م الآخر| يوميات موسيليني وعطية "بيسو في درينكيز" (20)

طلعت عطية كلمت فوففا وقالتلها اللي حصل، "أقصد اللي محصلش ودة طبعاً لأن مفيش بنت بتحكي اللي حصل!" عطية مسكت أساس الموضوع، اللي هو إن موسيليني صالحها وأضافت البهارات والتوابل، بمعنى إنها حكت إن موسيليني بعتلها مسدچ "هو اللي بعت واخدين بالكوا!" وهي طبعاً مردتش عليه، بس مقلتهاش كدة طبعاً! تعالوا شوفوا عطية قالت أية: "يا بنتي موسيليني بعتلي مليون مسدچ وسابلي 800 ميسد كول، وأنا طبعاً معبرتوش يا بنتي، فقام مكلم جوز عمتة أونكل سيد عشان هو لواء كبير في الداخلية فطبعاً الداخلية قلبت عليا الدنيا عشان خاطر موسيليني كان عايز يلاقيني فا الصول عبعال كلم موسيليني وقالة "الآنسه عطيه في سيراميكا كوفية" فا طبعاً موسيليني جه جري يا بنتي عالكافية وجايب معاة بوكية ورد كبير موووووت و كولييه دهب".
ولإن عطية بنت مصرية أصيلة فداست "شيفت ديليت" للواقع وللحقيقة! وطلعت موسيليني هو اللي هيموت ويصالحها وكلمها، وقعد يعيطلها وبعتلها أونكل سيد يعيطلها وجابلها كادوة جامد واو فإضطرت ياعيني تصالحوا.. آااااه يالحوارااااات فكك بقي مالبناااااات (عايدة الأيوبي ستايل).. دخل موسيليني عليها "ويتينج" فعملت برضو زي أي بنت مصرية أصيلة قفلت مع صاحبتها "هم دول البنات ييجي الشاب تبيع صاحبتها واللي جابوا صاحبتها" الشاب يخانقها تجري علي صاحبتها وتكلمها بالساعات وتفضل تقولها قصيدة "إنتي أختي!" عطية قفلت معا فوففا عشان تحب في الأخ شوية.
فوففا أول ما قفلت التيليفون معا عطية جريت وبعتت لإبليس عالواتس آاب (إية مالكوا مستغربين لية علي فكرة إبليس معاه سامسونج إس نار شاشة لسع) قالتللة: إنت فين يا إبليس كل دة؟
إبليس: هاي سويتي أنا في "درينكيز" بجيب درنك مشبر ليا أنا وإبليستي.. بس متخافيش أنا عملتلك الكارنية وبجد صورتك فية مزة موت و هاستلموا كمان 4 أيام!
فوففا: كارنية إية و زفت إية.. عطية و موسيليني إتصالحوا و حضرتك سايبهم وبتشرب!
إبليس: أووه ماااي ديڤيل! دونت ساي زات!!
فوففا: خد الدرينك بقي بتاعك و طيران عليهم
إبليس: قصدك أطير "عليها".. أنا مليش كلام عليه
وفعلاً إبليس تخلى عن مزتة وطاااااار عشان يلحق عطية
وطول ما هو في الطريق مكنش عارف يعمل إية عشان يبوظ اللي موسيليني عملة! وصل هناك عندها وهو داخل الحيرة كانت قايمة معاة بالواجب.
وفجأة إبليس إبتسم أوي وقال.. جاتلي فكرة وقعد يغني "الجوازة باظت الجوازة باظت"
إبليس قرر إنة أول ما يدخل ل عطية يقولها
يتبع