_اوعى تقارن بين الحريق اللي حصل في فندق بدبي وحصل فيه 16 إصابة خفيفة.. وبين غرق معدية في كفرالشيخ بدلتا مصر.. اوعى ليه بقا.
_أقولك انا.. ده الفرق إن فيه سيستم و"لا سيستم ".. الفرق بين دولة فيها مؤسسات ودولة ماشية ب"البركة ".. طب ليه نجيب سيرة البركة يا عّم.. وبلاش تقطيع في البلد عيب كده .. عيب .
_طب تسمح لي اقولك.. معناه ايه بعد الحادث إن المحافظ يقول هشكل لجنة.. وان بتاع المسطحات يقول هنشدد الإجراءات.. ومجلس الوزراء يطّلع بيان.. والتضامن "تتضامن" وتدفع فلوس.. مش ده المطلوب.. وليه .
_فاكر معدية الوراق اللي كانت في شهر 8 اللي فات .. أيوا ومات وقلنا نفس الكلام .. وهب الله يرحم ال مات وحاكم العايش ..طب كلامنا "تنظير" بس ..لازم كل محافظ يكلف كل رئيس مدينة وينزل ويشتغلوا ومن غير مصايب.. مينفعش بعد المصيبة نقول هنشكل وهنحبس ونطلع قرارات.. مفيش فايدة.. وربنا هيحاسب الناس دي والله ويتحاكموا
_وبمناسبة المحاكم ..فالنهارده بنت الرئيس الأسبق محمد مرسي تابعت جلسته وابنه عبدالله تابع جلسته في قضية التخابر.. طب وده عادي.. أها عادي.. مرسي سجين وله حقوق وبمناسبة الحقوق وكده فقائد الحرس الجمهوري قال ردا ع الدفاع .. مرسي مكنش محتجز بعد 30 يونيو كنّا بنحميه وكان فيه ناس بتزوره.. بس خلاص
_وبكل أسف حديثنا عن مرسي يفكرنا ب قاضي الإعدام ناجي شحاتة.. اليوم اتنظر رده الخاص بمنعه من محاكمة المتهمين في "خلية أوسيم".. لأنه ذو "هوى سياسي" لما عمل حوار في "الوطن" وقال كلام كتير وكبير.. ونظر الرد حقيقي مش مهم.. أمال إيه المهم
_المهم ان المحامي اللي عمل طلب الرد قال ل"الشروق" من شوية : أنا قدمت شكوى لمجلس القضاء الأعلى لأن شحاتة انخرط في أمور سياسية، وهيتحقق مع شحاتة لأنه وصف 25 يناير ب25 خساير ".. والشكوى حملت رقم 3483.._تخيل انت بقا.. الراجل ده "بلغ" ولسه تامر ما بلغ.. تامر.. تامر مين ؟! أقولك.. أصل ناجي شحاته قال: "قفشت تامر مليون مرة في ملهيين بالزمالك".. وتامر حقه يبلغ لأن ده تشهير.. أي والله !
_وجبنا سيرة الزمالك .. شيكابالا هيلعب النهارده ضد المقاصة وهيكون هو الحدث بتاع الليلة.. وده ما ينسيك ان عماد متعب "سلك" الخناقة بين وليد سليمان وحسام غالي في تمرين الأهلي
_ولا ينسيك إن محمود طاهر اليوم قال: "إحنا عايزين نتعين وبلاش تحلوا المجلس".. يا باشمهندس محمود ده حكم قضائي مش 3 دقايق وقت ضايع ..اهدى واستنى .. ربنا هيحاسبك ع اللي عملته في الأهلي .
_وبمناسبة ربنا هيحاسب الناس دي .. فلاح الفرافرة اللي قالوا إنه بيمثل وكده.. اتكلم وقال أنا موظف الصبح وفلاح بعد الضهر، بساعد "أبويا الحج"، وربنا هيحاسب اللي ميعرفوش حاجة عني وهاجموني.. ده مهم
_ده مهم طبعا.. بس فيه أهم.. إنه قال الكلام ده في برنامج "آخر النهار" بقناة النهار.. وده مش مهم.. الأهم إن زميلي وصديقي محمد الدسوقي رشدي، صار مقدما لبرنامج "آخر النهار"، وهو إضافة كبيرة ومهنية بعيدا عن الهرتلة .
_وعشان كله ميبقاش ضرب.. ضرب ضرب .. ضرب.. قول: "البعض نحبهمفنملأ الأرض بحبهم ونحدث الدنيا عنهم.. ونثرثر بهم في كل الأوقاتونحتاج إلى وجودهم.. كالماء.. والهواء ونختنق في غيابهم أو الابتعاد عنهم "