الدنيا «ضلمة»!

النور قطع، وإن مقطعش يبقى أكيد هيقطع، وبدل المرة، مرتين وتلاتة فى اليوم، ودا مش معناه أى حاجة وحشة، ولا عيب فى الحكومة لا سمح الله، دى حكومة حرب.. ولا عيب دول الخليج الصديقة التى ساعدتنا بالوقود، ولا العيب فى المحطات المتهالكة.. العيب فيمن لا يفهم الحكمة من الظلام ولا يستغلها فرصة للتأمل. الضلمة نعمة لمن يفقهون، انظروا لنصف الكوب الممتلئ، قطع النور مش سوء إدارة ولا شعب مسرف فى استخدام الطاقة، دى نظرية فلسفية تحتاج لعمق فى التفكير، تعالوا نتأمل معاً:
■ الدنيا ضلمة يعنى العيلة هتتلم فى مكان واحد، ومحدش هينزل ولا يطلع وكده يتحقق التقارب الأسرى.
■ الدنيا ضلمة يعنى مفيش تليفزيون ولا توك شو، يعنى لا زعيق ولا صويت ولا هنشوف دم ولا مولوتوف ولا قتلى ولا أمن مركزى ولا محللين استراتيجيين ولا هنتغم لما نشوف الأهلى بيتغلب على أرضه من فريق ليبى مدربه مصرى!
■ الدنيا ضلمة وهننشغل بأحوالنا الصغيرة بدل الكلام عن الزحمة فى الشوارع ومظاهرات الإخوان ومؤامرات قطر وبذاءات علاء صادق وتخاريف محمد الجوادى الذى يؤكد أن رئيس وزراء مصر إبراهيم محلب إخوانى.
■ الدنيا ضلمة فلن نرى اشتباكات مؤيدى حمدين بمؤيدى السيسى من غير ما نفهم السبب، ولن نرى سباب التويتريين ولا فضائح الفيس بوكيين، ولن نسمع عن شائعات تنال من سمعة مذيعة ويتداولها البعض بلا خجل، دا حتى لو حصل «ألا سترتموها» ما هذا النهم المخجل للشماتة والإساءة والسب والقذف فى أعراض الناس بالباطل!
■ الدنيا ضلمة عشان مانشوفش ناس بتضحك فى وشك وهى مش طايقاك، تبارك لك وهى تتمنالك الفشل.. تحضنك والسكين متخبى ورا ضهرها..
■ الدنيا ضلمة.. يعنى مش هنشوف سلمى الخولانى وهى مقتولة ونعيط عليها، وعندنا زى سلمى مليون سلمى فى الطريق.
سلمى عروس يمنية زى القمر، جوزها رجع البيت وقتلها بالسكين بدون كلام ولا سلام، ليه؟!
الرجل الشهم كان فى كافيه للنت وشاف شاب فاتح الفيس بوك ولقى صورة مراته الجميلة سلمى، ولما سأله دى مين قاله دى حبيبتى ودى صفحتها الخاصة، الزوج الغاضب راح البيت جرى وبدون كلام ولا سؤال، جاب سكين وقتل مراته بلا رحمة لتتكشف الحقيقة الصادمة!
سلمى باعت موبايلها بعد ما مسحت كل اللى عليه، اشتراه شاب محترف نت، وقدر يستعيد كل صورها اللى كانت على الموبايل، كله على جوجل.. ولأن الراحلة كانت جميلة، وسوس إليه الشيطان إنه يعمل صفحة باسمها وصورها على الفيس بوك، لتدفع سلمى ثمن التكنولوجيا والجهل وسوء الخلق!
ألا ترون أننا نعيش فى ضلمة فى عز النور، ليه بقى زعلانين إن النور قطع؟!
اللهم نور القلوب المظلمة!