يا خبرة يا كورسات ...عندك إيه؟؟

ازيك يا أستاذة رشا أنا " نسمة " خريجة تجاره خارجية جامعة حلوان دفعة "2009" لحد دلوقتي مشتغلتش غير شهر واحد Tele sales وللأسف كانت تجربة مش كويسه لإنهم طلعوا نصابين ومش بيدوا الحق، المهم أنا نفسي أشتغل ومش لاقيه حاجة كويسة خالص، كلها مكاتب صغيرة في شقق وبروح أعمل "انترفيو" ومش بلاقي حد غير صاحب العمل كذا مره بقدم علي سكرتيره بس للأسف ده اللي بيحصل معايا وبدور كتير علي النت وفي الجرائد بس مش لاقيه حاجة مناسبة والحاجة الكويسه عايزه خبره وأنا معنديش ومش عارفه أعمل ايه أنا بحب الحاجات الإدارية بس .
مش لاقيه شغل.. أرجو منك المساعده والرد عليا لإني في حاجة لمساعدتك أسفه طولت عليكي.
...
يا نسمة عندنا حاجتين مهمين جداً نتكلم فيهم:
أولا : الشركات اللي بتعملي فيها مقابلات شخصية.
طبعاً كلنا بنقدم في وظائف كتير وغالباً الإعلانات مش بتبين إذا كانت الشركة كبيرة أو لا، علشان كده لما أي شركة تتصل بيك لتحديد موعد مقابلة لازم تسألي الأسئلة دي.
1. هل الشركة دولية ولا محلية ؟
2. هل للشركة فروع أخري ؟
3. هل للشركة موقع علي الإنترنت ؟
4. ما هو مجال عمل الشركة بالتحديد ؟
5. ما هو عدد العاملين بالشركة ؟
6. الشركة فتحت في سنة كام ؟ بمعني آخر الشركة جديدة و لا ليها أسم في السوق ؟
7. المقابلة مع مين؟
8. المسمي الوظيفي بتاعه ايه؟
9. هل هيكون فيه أختبار و لا مقابلة شخصية فقط؟
و تصري أنك تأخدي أجابات ولو السكرتيرة أو اللي اتصل بيكِ قالك لما تيجي تعرفي تقولي لا أنا لازم أعرف قبل ما أجي.
متخافيش من أنك تفقدي الوظيفة، لان الأسئلة دي هتوفر عليكي وقت ومجهود، دا بالإضافة إلي أنك كمان هتعرفي معلومات عن الشركه قبل ما تروحي و ده هيدعم موقفك.
ده غير انك مهم جداً تقري عن الشركة قبل ما تروحي
ثانياً: موضوع الخبرة.
الشركات بتاخد حاجة من اثنين يا علم كبير يا خبرة كبيرة ....انتي عندك ايه؟
لو معندكيش خبره ممكن تعالجي دا بالعلم بمعني كورسات دورات تدريبية دبلومات .....الخ.