كل سنة وحضراتكم بخيرساعات ونودع 2015 بحلوها ومرها وقسوتها ودمها وفرحتها، وهنستقبل سنة جديدة -إن شاء الله- خير عليكم وعلى بلدنا، وعليه هتحس أن الدنيا مختلفة شوية اليوم يلا بينا.
البرلمان زي ما قلنا يوم 10 يناير أول جلسة، ومن غير المستشار عدلي منصور واضح أن الرجل قال "أبعد عّن الهرتلة والمهرتلين"، والأقرب لرياسة البرلمان بعيداً عن علي عبدالعال هو المستشار سري صيام اللي كان من بين 28 اتعينوا النهاردة، وسري كان مستشارا قانونياً لفتحي سرور أيام ما كان سرور رئيساً للمجلس أيون أيون.
وده كله ما ينسيك أن 2015 كانت مرة وحلوة، وفيها دم كتير، ومات كتير جنود غلابة في سيناء، وضباط في القاهرة والجيزة والمحافظات، لكن يبقى اغتيال النائب العام المستشار هشام بركات هو الأبقى ليس لأنه مختلفا عن جندي مات في سيناء، لكن لأنه كان واحد من أهم أضلاع الدولة أو على رأس هرم وهو النيابة العامة، والحقيقة أننا ما عرفناش مين بالضبط اللي قتل النائب العام، ولا كيف اخترق الموكب، ولا عرفنا برضه مين قتل مشجعي الزمالك في فبراير وكانوا أكتر من 20، ولا مين عملهم القفص الحديدي، لكن عرفنا مين اللي قتل شيماء الصباغ، وطلع من بين 30 ضابط ومجند واتحبس وصدر ضده حكم.
والغريب برضه اننا منعرفش ليه اتحفظوا على أموال أبوتريكة، وليه حسبوه على الإخوان، والراجل عمل حوار إمبارح مع الجريدة الكويتية قال فيه كلام كبير وحازم، قال "أنا مش إخوان" ومطلبتش من الرئيس الأسبق مرسي يفرج عن ابن عمي، وقال لا أعارض النظام الحالي، وسواء بتكره أو بتحب " تريكة " هيظل "حدوتة مصرية"، وقيمة كبيرة جدا، وأسطورة هتعيش سنين.
وبمناسبة هتعيش سنين، إحنا فقدنا في 2015 نجوم كبار، أبرزهم فاتن حمامة، وعمر الشريف، ونور الشريف، والشاعر الكبير عبدالرحمن الأبنودي، والفنانة ميرنا المهندس، والروائي الكبير جمال الغيطاني، واللي ماتوا وأدفنوا عليهم رحمة الله، يفكروك أن الرئيس الأسبق مبارك مات 13 مرة، ولسه قاعد في مستشفى المعادي العسكري متحركش وبيطلع من الشباك يشاور لأنصاره، وده كل ما ينسيك أن 2015 كان عام فقير رياضيا، على مستوى المنتخبات.
ومحدش ينكر أن الزمالك هو الفريق الأفضل والأروع هذا العام، وجاب كأس ودوري، وكسب الأهلي لأول مرة من سنين، وبمناسبة الأهلي، فالأهلي عكنن على الزمالك، مش عشان خد منه كأس السوبر وهزمه 3:2 ابدا والله، طب عشان كسبه في الدوري بالدور الثاني 2:0 وضيع فرحة فوزه بالدوري ابدا والله، أقولك أنا عشان لاعب كدة في الأهلي لسه مطلع بطاقة السنة دي، وحريف شوتين اسمه رمضان صبحي وقف على الكورة في ماتش، وطبعاً وده يفكرك ب"الشلوت"، اللي كله رمضان صبحي من كابتن الزمالك بعد الوقفة على طول، ورجعوا اتصالحوا في فرح ، لكن رمضان لأنه "غلاوي"، عملها تاني في ماتش السوبر، وخلى حازم اللي كان بره ال18 ينزله من المدرجات، وكان عايز يضربه تاني.
وما تنسى أننا ماعرفناش مريم أخدت أزاي صفر في الثانوية العامة، ولا مين رمى طفل رضيع في مستشفى بالغربية من الدور التالت ولا مين حط قنبلة في الطيارة الروسية، ولا عرفنا ليه تامر مش هيبلغ ضد ناجي شحاتة لأن ناجي شحاته شهر بيه، وقال بيسهر في ملاهي ليلية ومسكتوا كتير.
وعشان منفتكرش النكد بس، افتتحنا قناة السويس ومشروع الضبعة هيشتغل، وبدأنا استصلاح مليون ونصف مليون فدان، ومحمد النني راح أرسنال، ومحمد صلاح متألق في إيطاليا وَعَبَدالواحد السيد حارس الزمالك بقى مهاجم فريق نجمة سيناء، أي والله، مهاجم فرقة في الدرجة التالتة أو التانية ، وعشان كله ميبقاش ضرب ضرب.. قول "حبيبي يا موكب حب.. يا دفا للقلب.. يا بحر من الحنان.. يا أمي وأبويا وصاحبي وأخويا ونصيبي من الزمان.. اسقيني يا حب عمري.. أروي القلب العطشان.. ده كأني ما فارقتك أبدا أبدا لحظة من الزمان ".