديد لانه برضه اللى بطنه فاضية مش هيشوف الصنارة وهى بتغمز ولا هيسمع حاجة علشان كده لازم نتكاتف فى استراتيجية مكافحة الفقرمع استراتيجية مكافحة الامية لان كل الدراسات ايضا اثبتت يعنى وجود علاقة مضطردة بمستوى الدخل ومستوى التعليم صحيح فى حالات فى الاميين بتصل الى دخل كبير لكن العام هو ايه ؟ انه كل ما ارتقى مستوى تعليمك على المدى الطويل مستوى دخلك مرتبط باسرتك الحالات اللى احنا شوفناها دى يعنى التعامل معاها الحقيقة لازم يبتدى من بدرى واحنا بدانا الحقيقة حملات هى حملات طرق الابواب بنقول فيها كلكم راعى وكلكم مسئول عن راعيته يعنى ايه ترعى ولادك هل ترعى ولادك ان انت تجيبلهم اكل وبس ؟ ولا الرعاية الحقيقية بجد انك انت تعلمهم عملنا حملة علم ولادك
محمد صلاح: المشكلة ان الاب مش متعلم او متعلم وامى ثقافيا يعنى
د/رافت رضوان: خلى بال حضرتك الاجيال القديمة كان ايه المصدر بتاعها ؟ كانه الاب والام ما بيبقوش متعلمين بس بيقاتلوا
محمدصلاح:ما كنش فيه بقى اللى سافروا ورجعوا وجابوا فلوس وريحوا دمغاهم ما كنش فيه موقف ان المادة هى اللى تحكم الامور كان فيه ضمير وكان فيه اخلاق وكان فيه عدم متاجرة بالدين فيه حاجات كتير جدا اختلفت بقى
د/رافت رضوان:طب تعال شوف بعد 10 سنين الدنيا شكلها ايه؟ وبناخد حاجات من القرية دى وبنتكلم عليها فلان سافرالخليج وقعد 5 ، 6 سنين ورجع بالشيىء الفلانى وبنى البيت بالطوب الاحمر ثم بعد كده خلصت الشغلانة فلانة دا اتعلم وكمل فين بعد 10 سنين ؟ فين بعد 15 سنة ؟ القضية انه انت محتاج للنماذج البنائية دى الناس بتقتنع المهم الحقيقى ان انت تعمل سلعة على مزاج الشارى يعنى الراجل اللى بيتكلم على انه معندهوش وقت ده لازم انا ابقى زكى بما فيه الكفاية انا بقول الكلام دا اهم طبق شوربة فى فرنسا هو شوربة الضفادع انت لو فتحت محل شوربة ضفادع فى قرية مصرية هتضرب بالشباشب يبقى لازم اعمل محل فول وطعمية لوانا فى مصرمنخضش التجربة كده علشان كده لازم نعمل برامج مختلفة لازم الافكارالابداعية هنا تبقى موجودة لازم تشوف طرق واساليب مختلفة انا فى المنيا لما رحت وقعدت مع السيدات فى الفصول دية واحدة ست قالتلى احنا مش عاوزين نتعلم احنا جايبينا هنا غصب عنا علشان نقابلك
محمد صلاح:اه وبيقولواان هما هيتعلموا قدامك بس
د/رافت رضوان: يحرق التعليم وسنينه انا جاى اخدمك قوليلى اخدمك ازاى ؟ انا هكتب وراكى واللى هتقوليه هحاول اعمله بناء الثقة هنا مهم جدا الست قالتلى احنا عايزين حد يشوف صحتنا كان فى الوقت ده كان فيه انفلونزا الطيورعايزين حد يكشف على طيورنا بس مش الدكتور البيطرى بتاعنا عايزين حد يحللنا مشاكلنا مع الوحدة المحلية
محمد صلاح:مشاكل حياتية يوميه
د/رافت رضوان: قلتلها خلاص يا حاجة اللى انا طالب من حضرتك تيجوا بس ومتخشوش الفصل الدكتور هيجلهم مرة ومرتين الدكتورالبيطرى هيجلكم مرة فى الاسبوع حد يفهمنا دينا هيجلكم واعظ دينى عملنا حاجة اسمها نادى الكباربدل قاعدة الترعة زمان واهميتها كانت كدور بدات الست تيجى بقى مطلوب انه الدكتور يكشف عليها بدل ما كانت بتروحله وبيعاملها معاملة مش عارف ايه الدكتور البيطرى بقى بيقلهم اعمله ايه ويديهم ورقة الواعظ الدينى قعد يتصل بي كان طلبى منه انه متقلهمش حاجة من عندك جاوب على اسئلتهم اسئلتهم كلها عن العفاريت الراجل بيقولى عمالين يتكلموا عن العفاريت اقوله معلش ما هى دى الحاجة اللى خايفين منها علشان خاطرى شيل الوهم منهم
محمد صلاح: ايه علاقة العفاريت بمحو الامية ؟ هو اللى بيتعلم بيجيلوا عفريت ولا ايه يعنى ؟
د/رافت رضوان: انت عارف انتشارثقافة العفاريت بين الاميين عالية قوى قوى قوى وللاسف كمان بينا المتعلمين يعنى احنا عندنا فى المنيا قضية الربط دى على سبيل المثال واحدة من القضايا الشائكة حتى الحاصلين على الدكتوراه رحت بعد حوالى 6 اشهرلقيت الست قاعدة فى الفصل اللى هى الزعيمة الكبيرة دى فبقول لها انت ايه اللى دخلك الفصل ؟ قالتلى يبقى احنا معندناش اصل بقى انت تعملنا اللى انت قلتلنا عليه واحنا منعملكش اللى انت عاوزه ؟ قلتلها يا حاجة اذا ما كنتيش انتى عايزة بلاش تخشى الفصل الست دى النهارده اصبحت تمثل بالنسبة لى كانها قيادة طبيعية
محمد صلاح: يعنى حتى كاعتراف بالجميل يعنى
د/رافت رضوان: اهى دى قيم المجتمع اللى انت يجب تبنى عليها ولازم تشتغل فى التحليل المجتمعى علشان واحنتا بنعمل فى اسماعيليه لما قلنا البنت تخدم اسرتها لما البنت خدت حد من اسرتها وراحت بيها الوحدة الصحية بقت بطلة فى الاسرة بتاعتها لما ذكرت لولد من الولاد الضعاف فى المدرسة واتحسن مستواه شوية ووفرت الدرس الخصوصى الاسرة بدات تنظر اليها فانت بتعمل تمكين لبنت لانها فى نفس الوقت بتبنى شخصيتها وبتبنى قيادات طبيعية وقيادات شعبية
محمد صلاح: دكتور فيه نقطة كده فنية غريبة شوية يعنى فى موضوع محو الامية دا انه دلوقتى عندنا فى التعليم الاساسى انه منفيش طفل بيدخل المدرسة بعد 6 سنين خلاص ما بيخشش المدرسة يعنى فى محو الامية ما يقدرش يدخل قبل 14 سنة 15 سنة من 9 لى 15 يروح فين ؟
د/رافت رضوان: دا اللى بيسمى تعليم غيرنظامى بمعنى انت متقدرش تدخل حد عندوا 11 او 12 الاو 13 سنة فى اولى ابتدائى وفى نفس الوقت متقدرش القانون المصرى قال انه التعليم الاساسى حق المواطن وهو واجب عليه ولى الامر اللى ميوديش ابنه لحد 154 سنة المفروض انه بيعاقب قانونا فكان لازم تخترع نوع مختلف من التعليم اسمه التعليم الغيرمنتظم فى 3 او4 انه من المدارس مدارس اسمها صديقة الفتيات ودى بتقبل فتيات لحد سن 18 ودى الحقيقة مبادرة من السيدة الفاضلة سوزان مبارك علشان تضع فى اغتبارها العوامل الاساسية فى تعليم الاناث بالاخص فى الصعيد ثما فيه حاجة اسمها مدارس المجتمع ثم فيه حاجة اسمها مدارس الفصل الواحد ثم فيه حاجة اسمها المدارس الغيرتقليدية والمدرسة الغيرنمطية اللى هى بتتعمل فى بعض الاحيان لاطفال الشوارع والعاملين فى الورش دى بتقبل لحد سن 18 سنة ولا تقف والنظام بتاعها مرن شوية يعنى مش المفروض انه الواحد يروح كل يوم زى المدرسة النظامية علشان كده احنا بنسميه تعليم غيرنظامى النموذج ده موجود لينا فى اكثر من 3 تلاف مدرسة النموذج ده احنا بنستهدف انه يوصل ل54 الف مدرسة عايزين فى كل نجع مش فى كل قرية فيه عندنا مدرسة على مستوى القرية بس فيه النجوع والكفور عايزين فى كل نجع وفى كل كفر يبقى فيه وحدة تعليمية
محمد صلاح: نا احنا كلنا عاوزين يا دكتور فى اطار الصورة اللى احنا عارضناها دى فى امل نبقى زى كوبا من غيرعافية يعنى ؟ فى امل نبقى زى ماليزيا من غيراثاراجتماعية يعنى ؟ اللى هما بتوع السنة والسنتين وكده يعنى يعنى فى امل خلال 10 سنين كده تتمحى امية الناس ؟
د/رافت رضوان: اولا لو بطلنا نحلم نموت دا مبدا
محمد صلاح: ما احتا ممكن نفضل عايشين بنحلم وبس
د/رافت رضوان: دا واحد اتنين انه قضية محو الامية قضية صعبة ولكن للحل بامانة
محمد صلاح: فى ظل الصورة اللى احنا فيها دى خلال ال10 سنين هيبقى وضعنا ايه ؟
د/رافت رضوان: خلى بال حضرتك اذا كان هناك ارادة فهناك طريقة بالانجليزى بيقولوها كده اذا كان هناك ارادة نستطيع الشعب ده انتقل من افظع هزيمة يمكن ان تلقاها امة فى هزيمة 67 الى اعظم انتصار فى 73 فى مدى زمنى قد ايه حضرتك ؟ 6 سنوات مجبناش شعب من بره مجبناش حد من بره لكن بنيت على القوة الذاتية وكان هناك ارادة الارادة تصنع المستحيل
محمد صلاح: الارادة تصنع المستحيل عايزين بقى ارادة وبعد كده هنلاقى طرق نقدر نحقق بيها كل اللى بنتمناه من بين اللى احنا بنتمناه ان احنا نمحى امية انفسنا اهالينا وناسنا وقريبنا وعقولنا وثقافتنا وتعليمنا نبقى متعلمين ومثقفين وقال رئيس الجهاز التنفيذى للهيئة العامة لمحو الامية دكتور رافت رضوان كلامه معانا النهاردة والله كان كلام جميل كلام معقول واكيد كان كلام مسئول خلص الكلام سلام نلتقى فى الحلقة المقبلة