عن سخافة العرسان الجداد لما تروحلهم بيتهم تباركلهم وتلاقيهم بيفرجوك على بيتهم السخيف الممتلئ بحيطان سبونچية نبيتية بيئانة! ويقعدوا سنتين ونص يشرحولك عن مهارة وحرفنة "النقّاش"، وإنت طبعا لازم تفضل تهز في راسك وترفع حواجبك قال يعني مبهور! بعد ما تاخد كورس عن فنون النقاشة يقعدوك في الصالون المدهب الممتلئ بالقويمة، وقدامك ترابيزة تحمل رخامة زيتي عليها مفرش "صِرمة" سخيف، العجيب بقي إن الترابيزة مكتظة بالكريستالات "البوهيمي" و"الفيفث أفينيو"، وتبقى نجم لو لقيت حتة فاضية تقدر تحط فيها كوباية العصير اللي هيقدمهولك! سؤال بقي إنتوا حاطين الترابيزة ليه! لما الضيوف مش عارفين يحطوا عليها عود كبريت! هتلاقي العريس الحبوب قايم يفتح البونبونيرة "البوهيمي" الممتلئة بشيكولاتة "باشيونيل" ويقدملك، طبعا فيه اللي بيعمل نضيف وبيقول "ميرسي" وفية الطفس اللي بفضل يفلي بعنية البونبونيرة بحثا عن أكبر قطعة شيكولاتة.. وبيبقى حظه فقر لما يختار أكبر واحدة ويفتحها وتطلع شيكولاتة "دارك"! تخلص الشيكولاتة وتفضل تكور في الورقة ودايما مبتبقاش عارف ترميها فين! المشكلة اللي بتواجهنا كلنا (نرمي ورقة الشيكولاتة فين!!) بتبقي غلطة عمرك إنك تفكر ترميها في الطأطؤة اللي قصادك، ساعتها هتلاقي العروسة زغرتلك وابتدت تهز في رجليها فقَصّر وحط الورقة في جيبك وخلاص! تخلّص الشيكولاتة وتبقي نفسك في بق ميه، بس مكسوف تطلب طبعا، فتلاقي العرسان الكيوت بيقوللك (يلا تعالوا عشان تتفرجوا عالشقة). فتقوم تبتدي "التور" اللي هتبتدي بأوضة نوم بيضا بتلمع يا ساتر! وسجاجيد "شاج مودرن" غالبا ما بتكون بني في أورنچ أو موڤ في جراي معرفش ليه! دا غير بقي الستاير المرصعة بالخرز والشراشيب حاجة أوڤر تجيب صداع.. تخلص أوضة النوم تدخل ع الليڤينج ال"إل شيب"! يا ساتر عالسخافة شيء ممل! طبعا لازم نلاقي مكتبة مودرن زيجزاجية الشكل مليانة صور سخيفة للعرسان! تخلص من الليڤينج ياخدوك يفرجوك عالمطبخ.. يا ساتر مطبخ بني كئيب وريحة توم الملوخية مزعج لازق فيه! عريس إتم وعروسة رغاية لازقين في قفاك وبيكلموك وريحة بقهم المُشع بتوم الملوخية هتعميك خلاص! بيقوللك (ها تحبوا تقعدوا في الليڤينج ولا في الصالون؟) ف لسه هتجاوب تلاقيهم بيردوا على سؤالهم ب (تعالوا الليڤينح عشان تتفرجوا على ڤيديو الفرح)!! ڤيديو الفرح! الضربة القاضية بالنسبة لأي حد بيروح يزور عرسان جداد في بيتهم! تدخل تقعد في الليڤينج وينشغل العريس بظبط وصلات اللابتوب لعرض سي دي الفرح على "إل إي دي" السامسونج وفي خلال الفترة دية مبيعتقوش الضيوف! لأ طبعا بيناولوهم صور الفرح والهوني مون يطلعوا عينهم فيها! وتبقي ليلة والدتك سودة لو معلقتش على شياكة ولذاذة العرسان في الصورة ال434 اللي راكبين فيها عالفيل! تقوم العروسة تجيب عصير ولا سڤن للضيوف ولازم تغيييييب طحن يعني مبترجعش غير بعد ساعة إلا ربع! هتلاقوها غالباً شايلة صينية "سيلفر" إيديها خشب وعليها كاسات رفيعة وطوييييييييلة! طووووويلة طحن، وفي هذه اللحظة العريس خلص توصيلات التلڤزيون وإنت سلمت الألبومات! أصعب لحظة بتمر عليك وإنت رايح تبارك للعرسان هي اللحظة اللي بتفضل تحاول تقنعهم إنك كنت في الفرح بنفسك وشفت كل فقراتة لايڤ! بس مفيش فايدة برضو لازم تفضل تتفرج على أم الڤيديو بتاع الفرح ولازم تفضل تقول للعروسة (بجد كنتي قمر) طوال ال 456 ساعة بتوع الڤيديو! وهنا قامت الدولة بأجدع واجب! النور قطع والحمدلله خلصت من الڤيديو ومن العرسان ومن ال"إل شيب" الرذل ومن الحيطان النبيتي والسجاجيد الفتل! قررت تقول مع السلامة وهما واقفين عالباب رغي رغي رغي، وبيفضلوا يقنعوك تستنى النور ييجي عشان هما في الدور العشرين.. بس إنت خلاص اخترت.. إخترت السلم.. هين رجلك ولا تهين نفسك!
