عن أول "كسرة" فى حياتك

لأنك شاب مصرى لازم تتكسر.. أنا مش بكتب الكلام ده عشان أهاجم بيه البلد دى لأنى بين أصحابى معروف إنى أكتر واحد بحبها وديما بهاجم أى واحد بيبقى عايز يمشى ويسيبها.. بس الحقيقة لازم تتقال احنا شباب اتكسر من وهو صغير وكل يوم بنتكسر زيادة ويا عالم امتى هايجى اليوم اللى نقف فيه قدام كل حاجة كسرتنا ونقولها احنا أقوى منك.. خلينى أقول الكلام فى كام نقطه عشان مانتوهش وسطه.. كلام عن كسرة النفس فى البلد دى :
1- بتكون أول كسره فى حياتك- وبتكلم هنا عن كسره بجد مش عشان أنت بتدلع- لما بتخلص كليتك ولأول مره تلاقى نفسك لازم تفكر وتاخد قرار وبيبقى اكتر إحساس مسيطر عليك التوهه،الضياع والخوف.. لأول مره بعد 16 سنه من التعليم وللى هو عباره عن طريق مرسوم قدامك ماشى فيه حضرتك ورا القطيع اشباهك اللى ماشيين بنفس النظام (احضر كورسات، هات ملازم وكتب، ذاكر قبل الامتحان، ادخل دش اللى كتبته، اطلع، سقطت مره، ذاكر تانى، امتحن ،مبروك نجحت، بقييت خريج جامعه) بتتخرج حضرتك ولا أنت فاهم حاجه ولا عارف حاجه. . فجأه بتلاقى عمو من أصحاب بابا بيسألك (ها يا حبيبى وأنت ناوى على ايه؟) طبعا السؤال بيبقى صدمه وبتكتشف فجأه إن جوه راسك عضو عمرك ما استخدمته اسمه العقل ويقال ان وظيفته اتخاذ القرارات ودراسة الظروف والتفكير.. لأول مره فى حياتك انت محتاج ترسم طريق لنفسك وتختار سكتك مش هتبقى مفروضه عليك.. مرحله من الضياع بنعيشها بعد التخرج مابنكونش فاهمين فيها حاجه ولا عارفين المفروض نختار ازاى ولا ناخد رأى مين ولأول مره تكتش إن صحابك ملهمش لازمه مش عشان هما وحشين إنما لانهم تايهين زيك بالضبط. عايز تتفرج على الكسره دى روح أى قهوه هتلاقى مجموعة شباب قاعدين باصيين فى السما اكنهم مستنيين حد ينده عليهم ومابيتكلموش وكل شويه واحد بيقوم من سكات يروح على أمل إن بكره حاجه هتتغير..
2- تانى كسره لما تتعب من التفكير وتقرر انك مبدئيا تشتغل بشهادتك لحد ما توصل لقرار نهائى وده بيكون بناء على نصيحة من عمو تانى (يا بنى أول ما تشتغل هتلاقى نفسك ميال لحاجه معينه كمل فيها) ولأنك أهبل بتصدقه وبتنزل تدور على شغل.. هنا بقى بتواجه كسرة العنصريه المنتشرة فى بلدنا العزيزه فلو أنت مش خريج
AUC , GUC وأمثالهم فابقى قابلنى لو اشتغلت أو شفت ريحة شغل بشهادتك اللى أنت فرحان بيها دى وبتلاقى نفسك محتاج بتاع 3-4 سنين دراسه كمان بين كورسات ودبلومات عشان تعرف تلاقى شغل ولو أنت جامد بقى وعرفت تعمل ده تلاقى كل الشركات المحترمه بعد ال 3 سنين دول بيقولولك انت دراستك كويسه بس مفيش سنين خبره.. البس بقى شهاداتك !!
3- تالت كسره بقى ودى بتبقى اشدهم.. كسرتك لما بتبص فى عين أبوك وأمك وتشوف كسرة نفسهم وهما بيتفرجوا عليك وأنت فى المتاهه دى.. ماهو للأسف أبوك كان بيحلم زيك برده إنك لما تخلص كليتك ويبقى معاك شهاده هتتوظف وتبقى إنسان محترم ويفرح بيك.. فجأة بتلاقى نفسك بتهرب من القعدة فى البيت قدام أهلك وتنزل تقعد فى القهوة باصص فى السما مستنى حد ينده عليك وشويه وتاخد بعضك وتروح متأخر عشان يبقوا ناموا ومتضطروش تهربوا بعيونكم من بعض عشان مفيش كلام يتقال غير إن شاء الله بكره حاجة هتتغير.
كل الكلام ده صح وبيحصل لكل الشباب بس دايما فيه ناس مختلفة وناس بتنجح مش عشان هما عندهم حاجه زيادة عنك أو أذكى منك.. الموضوع ببساطة إن الناس دى ما بتمشيش فى الطابور وبيدوروا ديما على سكك جديده، حاجه هما شاطرين فيها، حاجه هما بيحبوها ويبدأوا واحدة واحدة يتعلموها ويمشوا فيها. جايز يقعوا مرة واتنين وعشره بس أكيد بتبقى أحسن من القعدة على القهوة والبص فى السما.. ولو المشوار فى بلدك طويل فلازم أنت تدور على طرق مختصرة لأحلامك جايز فى يوم نعرف إحنا نقصر الطرق على ولادنا.