"سعيدة مبارك"!

"هو مبارك فاكر نفسه ميسى وجاب جون ولا إيه؟ حد يقوله إنه جاى يتحاكم"، رد فعل ساخر قدمه أحد شباب تويتر استنكارا للهيئة التى ظهر عليها الرئيس المخلوع حسنى مبارك، وقيامه بتحية الجمهور، وهو الأمر الذى أثار استفزاز الجمهور والنشطاء.
شيماء صلاح: سعيدة مبارك.. حد فاكر الجملة دى، كانت بتتقال فى الأفلام القديمة أيام زمان، أهو دلوقتى ما بتتقلش دى بتتعمل فى القفص للجمهور سعيدة مبارك.
عمر جمال: بس مبارك سو كيوت وسابغ شعره ولابس نضارة ريبان تقريبا وبيضحك !
أحمد محسن: ما شاء الله، مبارك صحته اتحسنت أوى من ساعة ما دخل السجن يظهر إن هو ده مكانه الحقيقى اللى المفروض يفضل فيه.
شاهندة: هو مبارك كان بيضحك وبيحيى الجماهير ليه؟ ومين بيصبغ له شعره.. مش المفروض إنه مسجون !
نبض الإخوان: استفسار مش برئ.. هو من حق أى سجين فى مصر إنه يلبس نضارة شمس ويصبغ شعره وهو رايح لقاعة المحكمة؟!
وشهدت منصات التواصل جدلا ساخنا حول تنحى قاضى محاكمة المخلوع ونجليه والعادلى ومساعديه عن نظر قضية قتل المتظاهرين وإرسال القضية إلى محكمة استئناف القاهرة لتحديد دائرة أخرى، وذلك بعد استشعار رئيس المحكمة الحرج.
لؤى صبحى: القضاء الشامخ.. نفس القضاة.. دول اللى اخترعوا مهرجان البراءات وأصحاب الأحكام التفصيل أيام مبارك.
فى المقابل، اعتبر البعض الآخر أن تنحى المحكمة عن نظر القضية يعد قرارا صائبا؛ حيث كتبت دينا طنطاوى: "قبل ما يجى فى ذهنكوا أى لوم أو عتاب على القاضى.. اللى عمله ده أكبر صح لمصلحة الجميع.. هذا هو نفس القاضى الذى حكم بالبراءة للمتهمين فى موقعة الجمل.. وهناك تربص مسبق من المحامين بهيئة المحكمة.. وأى إجراء فى القضية كان هيبقى تضييع وقت لأن المحامين هيردوا المحكمة فى أى وقت لاحق.. قَدرَ الله وما شاء فعل.. إن الحُكمُ إلا لله".