م الآخر| قواعد الشَبَكَة الأربعون

قررت أن أكتب إليكم من خلف خطوط العدو.. مراسلتكم من قلب الحدث إليكم آخر الأنباء.
1- الشَبَكَة بتقطع كل يوم.
2- لما الشَبَكَة تقطع التليفون الأرضي، والموبايل، والإنترنت بيقطعوا معاها.
3- الشَبَكَة بتقطع أول ما تكون محتاجها.
4- لما الشَبَكَة تيجي بنعمل فرح، ولا كأن المنتخب كسب كأس العالم.
5 لما الشَبَكَة بتيجي لازم تلحق تعمل كل مكالماتك؛ عشان ممكن تقطع تاني.
6 لما الشَبَكَة بتيجي بتبقى مش مصدق نفسك، لدرجة إنك ممكن تفقد القدرة على النطق لما تسمع حد بيقولك "ألو".
7 لما الشَبَكَة بتيجي بتبقى مش مصدق، لدرجة إنك ممكن "تطرش" لما تسمع موبايلك بيرن.
8 لما الشَبَكَة بتيجي بتبقى مش مصدق، لدرجة إنك بتكدب نفسك، وتقول إن دي هلاوس، وخيالات، وفصام.
9 لما الشَبَكَة بتقطع بنرجع للقرون الوسطى، وعصور الظلام في أوروبا.
10 لما الشَبَكَة تقطع ممكن تبعت استغاثة بطريقة "دواير الدخان" زي الهنود الحمر.
11 لما الشَبَكَة تقطع ممكن تبعت لصاحبك جواب.
12 تجارة الحمام الزاجل بتكون مربحة جدًا لما الشَبَكَة بتقطع.
13 لما الشَبَكَة تقطع ممكن تتفق مع صاحبك على المكان، والزمان كعصور ما قبل الموبايل.
14 لو مستعجل على صاحبك وصلوا كوبايتين بلاستيك بخيط، وتمتع بأنقى صوت.
15 لما الشَبَكَة تقطع قول دعاء قطع الشبكة "الله يخرب بيتك يا مرسي".
16 قول دعاء قطع الشَبَكَة "الله يخرب بيتك يا مبارك".
17 قول دعاء قطع الشَبَكَة اللي بيقول "يخرب بيت اللي كان السبب".
18 قول دعاء رجوع الشَبَكَة "لولولولولولي".
19 من فوائد قطع الشَبَكَة إنك ممكن تقفل النت، وتتعرف على الناس اللي عايشين معاك في البيت (ناس طيبين أوي يا خال).
20 من فوائد قطع الشَبَكَة إنها تنمي الروابط الاجتماعية؟ إنك ممكن تسأل أي حد ماشي في الشارع عليها.
21 من فوائد قطع الشَبَكَة إنها فاتحة للحديث مع أي شخصية، بدءًا بسواق التاكسي، وحتى العريس اللي متقدم لك "topic starter".
22 من فوائد قطع الشَبَكَة إنك ممكن تتخذها حجة؛ عشان تفتح كلام مع البنت اللي انت معجب بيها.
23- من فوائد الشَبَكَة إنها اختبار لأي علاقة بين اتنين.
24 لو مرتبط بواحدة بره سيناء، وقدرت تستحمل إنك متكلمهاش أكتر من 12 ساعة، يبقى اتجوزها (واحد مأذون هنا بسرعة).
25 لو انت من بره الشَبَكَة ، ومرتبط بواحدة من سيناء يبقي أمك داعيالك، مفيش تليفونات ولا زن لمدة 12 ساعة، ووقت ما الشبكة تيجي هتبقى واحشها.
26 من فوائد قطع الشَبَكَة إنها بتخلص الشاب من زن خطيبته، أو مراته.
27 من فوائد قطع الشَبَكَة إنها بتخلص البنت من حصار خطيبها، أو جوزها.
28 من فوائد قطع الشَبَكَة إنك مبتعرفش تطلب دليفري، وده حفاظًا على رشاقتك, وصحتك.
29 من فوائد قطع الشَبَكَة إنك مبتعرفش تطلب الإسعاف، وبالتالي لازم تنزل المستشفى بنفسك، وده يعلمك إنك متعياش تاني يا حيوان.
30 من فوائد قطع الشَبَكَة إنك مبتعرفش تطلب المطافي، وده يعلمك ازاي تشتعل، وتحافظ على الاشتعال (ياكش تشتعلوا كلكوا).
31 مصحة للعلاج من إدمان "الفيس بوك" و"السوشيال نيتوركس" هتبقى بيزنس هايل في سيناء.
32 من فوائد قطع الشَبَكَة إنك لو عملت حادثة هتضطر تطلع نفسك بنفسك، وتعالج نفسك بنفسك، وده يعلمك إنك تسوق على مهلك "سوق بكرة الشبكة تفوق".
33 من فوائد قطع الشَبَكَة إنك مش هتشتم في بتوع خدمة العملاء، وبتوع شركات المحمول؛ لإنك مش هتعرف تكلمهم تشتمهم أصلًا.
34 من فوائد قطع الشَبَكَة إنك مش هتلاقي حد يقولك تقفل "الراوتر" وتشغله تاني؛ لأن "الراوتر" في مثل هذه الظروف العصيبة لا يزيد أهمية عن "البونبونيرة" اللي عندكم.
35 من فوائد قطع الشَبَكَة إنك ممكن تخرج مع اصحابك (ده لو عرفت توصلهم) من غير ما تعمل "تشيك إن" أو تكتب "وااو يوم هايل فزيع مريع توووحفة مع اسديكائي" على "الفيس بوك".
36 من فوائد قطع الشَبَكَة إنها هتعمل أوت "السمارت فون" ميفرقش كتير عن العدة أم كشاف (كله مبيقولش ألو).
37 من فوائد قطع الشَبَكَة إنها تدربك على الصبر، وأعلى درجات ضبط النفس، وكأن شادية بتهمس في ودنك طول اليوم (بايديك قوة تهد جبال.. بايديك قوة.. وعليك صبر وطولة بال.. وعينيك حلوة).
38 من فوائد قطع الشَبَكَة إنها تعطيك فرصة للتأمل، والحديث مع الذات، وده ضروري للصحة النفسية للمواطن السيناوي.. لازم كل يوم تقف قدام المراية، وتقول 10 مرات "أنا مواطن غلبان.. أنا مش إرهابي جبان".
39 من فوائد قطع الشَبَكَة إنك بتكتشف ان عندك وقت فراغ، بعيدًا عن الرغي في التليفون و"الفيس بوك" و"الواتس آب".. وممكن ربما تتفرج على الست فيفي عبده، أو الأخت الفاضلة سما المصري.
40 من فوائد قطع الشَبَكَة إنها ممكن تخليك بعد الشر تذاكر مثلًا، وهي دي قمة الإعجاز العلمي.. شوف حكمة ربنا يا مؤمن.