اوعى حد يقول لوزير العدل أحمد الزند، إن الأهلي هيصرف 600 ألف جنيه ل"الكبير" أبوتريكة كباقي مستحقاته الأسبوع المقبل.. يعني ال600 يضيعوا أو يخطروا الأهلي يقولوا: "ده إحنا متحفظين على أمواله وكده".. يعني دي فلوسه وشقيان فيها وتعب.. ارحموا واحد فرحنا سنين.. وارحمونا.
ول"حبايبنا" الزملكاوية.. فاليوم ظني هيكون تاريخي ليكم.. يا إما ربنا يكرمكم وتكسبوا "الداخلية" وميدو يوصل السماء.. يا إما تشيلو من الداخلية "2".. وساعتها الأهلاوية هيغنوا: "شالوا الدو.. جابوا شاهين.. الدو.. قال: ما أنتوش نافعين.. المباراة هتكون قمة والله وعشان مصر.. عشان مصر".
وبمناسبة مصر.. فمصر أكبر من إن فنان يسيبها ويهاجر ل"الإخوان".. أيوه وبعدين فيها أيه لما ممثل زي محمد شومان يروح لقناة الإخوان ويقعد في تركيا.. خلينا أكبر من الفكر ده والعك ده وبلاش نلعبها "طائفي" زي لما واحدة مسيحية تعلن إسلامها أو أخرى تتنصر.. طب حد هاجم شومان وشتمه!.
أيوه.. سيد علي ابن "المشروع الإسلامي في عهد الإخوان" و"المشروع الوطني في عهد مبارك".. واللي شاف أول إمبارح إن السيسي "مبعوث" من الله.. يخرب بيت كده هو اللي هاجم شومان وقال إن عادل إمام كان بيدي له على قفاه.. اطلعوا من دايرة الإخوان وعكهم واللي راح لهم.. انسوهم.. انسوا تصحوا.. هتضيعونا والله، وسيبك من شومان.. وخليك في الممثل التاني اللي اسمه هشام عبدالله.. بتاع فيلم "الطريق إلى إيلات".. طبعا.. أقولك الطريق إلى إيلات.. مش هتفتكر غير "البكيني" بتاع مادلين طبر.. ومتفتكرش إننا دمرنا إيلات.. ومحمد سعد غنى.. وعلاء مرسي مات.. ونبيل الحلفاوي "خرم" البتاعة.. وكده.. ركز معايا.
هشام نفس القصة.. راح تركيا.. وهيقدم "توك شو".. يا سيدي سيبه يعيش ويقدم ويأكل عيش.. إنت مال سيادتك بيه.. هو حر.. لا تشتمه.. ولا تقرب منه.. دعه هناك مع من يستحقهم ويستحقونه.. انسى بقا.. أهم ال"يستحقونه" طلعوا له فيديو قال فيه: "مرسي مينفعش يدير سوبر ماركت".. وعايزين يمشوه من القناة.. هااا ارتحت؟.
وجبنا سيرة السينمائيين وكده.. لو تفتكر يوسف وهبي لما كان حكمدار القاهرة، وقال: "على المواطن أحمد عبد السلام اللي ساكن في دير النحاس.. متشربش الدواء.. الدواء فيه سم قاتل"، المشهد ده تكرر مع طفلة اسمها حبيبة حمدي في قنا.. خدت دواء غلط لعلاج مرض خبيث، والمستشفى بلغت الشرطة، والشرطة بلغت الجوامع، والجوامع نادت في الميكروفونات: "يا حبيبة متشربيش الدواء.. الدواء فيه سم.. والحمد لله وصلوا ل(حبيبة) وأمها قبل ما تروح".
وبمناسبة الشرب.. إمبارح وائل الأبراشي كان جايب شيخ من أستراليا عبر "سكايب" ودخل في فقرة ضيوفها أزهريين وسامح عيد في قضية إسلام بحيري.. وبعيدا عن اللت والعجن اللي استمر 4 ساعات والنتيجة "صفرية".. الشيخ بتاع أستراليا.. اللي رفع المنصوب.. ونصب الفاعل وجر التباع.. وكده قال: "الرسول شرب 12 مرة خمر".. والبخاري قال كده.. يخرب بيت كده.. والحقيقة تابعت الحلقة مشدودا.. خوفا من أن يتطور الأمر لأكثر.. ويتكلم عن "بانجو" والبانجو كان لسه مطلعش.
والخمرة دي ما تنسيك أن "جانجاه" أخت سعاد حسني عملت كتاب عن سعاد حسني وقتلها ومن الشخصيات اللي شاركت في قتلها، وقالت مش هتطعبه في مصر... وأنا شايف إنها تطبعه في طنطا أفضل.. المهم إنها "شلفطت" الأخ مفيد فوزي اللي اتكلم عن سعاد وعبدالحليم وطعن في رجولة حليم.. وإن "البق اتقال" 949 مرة.. وهددت مفيد وقالت له: "أتلم عشان مزعلكش".
وفيلم "مفيد فوزي" ده يفكرك بتصريح الشيخ علاء حسانين اللي قال إن "قبيلة" من الجن هي اللي بتحرق بيوت الشرقية.. ورد عليه الشيخ صبري عبادة مستشار وزارة الأوقاف وقال: "الجن ميعملش كده ولا يأتون بأفعال مادية"، ودرات "الخناقة" بينهما مع خالد صلاح إمبارح.. وأنا من رأيي ناخد "حسانين وصبري"، ومن كل رجل قبيلة ونطلع على الشرقية.. ونشوف أخرة "الهري" ده أيه.. آي والله.
وعشان كله ميبقاش ضرب.. ضرب.. ضرب، قول: "ده هواك في قلبي ولا شيء بيغيره.. لا الهجرة ولا السفر ولا تلوين السهر.. ولا تغيير الهوى ولا حب أتصوره.. حالة فيها حالة استحالة.. ماتفسرهاش قوالة.. ولا شكوى ولا آهات.. أنا عايزة معجزة تنجدني من اللي فات.. أنا عايزة معجزة تمحي لي الذكريات.. وإحنا في زمان يا عالم ما فيش فيه معجزات".