علاقة إيدي بدموعها..
علاقه فريدة من نوعها
أحس الدمعة هتخونها
ف أبص ف عينها وأحضنها
وأطمنها.. وأهديها
وأوديها ف مكان حبّاه
ونشرب فناجنين قهوة
وندخل سنيما لو حابين
وأدارى نفسي ف عيونها
ف "وضع جنين"

وأبص ف عينها وأسرح
فيها وأنا ساكت..
تقول مالك؟!
أقول مالي؟!
هقولك أيه؟!
بحبك كلمة لو تتقال..
هتوصف أيه عن اللي اتحس
بحبك حب بيخلينا نسكت بس!
بحبك والكلام بيقل..
لإن الحب أصله سكوت
كفايه تكوني مبسوطة
ساعتها هكون كمان مبسوط..
وأحس كأني طفل ف عيد
كأن الحزن عمره ما كان
كأن الحضن لبس جديد
كأنك عايشة جوايا
وماشيه من وريد لوريد
ودايرة تكسري ف حاجات
بكل براءة وطفولة..
كأني ف حلم مبيخلصش
كأنك دايرة مقفولة..
بحبك.. حب بره دواير التفاصيل
وبره ملامح المكياج..
بحبك حب كل كلامنا فيه
أصلا بدون مونتاج..
ف عمرى ما ببقى مضطر إني
أشرحلك كلام اتقال..
عشان واثق بإنك ظانّه فيا
الخير..
عشان واثق بإنك "غير"
وإن كلامنا عمره ما كان
ف حاجة لشرح..
وإنك تذكرة سفري لبلاد الفرح
وإنك إيد هتسحبني.. بعيد عن عالم
الأحزان..
بعيد عن كل ضلمه وخوف
بحبك حب مش مألوف..
بحبك قد فرحة بشوفها ف عيونك
ف وقت ما ببقى جايب ورد..
بحب ملامحك المهدودة آخر اليوم
وصوتك وأنتي عندك برد..
وتكشيرتك وسرحانك..
وقلقك م اللي لسه مجاش
وندمك ع اللي ضيعناه
مفيش راجل هيبقى عظيم
بدون ما يلاقي ست وراه
وأنا قابلك على عيوبك
شايفها وراضي باللي اتشاف
وواثق إننا قادرين..
نحل أنا وإنتي أي خلاف
عشان فاهمين ومتفاهمين
وخدنا الحب أجمل وعد
وعارفين إننا ناقصين
وده علشان نكمل بعض