مروة كامل تكتب : فهامة بالكهربة

يوم عيد الام من المناسبات اللى ليها طقوس ثابتة مبتتغيرش ابدا كل سنة يعنى مثلا من الطقوس الثابتة ف اليوم دة
ان كل قنوات التلفزيون طول النهار عاملين يخرطوا على قلبنا بصل و بيعيدوا و يزيدوا ف اغنية ست الحبايب(لفايزة احمد)
وتلاقى كل الناس اللى ماشيين ف الشارع شايلين هدايا ورايحين يحتفلوا مع امهاتهم
المفارقة بقى ان اليوم دة المفروض انة مناسبة سعيد بس انتم عارفين بقى الامهات يفرحوا يعيطوا يزعلوا يعيطوا علشان كدة اليوم دة بيبقى (يوم العياط العالمى)وكل ام و ليها اسبابها اللى بتعيط علشانها
فتلاقى اللى بتعيط علشان حسة بالوحدة بعد و فاة امها
واللى بتعيط علشان حسيت بالحب و الحنان من ولادها و هما حواليها
واللى بتعيط بسبب سفر حد من ولادها وكان نفسها يبقى معاها ف اليوم دة
واللى بتعيط علشان الهدية مش عاجباها المهم ان ف الاخر (تعددت الاسباب والعياط واحد)
كلنا طبعا عارفيين فضل الام و مدى تعبها و تضحيتها اللى ملهاش حدود واللى ميختلفش عليها اتنين
انا بقى مبيغظنيش و يحرق دمى غير الرجالة اللى معترضيين على الاحتفال بعيد الام علشان كدة بستسمحكم تسيبوا لى انا الطالعة دى
عزيزى المعترض حابة افكرك بشوية حاجات يمكن تكون ناسيها او عامل نفسك ناسيها
فاكر شكل مراتك وهى حامل كانت منفوخة ازاى ورجليها كانت عاملة زى البالونة لدرجة ان مفيش جزمة كانت داخلة ف رجليها وكانت مقضياها صنادل مفتوحة ف عز البرد
وقضت فترة الحمل ما بين دوخة وغثيان و اكتءاب دة غير ماتشات الكورة اللى كان بيلعبها ابنك ف بطنها طول الوقت
وبعدين جاءت لحظة الانفجار و الست هتنقسم لشخصين بعد الم رهيب واللى هو تانى الم ف العالم بعد الحرق حيا
ف اول حاجة الدكتور بيديها للست حقنة التخدير بتاخدها ف ضهرها تطلع من نفوخها و بعدين بيشق بطنها زى ما بنشق البطيخة و بالمناسبة الالم اللى بيسببة الجرح دة بيستمر سنين
دة غير انها بتخرج من المستشفى بتمشى ببطىء فظيع زى ما يكون بتمشى الجزمة الاول على طريقة عم ايوب ف مسرحية الجوكر
المفارقة الاكبر بقى هى ان كل الناس اللى حوالين الام بيبقوا مبسوطين و فرحنين و بيحتفلوا بالبيبى و هى الوحيدة اللى بتبقى حاسة بوجع والم فظيع ومش قادرة تستمتع بالحدث السعيد دة
الاب بقى بيعمل اية بيقرر يشترى دماغة و ينتقل للنوم ف الاوضة التانية علشان مش قادر يستحمل عياط البيبى طول الليل
و مقلكمش بقى على فترة الرضاعة واللى فيها بتتحول الام من ست شيك ووقورة الى (بقرة حلوب)ممكن تركن ف اى حتة واى وقت ترضع البيبى وهى و حظها بقى اللحظة دى تيجى ف الشارع او ف محل او ف مطعم او ف العربية لاءن المخلوق الصغير دة ميعرفش اعتبارات ولا حسابات و ملوش دعوة انتى فين ولا بتعملى اية
ولا مرحلة الفطام اللى بتستحملها الام ما بين زن و قلة نوم وصريخ مستمر و قريفة و وجع و ضرب من الطفل
بالله عليك كام مرة مراتك قامت من على الاكل علشان البيبى بيعيط
كام مرة دخلت مراتك التواليت وشايلة البيبى على رجليها
كام مرة مراتك كانت بتاخد دش و خرجت تجرى من الحمام و هى مبلولة و بتنقط علشان البيبى بيعيط
كام مرة مراتك دخلت تطبخ وهى شايلة البيبى على ايديها
كام مرة مراتك نامت على نفسها وهى قاعدة من كتر الارهاق
كام مرة اتف ف وشها اشى ادوية واشى اكل واشى لبن
هقول اية ولا اية ولا اية كل دى مواقف ميعرفهاش وميقدرهاش غير الامهات
يا ترى فهمت اللى انا عاوزة اقولة ووصلت المعلومة ولا لسة لو بعد كل دة لسة مفهمتش تبقى محتاج( فهامة بالكهربة)
واخيرا احب اقول لكل امهات العالم احتفلوا وانبسطوا و متخلوش اى حاجة تحبطكم لان النهاردة عيدكم سواء وافق الكل او اعترض البعض و (كل سنة وانتم طيبين)