قصائد

ضحكتين قبل ماتمشي
التاريخ‮..‬
ناس بتفكر ناس باللي حصل
ياخدوا بالهُم بقي ولا مايخدوش مش مهم
ويحطّوا ع الجرح ملح تاني
ومحوّشين للفرح‮ ‬غنوه بس الوقت مش طايق
وعنده كرشة نفس
وديقة خُلق م الدنيا وم الايام
ومن حكايات كلها هزايم
التاريخ بالنسبه لي حاجه تانيه
حاجه بتفكرني بيها‮..‬
وكإنها أمي ف الدفا والحضن
والاكل بالمعلقه
وكباية اللبن ع الفطار
وباعته عنيها تحرسني ف الرايحه والجايه
لو مرّه شاور عقله الوجع واستقوي علي ضحكتي
هيشوف منها العين الحمرا
ويفكّر كتي‮........‬ر قبل مايسكن وطن
مش عارف تاريخه ايه ؟
التاريخ‮..‬
اللي دخلت كتابه بقوّه وببراعه
وعملت للحزن بلوك
وسابت له ع الهامش ضحكتين قبل ماتمشي‮ ‬
وسابت له بصمات ايديها علي خده
علشان كل ماتبدأ حرب وتنتهي
ويبدأ‮ ‬يلم الغنايم
يفتكر انه في حد ممكن‮ ‬يخبي وشه منّه‮ ‬
ويمشي جنب الحيط‮ ‬
ويعرف ان سلطانه وسطوته ع القلوب الضعيفه بس
علشان معرفتش طعم الحب‮.‬
ميكي ماوس بيعيّط ف أوضة البنات
واحنا بنعزّل لبيتنا الجديد
كنت عامل زي مااكون‮..‬
ملبوس بجن مش عاوز‮ ‬يطلع منّي
ومتبّته روحي ف أُكر الأوض‮ ‬
ودهان الحيطان‮..‬
اللي اختارناه حتّه حتّه‮..‬
ميكي ماوس أهه بيعيّط ف أوضة البنات
وبيقوللي‮ ( ‬ماريهان‮ ) ‬بتحبّني
وبنلعب سوا قط وفار بعد المذاكره
وبعدين تنام‮ ‬
الغربه مكان آمِن للي مالوش مكان
وانا مش عارف ليه حاسس بغربه
رغم اني مش رايح بعيد
بس حاسس بروحي مش هيّ‮ ‬روحي
وفي حاجه ناقصاها متوزّعه بين الأوض
والموكيت وبوتاجاز قديم‮ ‬,
وسنين مش باقي منها حاجه تدلّني علي روحي فين
وسط الشنط والهدوم وكام برواز لصور احنا فيها
بس مش موجودين‮..‬
أبويا وضحكته اللي تغيّر وقت لوقت تاني
أمي وشبابها‮..‬
اللي حلف انه قبل مايسيبها ليقطف ورد الربيع كلّه
حاجه‮ ‬غريبه‮ ‬يااخي‮..‬
شبّاك صغيّر في اوضه بتبص ع الشارع
أجمل كتير من قصر بيضيق عليك كل‮ ‬يوم بهمومه
ويدفّعك تمن احضانه البارده‮.. ‬
حزن مجّاني‮.‬
ورد بينط حواجز
بحلم‮..‬
علشان اطلع من الشخص اللي لابسني
وبيضعف قدام نظرتها وبيمشي عكس الاتجاه‮ ‬
ويحارب طواحين الهوا ف كتاب التاريخ بعصايه‮ ‬
وينام بطل
بحلم‮..‬
علشان الحزن اللي جوايا‮..‬
ميلاقيش مكان آمن للحياه‮ ‬
وانا فاتح شوارع قلبي ع البحري‮ ‬
زي بلكونه واطيه جرحاها العيون‮..‬
من كل الزوايا
بحلم‮..‬
علشان اسدّق ان اللي ع الكورنيش
حبايب جايين من زمن تاني ف الحكايات
والجناين فيها ورد بلدي بينط حواجز
وبيركب مراجيح
وينام ف قصريّه ف البلكونه
والصبح‮ ‬يقوم‮ ‬يزوق موكب المحافظ
بحلم‮..‬
علشان كل حاجه صبرت ع التعب
تاخد حقها ف السعاده‮..‬
اللي مابينها ومابين شارعنا
12‮ ‬شهر
واحنا بنحاول نزق روحنا عليها
وهيه لسّه بعيد‮.‬