أنا مش عايز ستات!

دائما تجرى الحوارات الصحفية مع وزراء وساسة وفنانين، ولكن.. هل فكرت فى إجراء حوار صحفى- غير تقليدى- مع مضرب عن الزواج، سألته عن سبب اضطرابه عن الزواج رغم بلوغه الثلاثين، سألتها عن سبب رفضها لكل العرسان الذين تقدموا لها رغم أنها تجاوزت ال«29» الزواج رغم أنه أصبح عملة صعبة إلا أن الرفض الممنهج للفكرة هو الأمر الجديد على مجتمعنا، على السطور التالية حوار مع شاب وفتاة قررا العزوف عن الزواج كمبدأ وليس كأمر واقع.
بعيدا عن الجملة الدائمة «مش هنفرح بيكى بقى» والتى غالبا ما تقال للفتاة ال single ظهر مؤخرا جملة- سخيفة أيضا- وهى «يلا بقى شد حيلك» ولكنها تقال لنا نحن معشر الرجال، طيب لنتخيل المشهد الآتى:

مساء الخير يا عمو أنا كنت عايز اجى اشرب مع حضرتك فنجان قهوة.. ويرد «عمو» فى سماجة: طبعا يا حبيبى تنور، قبل ما تروح البيت أكيد هتتكلم مع حبيبتك اللى ماشى معاها بقالك سنتين ونص على الكورنيش رايح جاى تأكلها فى فشار وتقولها.. يا ترى أهلك أخبارهم إيه لطاف ولا.. وقبل متكمل الجملة هيكون الرد طبعا يا روحى أهلى دول أنت هتحبهم جدا جدا، دى حتى ماما هتعملك المحشى اللى بتحبه!!

طبعا إنت زى الأهبل هتصدق وتقرر إنك تروح البيت وتشترى علبة شيكولاته بالشىء الفلانى وجواك بتدعى وتقول «بالسم الهارى ياولاد ال..» وترن جرس الباب وتلاقى راجل لابس نضارة ويقولك اتفضل يابنى وتبقى دى بداية النهاية- فى أغلب الأحيان- وفجأة يتحول عمو اللطيف وطنط اللى عامله فيها الشيف شربينى لمنكر ونكير، شغال إيه يابنى، ويا ترى بتقبض كام، والشقة فين وكام متر، وناوى تجيب شبكة فى حدود كام، وفجأة وعلى طريقة محمود سعد.. اشرب العصير.. وغالبا بيكون عصير «أجا» أبو جنيه ونص!

عادى، كله يهون عشان تحقق رغبة أهلك وتشد حيلك لكن اللى فات حمادة واللى جاى حمادة تانى خالص، يا ترى بقى هتنتخب حمدين ولا السيسى، وده اللى انت مكنتش عامل حسابك عليه يا فتى وتقول لنفسك أقولهم إيه ولاد الكلب دول، حمدين ولا السيسى ولا مرسى رئيسى؟

- تقرر إنك إنت تكون حيادى وتقول والله يا عمو أنا ماليش فى السياسة وتبتدى حياتك بأول كدبة، الغريب بقى إنك من حقك تسأل زى مبيسألوا يعنى من حقك تعترض على نوع العصير اللى بيتقدملك لكن بتبلع كله عشان تكمل نص دينك وعشان مصر!

المهم تبص فى الساعة وتقول طيب استأذن أنا بقى يا أونكل وفرصة سعيدة يا تنت.
وتبص للشيكولاتة فى حزن وتنزل مرددا اغنية «مش هروووح».

لو حضرتك قررت تكمل الجوازة دى أحب أكلمك شوية جد بقى.. اسأل نفسك سؤال.. عايز تتجوز ليه؟ عشان تبطل شقاوة وقلة أدب، ده على أساس إنك فعلا هتبطل طيب بص حواليك كده فى أصحابك المتجوزين هتلاقى الهم نازل عليهم وبيقضوها برة البيت، إنت لو شغال فى مكان واحد ومرتاح فيه أحب أبشرك إن بعد جوازك هتشتغل فى 3 أماكن عشان تجيب بس حق البامبرز.

إنت محتاج تقريبا لنص مليون جنيه عشان تتجوز، آه والله بجد، الشقة حوالى 200 ألف جنيه والتشطيب 50 ألف والشبكة 30 ألف والعفش- النص بالنص- 50 ألف طبعا متنساش المؤخر لأنك أكيد هطلق الأموره فى يوم من الأيام قول بعد الفصال 50 ألف والفرح لو مش هتعمل يعنى وآخرك كتب كتاب 10 آلاف والخطوبة بقى والخروجات وفستان الفرح والهدايا وخصوصا هدية عيد الأم يبقى هتقفل النص مليون جنيه يا برنس.. قصدى يا عريس.

بس المشكلة مش فى الفلوس، المشكلة الأكبر فى نصك التانى.. لأن نصك التانى بعافية شوية هن لايصلحن للزواج من أساسه، ناهيك أن 90 ٪ منهم مش ولابد وسى دى هاتهم مع رئيس القلعة البيضاء.

ياعم جواز ايه وكلام فاضى ايه.. يا راجل «كبر مخك»