رامي صبري عن أغنية "الناس بتبان في الشدة": "ده موقف حصل معايا"

روى المطرب رامي صبري، قصة أغنية "الناس بتبان في الشدة" التي طرحها قبل أيام، وقال عبر حسابه على انستجرام: "دي مش أغنية بس.. ده موقف حصل معايا والموقف ده خلاني شفت ناس مش كتير الحقيقة بطريقة مختلفة".
وأضاف: "خلاني شفت إن كل حد بتعرفه في الحياة هو اللي بيختار إنه يعيش معاك أو علاقته بيك تبقى قد إيه بتصرفاته معاك، يعني هو اللي بيخليك تطول علاقتك بيه أو تصغرها، وفي وقت لما يحصلك مشكلة في حياتك هو بيعتقد إنك مش هتخرج من مشكلتك وخلاص كده أنت مش هترجع تاني، هنا بقى بتبان كل حاجة.. بيبان الصاحب اللي مش بيشوف إنك مش هترجع تاني وبتبان الناس كلها على حقيقتها".
وتابع: "وبتشوف كل الناس بجد ساعتها المشكلة اللي بتبقى فيها بتهون عشان بتحس إن ربنا وراك، حاجات عمرك ما كنت هتشوفها إلا لو كانت حصلتلك أزمة في حياتك بجميع أنواعها بقى، عشان كده لازم نقول الحمدلله على اللي ربنا كتبهولنا ومنعترضتش على أي حاجة بتحصلنا، وفي الآخر بقول في الأغنية (أنا اللي حصلي علمني مابصش على اللي راح مني وعزة نفسي قوتني مكسرتنيش، انا ابقى على اللي يستاهل مش اللي يبعني بالساهل بشوفهم عادي واتجاهل ميلزمونيش.. وأنا بمسح من حياتي اللي ما بين البينين وبشيل من ذكرياتي الناس الكدابين)".