يا مصطفى

يا مصطفى
يا خير خلق العالمين
صادق .. أمين
عدّيت في ميت مليون كمين
و رفعت راية المسلمين
فوق السما
زِلت العَما .. وسط الغَما
أرسيت أصول الملحمة
بيك الضعيف لاذ واحتمى
ليك الغريب عاز وانتمى
و في حضنك الحق ارتمى
رعرع .. نما
عاشقك كما
كما طفل شابط
طرف جلابية أبوه
يا مصطفى
سيرتك تِقِيد
نور الهداية اللي انطفا
حبك يزيد .. مليون وريد
في ثنايا قلبى اللي اكتفى
ذكرك يعيد
إحساس ضميري اللي اختفى
نسلك يكيد
نسل الحثالة اللي احتفى
حكمك يبيد
حكم السيوط المُرجِفة
يا مصطفى
جوّا الحديث .. بَشعُر دفا
بين الضلوع
مَعرفش ليه في ذكرك بَجوع
بتزقّني يم الدموع
و لا عمري مَلّيت كفكفة
يا مصطفى
بين السطور بَهواك بطل
خيل العروبة اللي انسطل
محتاج إمام
محتاج رفيق
يهديه طريق
وسط الغمام
لحظة صفا
يا مصطفى
يابو قلب بيساع بالأمم
صابني اللمم
اسقيني شربة من إيديك
بحق مين أهداك
لسان جمع الكَلِم
....................
و مهما أقول عنّك سنين
مفيش قصايد واصفة
و لافيش معاني منصفة
يا مصطفى