بيچامة كاروهات

نفسك خطيبك يحبك ومش عارفة؟ نفسك تلاقى عريس ومش قادرة؟ عروسة ونفسك تعرفى المفروض تجيبى إيه فى جهازك؟ لو نفسك تلاقى إجابات الأسئلة ديه يبقى كملى المقال.. لو مش عايزة يبقى برضه كملى المقال ومتحرجنيش.
للعروسة الجديدة اللى بتجهِّز: عزيزتى إبعدى كل البعد عن الكريستالات «البوهيمى»، و«الفيفث أڤينيو» لإنك هتتقهرى لما تلاقى حماتك بتقولك عالڤازة «الفيفث أڤينيو» حلوة «الزوهرية» دية يا بت يا سوسن جايباها من «أبوذكرى» صح؟! أو لما تلاقى جوزك بيقزقز لب فى البونبونيرة «البوهيمى».. فكك من العلب البلاستيك الكتير لإنك لما تحبى تشيلى بقية الأكل «ده لو كان فيه أكل أساساً» هتشيلهم فى طبق «فويل» لإنك هتقولى «أهو يترمى بدل ما أقف ساعة أغسل فى علب».. فكك خالص من «البيبى دول» و«الأرواب» الشفتيشى لإن والله الزوجة المصرية عكنانة ومبتقلعش لا الإسدال ولا البيجامة الكاروهات وياريتها بتبقى بيچامة شيك! إطلاقاً بيچامة الزوجة المصرية ليها ستايل خاص! بتبقى عبارة عن بنطلون قديم قِصِر عليها أو اتقطع فقصته وبقى شورت لأ وبتقصره أوى وتقوم مقطعة حرفه من تحت اللى هو هوت شورت بشراشيب وبتاع!، أما بالنسبة لبلوزة البيچامة فغالباً بتبقى «توب» خروج مبقع والاستخسار حوله لقسم البيچامات!.. فكك من الصينى والكاسات وطقم المعالق الغالى صدقينى مش هيطلعوا من البوفيه.. فكك من طقم الجيلى وقوالب الكيكة «آه كيكة متمثليش» لإنك والله ولا هتعملى كيكة ولا هتعملى چيلى.. إياااكى و«المج» الكيوت اللى عليه اسم الحبوب خطيبك لإنك بعد الجواز مش هتستحمليه هو شخصياً فأكيد مش هتستحملى المج اللى عليه اسمه!! ابتعدى عن شراء منتجات «ڤيكتوريا سيكريت» كلها وخاصةً «البودى لوشن» لإنك بعد الجواز يا عزيزتى البودى لوشن بتاعك هتشتريه من صيدلية «حمدى» اللى على ناصية بيتك واللى هيبقى عبارة عن «ڤولتارين» أو «كانستين» أو أى حاجة فيها «إيين».
للى عايزة خطيبها يحبها: رددى جملتين الأولى «بجد أنا بحب مامتك أوووووى «و«بجد مامتك طيبة موووووووت» وزودى فى الواو على قد ما تقدرى.. ضيفى جملة «إنت عارف إن دى أول مرة» قبل أى حاجة يعملها لك يعنى مثلاً «حبيبى دى أول مرة حد يمسك إيدى».. «أول مرة أتخطب» كدة يعنى.. ومتنسيش كلمة «حاضر» على أى وكل حاجة يقولهالك!
للى عايزة تقرف جوزها: حبيبتى اطمنى مدام إنتى «المدام» فانت كده حققتى 99٪ من التارجت بتاعك.. بس ده ميمنعش إنك تحاولى تقلبى وشك أكتر.. ضيقى عينك.. كشى حواجبك وارفعى حاجبك الشمال «أيوة زى ما عملتى دلوقتى بالظبط».. زودى فى فورمة الشعر الكيرتى! اهتمى بالشياكة بمعنى أن لما تلبسى بنطلون بيجامة مقلم تلبسى عليه بلوزة منقطة وبهتان عليها فانلة حمرا بلاش البلوزة اللى بهتان عليها فستقى، ديه خليها تلبسيها له فى المناسبات مثلاً يوم عيد ميلاده أو يوم الڤلانتين.. وأخيراً لا تتوقفى أبداً عن ترديد جملة «شفت أمك عملت إيه».
للى نفسها تلاقى عريس: عزيزتى موضوع العريس بيعتمد على لوكين، اللوك الأول هو: اتحجبى.. متحطيش ميك آب.. متعمليش حواجبك.. إلبسى «سكيرت» وبلوزات طويلة.. شيرى بوستات دينية فقط.. حطى صورتك عالفيس بوك صورة دبدوب وإمسحى الواتس آب من على موبيلك.. أما اللوك تانى هو: إقلعى.. اعملى تاتتو وإلبسى خلخال.. اخرجى فى «ذا ليمون ترى أند كو».. البسى بنطلون چينز مقطع جداً.. إتكلمى كدة «بيجاااد انته موش موكمن» ولما تيجى تقولى جامد أوصفيها بجامد «فش*».. اكتبى شتايم على قد ما تقدرى فى تويتاتك.. وحطى صورتك عالفيس بوك صورتك وإنتى عاملة التان التمام وكتف بلوزتك واقع ومبين حمالة البيكينى ذات اللون النيونى الفاقع.. وللفصيلين قولوا كتير مامى وبابى ووانتوا بتقولو بابى لازم تتكوا عال پي!
ست الكل.. عزيزة قلبى مع كامل تمنياتى ليكى بالنجاح والتوفيق.. يلا أوروڤوار.