مرشحكم صلاح الدين

ولا مَرْضَانْ ولا مَعْلُولْ
ولا تِقُولوا عَليَّا فلول
لا أنا حرامى ولا بوشِّين
داأنا منكم و واكِل الطِّينْ
وغَايبْ مِنْ سَاعِةْ حِطِّينْ
مُرشحكم صلاح الدين .
قالولى من ساعة غيبتى ....بإن الحال صبح مايل .
وقالو إن حكامكم.....ملوا كروشهم بمال طايل .
وغَلوا إيديكو و بيقيتوا ....كما المشلول مهوش طايل .
وكله طين و آخره الطين
دا أنا منكم و واكل الطين
وغايب من ساعة حطين
مُرشحكم صلاح الدين .
حكولى من ساعة غيبتى لحد ما فوقتوا و صحيتوا
حكولى عن الخلافة زمان
حكولى عن الخديوى كمان
ودقتوا من العذاب ألوان
لحد ما بالأمل جيتوا
قالولى إزاى قهرتوا الذل
داويتو بدنكوا إللى إتْعَل .
قالولى إزاى كانوا خَدَمْه ....وفجأة بقوا ملوك القصر
قالولى إزاى كانت نكسة ....وبإيديكو بنيتوا النصر .
قالولى إزاى من الكسرة ....صلبتوا لفوق رفعتوا الضهر .
قالولى عن إللى مات إبنه
قالولى عن اللى بتزغرت ...بإستقبال خبر الموت .
قالولى عن اللى بيكبر.....وما يهابشى و لو هيموت .
قالولى عن إللى م الدنيا.....مايتمناشى إلا الموت .
قالولى عن نشيد قولتوه
لحد ما يوم قابلتوا النصر
" أبكى أنزف أموت ....و تعيشى يا ضحة مصر "
دا أنا منكم و واكل الطين
لا أنا حرامى و لا بوشين
وغايب من ساعة حطين
مُرشحكم صلاح الدين
قالولى عن سنين جُعتوا ....سنين كانت طويلة عجاف .
قالولى إزاى فى برد الليل ...كان الجوع دا غطا و لحاف .
وقالوا كتير عن الحُرقه .....عن الذل و عن الإجحاف ....
قالولى عن الرضيع يُفطم ....عشان إللى لبنها جَفْ .
قالولى عن إللى مِنْ فقره .....ساب الدنيا ..فى كفنه إتلف .
قالولى عن شباب تلفوا....ومن غْلبه سيجارته لف .
قالولى كتير و عادو كتير....
قالولى عن إللى من حيرته .....فارق عقله و سابه و خف
قالولى عن إللى يِتْلَوى.....وموته كان دواه و خف
قالولى صراخنا بقى ماسخ ....كأنه شريط بايظ بيسف
كأننا مش بشر عايشين
وفى الدنيا دى بنى آدمين
دا أنا منكم و واكل الطين
وغايب من ساعة حطين
لا انا حرامى و لا بوشين
مُرشحكم صلاح الدين