للولاد بس: احسبها وجاوب هتتجوز وانت عندك كام سنة ؟؟

يا ترى فكرت في مرة تقعد مع نفسك وتحسب الزواج ممكن يكلفك كام.. وبناء على مرتبك ممكن تتزوج وأنت عندك كام سنة ؟! عموماً من غير إحباط.. تعالوا نعرف إيه الحكاية.
كنت راكب المترو وبالصدفة وجدت شخصين يتحدثون مع بعضهما في هذا الموضوع، فوجدت أحدهم يقول: أنا مهندس وعندي 28 سنة دلوقتي، ومرتبي وصل لحوالي 1500 جنيه، وقلت أفكر في الجواز وقعدت أحسبها، فلقيت إني محتاج لشقة إيجار، وبعد بحث لقيت شقة بس صاحبها عايز مني 20 ألف جنيه " خلو رجل " ، مع إنها في منطقة شعبية، وكمان العروسة أهلها عايزين شبكة ب10 ألاف جنيه، وتجهيز الشقة بكل حاجة محتاج لحوالي 50 ألف جنيه بكل التجهيزات، وفرح محتاج حوالي 10 ألاف جنيه بكل حاجة ، يعني باختصار محتاج 100 ألف جنيه، وأنا أصرف حوالي 700 جنيه في الشهر على نفسي، ويبقي 800 جنيه، لو حوشتهم يبقي في السنة 9600 جنيه، قول 10 ألاف جنيه، يعني محتاج 10 سنين علشان أتجوز، يعني أتجوز وأنا عندي 38 سنة، بس ده لو كل حاجة فضلت بسعرها دلوقتي، والأكيد إني لما أوصل للسن ده هحتاج كمان 10 سنين علشان أتجوز، فبلاها جواز أحسن.
هذا كان ملخص الحوار الذي دار بين الشابين، فقلت أبحث عن نماذج أخري نعرف أيضا ممكن يتجوزوا في سن كام بعد ما يحسبوها.. تعالوا نعرف...
" مش هقعد في الكوشة أبدا " .. هذا ما توصل إليه عمرو سمير- 27 سنة ، ويقول: أعمل محاسباً ومرتبي حوالي 900 جنيه، ولو حسبت تكاليف الزواج سأجد أني محتاج لشقة إيجار .. يعني على الأقل مقدم 30 ألف جنيه، بجانب الأثاث " والذي منه " بحوالي 20 ألف جنيه على أقل تقدير، والشبكة تحتاج لحوالي 10 آلاف جنيه " يدوب دبلتين ومحبس وغويشتين " ، هذا كله بجانب طبعا هدايا طول فترة تجهيز الشقة ممكن تدخل على حوالي 3 أو 4 ألاف جنيه، والفرح محتاج على الأقل 7 آلاف جنيه لو في قاعة في مركز شباب ، وألف جنيه على الأقل ثمن بدلة الفرح لو من العتبة مثلا، يعني محتاج تقريبا 75 ألف جنيه، وأنا أصرف 300 جنيه مواصلات، بجانب 150 جنيهاً أكل وشرب تقريبا ، وبالتالي الصافي معايا 450 جنيهاً لو وضعتهم في بنك فسأجد 5400 جنيه في السنة، يعني ممكن أتزوج بعد 14 سنة، وسيكون سني 41 سنة، يعني أعتقد إني لن ألبس بدلة الفرح ، كله صعب بجد.
ويقول أيمن سلامة- 26 سنة: أعمل في محل ملابس بجانب كوفي شوب وبكسب حوالي 850 جنيهاً في الشهر، أصرف منهم 350 جنيهاً وأدخر 500 جنيه، وقررت أتزوج وأقعد مع والدتي، وبدأت أدخل في جمعيات بدل ما فلوسي تضيع في أي حاجة، ومحتاج لتكاليف الأثاث بعد ما حسبتها طلعت حوالي 17 ألف جنيه، بجانب حوالي 7 ألاف جنيه لتوضيب الشقة، وحوالي 7 ألاف جنيه كمان للشبكة على أساس إني أتزوج من واحدة أهلها يقدروا ظروفي، وتكاليف الفرح حوالي 5 ألاف جنيه على أساس إني أعمل الفرح فوق السطوح، يعني محتاج 36 ألف جنيه وأودع العزوبية، وأنا بعمل جمعية في السنة ب6 ألاف جنيه، يعني 6 ت سنين وأتزوج، وسيكون عمري وقتها 32 سنة، يعني حالي أحسن من حال ناس كثيرة الحمد لله.
ويقول محمد هاشم- 28 سنة بكالوريوس تجارة-: أعمل في شركة إلكترونيات بجانب مكتبة، ومرتبي يصل لألف جنيه، ولا أصرف منهم سوي حوالي 250 جنيهاً في الشهر لأن الشركة والمكتبة قريبين من البيت فلا أحتاج لمواصلات، وأدخر 750 جنيهاً، وهذا الكلام من سنة، يعني معي الآن 9 ألاف جنيه، وطبعا سألجأ للتقسيط لكي أتزوج، فسأحتاج 10 ألاف جنيه مقدم عفش، وقربت أوصل لهذا المبلغ بإذن الله، ولكني محتاج لشقة أكيد ستكون إيجار ومحتاج لها على الأقل 15 ألف جنيه، والإيجار حوالي 350 جنيهاً في الشهر، ومحتاج شبكة بحوالي 10 ألاف جنيه، يعني دلوقتي محتاج في يدي حوالي 30 ألف جنيه بجانب حوالي ألف جنيه في الشهر لتسديد الأقساط والإيجار، ونسيت كمان الأدوات الكهربائية وطبعا سأشتريها بالتقسيط، يعني من غير ما أحسبها لن أتزوج قبل 10 سنين .
أكيد كل واحد وليه ظروفه .. يعني مش شرط ده يكون حال كل الشباب ، لكن ياريت تشارك معانا وتقول لنا عن تجربتك وتحسبها معانا عشان نعرف : وأنت كمان .. هتتجوز وأنت عندك كام سنة ؟!