أحمد عفيفي يكتب: «حبيبي» ... العادلي!!!

قسما بالله احنا بقينا مسخرة .. لسه قايم دلوقتي من جلسة نقاش حامية مع زمايلي في الجريدة هنا في الكويت وكلهم مصريين .. بسبب اللي قاله حبيب العادلي امبارح .. وكان السؤال : تفتكر حياخد براءة من قتل المتظاهرين؟ .. والإجابة من الجميع بما فيهم انا : طبعا .. براءة واعتذار كمان .. فعلٌق زميل : والله الراجل ده فعلا مظلوم .. وعلّق أخر : امبارح حبيب العادلي كان عالي اوي والقاضي اعطاه الفرصة كاملة ليكشف كل الأوراق والحقائق .. وعلّق ثالث كان متغاظ جدا من التعليقين السابقين : العادلي امبارح كان ناقص يغني ظلموه .. والقاضي كانت الدمعة حتفر من عينه .. والعادلي بيترافع عن نفسه 3 ساعات .. كان ناقص هو نفسه " اى العادلي " يرفع الجلسة للاستراحة وكوباية شاى وسيجارتين ويرجع يكمّل قصيدة " مصر التي في خاطري وفي فمي احبها من كل روحي ودمي "!



دي التعليقات .. بس كلها صح وغلط .. لا اللي قال انه مظلوم صح وبرضه مش غلط ..ولا اللي اتريق عليه صح .. ولا غلط .. مش فزورة أصلها .. الحدوتة يا ناس تتلخص في 18 يوم .. احنا بنحاكم مبارك والعادلي على أحداث حصلت في 18 يوم .. فقط لا غير .. مبارك متهم بالتحريض على قتل المتظاهرين .. عندك اثبات ؟ هه .. بتقول ايه سعادتك ؟ يابني اسمعني : عندك دليل ؟ .. بصراحة لأ .. وانا يعني كنت سمعته .. طيب العادلي هو اللي أمر بقتل المتظاهرين .. عندك اثبات ؟ هه .. ياحبيبي اسمعني .. سمعته او شفته بعينك ؟ .. بصراحة لأ .. خلاص يبقى مفيش قضية .. براءة لمبارك وللعادلي!


لو ده حصل .. حد يقدر يلوم القاضي؟ .. طبعا لأ .. والحقيقة .. الحقيقة .. لو احنا بنحاكم مبارك والعادلي على القضية دي بالتحديد ، لازم ياخدوا براءة .. واللي يعترض يبقى مبيفهمش .. لأننا بعد الإخوان مامسكوا الحكم ، عرفنا ايه اللي حصل في ال 18 يوم .. بس المصيبة الحقيقية ان احنا بنحاكمهم على ال 18 يوم .. مش على ال 30 سنة .. شفنا فيهم من مبارك ومن العادلي الذل والهوان وقلة القيمة واتمسح بكرامتنا الأرض .. 30 سنة .. لو فيه قانون في البلد بيحاكم على إفساد الحياة السياسية والاقتصادية والصحية والتعليمية والهبابية والملوخية ووشك في الحيط وقفاك ليا .. لو فيه قانون في البلد بيحاكم على الحاجات دي .. يبقى الحكم العادل على مبارك الشنق .. ايوه الشنق .. يلبس كده زي الباشا البدلة الحمرا ويتجر جر لحد غرفة الإعدام ونفسك في ايه قبل ماتموت .. وبلاش العادلي ياخد إعدام .. بس السجن مدى الحياة بصفته مسؤول عن قطاع الداخلية بس ، مش البلد ككل.


ده .. لو كانت الثورة فعلا مشيت لنهاية الطريق صح .. لكن لأنها ثورة بدأت كده وكده " جس نبض يعني " .. وبعدين اتقلبت فعلا ثورة شعبية بنزول الناس المكوّية كوىّ .. فبقينا مش عارفين ايه الصح .. كنا متأكدين مليون في المائة ان مبارك هو اللي حرّض وأمر بالقتل .. وان العادلي نفّذ .. كنا فاكرين كده .. مكناش لسه نعرف المخطط الاخواني القذر .. فالدنيا كانت اخر لخبطة .. لا انت عارف راسك من قفاك ولا مين مع مين ومين ضد مين .. فطبيعي وطبيعي جدا .. اذا كنت حتحاكم مبارك بتهمة التحريض .. طبيعي طبعا انه حيطلع منها براءة وكذلك " حبيبي" العادلي .. اذا كان المساعدين بتوعه الستة اخدوا براءة في المحاكمة الاولى .. وهو اخد تأبيدة كمسؤولية سياسية عن اللي حصل .. بس ان كنت عايز الحق .. ياخد براءة .. مادام يا ابن الحلال بتحاكمه على قضية ، لو انت جدع وراضع من بز امك بجد تقدر تُدينه فيها.


عشان كده لا اللي شايف انه مظلوم غلطان .. ولا اللي شايف انه يستحق الحرق صح .. في القضية دي بالذات .. انما لو حنحاكمه على اللي عملته الشرطة في 30 سنة ، او على الاقل في سنوات توليه الوزارة .. حنعدمه .. لو حاكمناه انه كان الكرباج بتاع مبارك اللي بيضرب به معارضية حنشنقه .. لو حاكمناه انه كان بس وزير داخلية دولة مبارك ونظامه .. حنفرمه .. لكن مادام حتحاكمني بس على قضية فارغة انا فعلا برىء منها .. يبقى خد دي مني " ده العادلي اللي بيقول " : انا بقدم بلاغ دلوقتي وع الهواء للنائب العام ضد دومة وجميلة اسماعيل وسامية جاهين بتهمة تخريب المنشئات اثناء ال 18 يوم .. وبالمرة بقى علاء الاسواني لانه كتب تويته بيتريق عليّا فيها وبيقول اني استحق جايزة نوبل .. وفي السكة برضه اقبضوا على الواد احمد عفيفي اللي بيكتب دلوقتي المقال .. لأنه وم الأخر كده مش عاجبه اللي بيحصل ولا مرافعتي ودفاعي عن نفسي امام المحكمة.


هى دي المسخرة بجد .. لمّا الطاولة تتقلب وييقى المتهم صاحب حق .. والمجني عليه " رِمة وابن كلب " .. واحنا قاعدين نتفرج وساكتين .. لمّا يبقى حبيب العادلي " حبيبي " العادلي .. ابقى سلم لي ع المترو!!