رغدة منير : مشاهدينا الكرام السلام عليكم ورحمة الله وبركاته و أهلا بكم فى حلقة جديدة من 45 دقيقة يمكن احنا لسه بنتابع مع حضراتكم الأحداث اللى بتمر بها مصر والحمد لله النهاردة كان فيه هدوء نسبى ساد المناطق اللى كان فيها بعد التوتر لحد كبير داخل ميدان التحرير الوضع كان هادى ، بعض المناوشات كانت على كوبرى قصر النيل طبعا بعد الأحداث المتأججة اللى احنا عشناها امبارح زى ما احنا شايفين على كوبرى قصر النيل فيه اشتباكات يعنى هو منظر بقينا تقريبا معتادين عليه نتمنى يا رب نشوف هدوء حتى لو كان نسبى لإن حتى الآن المشهد ملتبس يعنى دى اشتباكات حتى الآن غير مؤكد أهدافها محدش عارف مين وراها وامبارح كانت دعوة الحوار الوطنى واللى تمت فى ظل مقاطعة الطرف الأساسى الوطنى وخرج بمجموعة من النتايج أو مجموعة من القرارات اللى أعربت عن إن الرئيس على استعداد من حيث المبدأ لتنفيذها وبرضه ده لم يرض جبهة الإنقاذ كمان هنلاقى إن مع أعمال التخريب والاشتباكات طبعا كان فيه ضحايا وظهور بعض الجماعات زى البلاك بلوك المستشار طلعت عبد الله أمر بالقبض عليهم زى ما احنا شايفين على الشاشة دلوقتى التحرير بيشهد هدوء لحد كبير مع استمرار الاعتصام بنكمل معاكم ثانى المستشار طلعت عبد الله أمر بالقبض على عناصر البلاك بلوك ووجه لهم اتهام إن هم جماعة إرهابية بتقوم بأعمال تخريبية هدفها ترويع المواطنين وناشد الشعب والجيش المساعدة علشان نقدر أو تقدر النيابة العامة إن هى تلقى القبض عليهم أو توصل للتحقيق معاهم ودى لقطات للوضع أدام ماسبيرو الحركة طبيعية زى ما احنا شايفين على كورنيش النيل فى الاتجاهين واحنا دلوقتى هنحاول نشوف الوضع فى المحافظات بره بعد ما شفناه على كوبرى قصر النيل والتحرير وأدام ماسبيرو ومعانا حمادة العربى مراسلنا فى السويس مساء الخير إيه يا حمادة حمادة العربى : مساء النور يا رغدة رغدة منير : إيه الأخبار النهاردة عندك يا حمادة حمادة العربى : بالنسبة للسويس يمكن تسود حالة من الهدوء منذ الأمس وحتى اليوم هناك تنظيم لحركة الشوارع من حيث الضباط ووحدات متمركزة والكمائن لضبط مثيرى الشغب والخارجين على القانون أو أى أعمال بلطجة تحدث فى المحافظة هناك أيضا تأمين كامل لمجرى قناة السويس وكان النهاردة فيه زيارة لرئيس الجيش الثالث الميدانى وكذلك المحافظ إلى المجرى الملاحى للوقوف على التأمين الكامل لهذا المجرى هناك أيضا شباب السويس كان لهم النهاردة مؤتمر صحفى أكدوا على رفض حظر التجوال الذى صدر من رئاسة الجمهورية وأكدوا كذلك تضامنهم مع الرئيس وقوات الجيش فى محاربة الخارجين عن القانون لكنهم طالبوا باستكمال أهداف ثورة الخامس والعشرين من يناير رغدة منير : طب حمادة بس أنا فى الجزء الخاص برفض حظر التجول لمدن القناة يعنى وخصوصا عندك فى السويس يعنى العديد من القنوات والعديد من الشخصيات اللى كانت بتقول إن مدن القناة بتعيش حالة من التوتر والناس بتيجى استغاثات إن يتم إنقاذهم من محاولات للبلطجة والسرقة والتعدى يعتنى هل ده بيتنافى مع رفضهم لحظر التجول خصوصا إن حظر التجول بدء من الساعة 9 مساءًا ل 6 صباحًا وبالتالى دى فعلا فترة نشطة لحدوث اى اعتداء وبيكون اليوم بتاعهم خلاص خلص حمادة العربى : يعنى الآراء المتواجدة هنا يا رغدة تؤكد على إن إذا ما حد حظر التجوال من أعمال البلطجة وحد من أعمال العنف لكن على جانب آخر يمكن ميعاد حظر التجوال من التاسعة مساءً يمثل حالة من الفوضى فى محافظة السويس هنا من حيث أن أغلب أهل المحافظة من أعمال تجارية وسواء بعض التجار وأصحاب المحال التجارية يبدؤون فى هذا التوقيت العمل ومحاولة لكسب العيش مما يؤدى إلى إغلاق جميع المحال التجارية إذا التزمت بحظر التجوال وهو على فترة تراوح شهر يروا أن هذا الشهر كثير للغاية لا يستطيعون فيه أن يكفوا احتياجاتهم المنزلية واحتياجاتهم المالية إذا توقف أكل العيش كما يقولون لكن هم قالوا إذا كان لابد من هذا فمن الممكن أن يتم من الثانية عشر حتى السادسة صباحًا وألا يكون شهرًا ولا يمكن أن يكون أسبوعًا أقل من ذلك بقليل أو أكثر بذلك بقليل بحيث يتم حصر المشكلة أو تهدأ الأزمة وسوف يتم لإلغاء هذا الحظر رغدة منير : أنا بشكرك حمادة العربى زميلنا فى السويس ونتنقل لزميلنا عمرو مليجى فى محافظة الإسماعيلية أخبار الوضع عندك إيه فى شوارع الإسماعيلية عمرو مليجى : الأجواء فى محافظة الإسماعيلية تعتبر هادئة تماما منذ الأمس وإن كانت شهدت أمس احتفالية بسيطة استمرت حتى الساعات الأولى من الصباح تأكيدا ورسالة من شعب الإسماعيلية بأنه يرفض قرار حظر التجوال يعنى ربما الاشتباكات كانت محدودة جدا لم تستمر أكثر من نصف ساعة إلى قسم شرطة ثانى الإسماعيلية بالأمس اليوم الأجواء هادئة تماما الانتشار الأكثر نسبيا للقوات المسلحة فى بعض الشوارع الرئيسية فى المحافظة وتأمين المنشآت الحيوية مثل مبنى الإرشاد التابع لهيئة قناة السويس مبنى ديوان عام محافظة الإسماعيلية ومديرية الأمن وبعض أقسام الشرطة التى تشهد الاعتداءات المواطنون هنا يقولون أن قرار الحظر لم يكن إيجابيا فى مصلحتهم رغم أنه لم يكن هناك مرور لبعض قوات الشرطة والجيش لتنفيذ حظر التجوال يعنى الشوارع كانت خالية تماما من المارة وعدد بسيط من المارة فى الشوارع وبعض المحلات فتحت أبوابها حتى الساعات الأولى من الصباح ولم يقم أى أحد بتوجيهها بأنه يجب إغلاق المحال أو عدم المرور فى الشوارع هناك أيضا تظاهرة مساء اليوم يتم تنظيمها عند ميدان الممر الميدان الرئيسى فى محافظة الإسماعيلية وستشهد شبه احتفالية على أنغام السمسمية يعنى كرسالة بأن المحافظة هادئة ولا يستدعى حظر التجوال بها رغدة منير : طب عمرو كان فيه أخبار عن إن قد يتم التراجع أو مد حظر التجوال لشهر ممكن المدة دى تقل لو الأوضاع الأمنية استتبت هل ده خبر انتشر عندك فى الإسماعيلية والمواطنين تفاعلوا معاه مثلا عمرو المليجى : لم يتم متابعة لهذا الخبر حقيقة الجميع آخر ما توصلوا إليه أن المدة شهر وأن الميعاد من 9 إلى 6 وطبعا زى ما أشار الزملاء فى بورسعيد والسويس أيضا أن هذه المدة مدة كبيرة جدا وتوقيت عمل مناسب جدا للتجار والحركة التجارية فى الشوارع وبالتالى تعتبر المدة كبيرة لكن حتى الآن لم يتم التحدث عن خفض عدد ساعات حظر التجوال أو قلة مدة محددة بالشهر رغدة منير : طيب أنا بشكرك شكرا جزيلا زميلنا عمرو المليجى أطلعتنا على الوضع فى محافظة الإسماعيلية وزميلنا حمادة العربى فى محافظة السويس زى ما احنا شايفين الأوضاع إلى حد كبير هادئة فى محافظتين من المحافظات المهمة فى مدن القناة السويس ومحافظة الإسماعيلية وخلونا نرجع ثانى هنا للقاهرة على كوبرى قصر النيل ونشوف زميلنا حازم كمال يعلق لنا على المشهد اللى احنا كنا شفناه من شوية حازم إيه الأخبار عندك على كوبرى قصر النيل حازم كمال : المشهد لم يتغير منذ الأمس الموقف هنا سجال بين قوات الداخلية التى تقوم بإلقاء قنابل الغازات المسيلة للدموع على المتظاهرين من الشباب صغار السن الذين يقفون أسفل كوبرى قصر النيل يقومون من جانبهم برشق القوات الداخلية بالحجارة الجديد فقط أن انضمام بعض الشباب لقوات الداخلية لمساعدتهم لاعتقادهم أنهم يعانون الأمرين منذ يومين لأن المتظاهرين من الشباب لا يكلون ولا يملون من إلقاء الحجارة عليهم كما ذكرت فى التقارير السابقة من التحدث مع مجموعة من هؤلاء الذين يقومون برشق قوات الشرطة بالحجارة قالوا أنهم لا أحد يتحدث عنهم الكل يتحدث فقط عن النخبة والأحزاب السياسية سواء كانت معارضة أو مؤيدة لكن حتى الآن منذ عامين من الثورة ولا يتحدث أحد عن هذا الفصيل أما الشباب من صغار السن الذى يرى أن المستقبل مظلم على الجانب الآخر كوبرى قصر النيل مغلق تماما من الناحية المؤدية إلى مبنى اتحاد الإذاعة والتليفزيون كما قام المتظاهرين بغلق الكوبرى بوضع الأحجار ووضع المتاريس خوفا على المارة وخوفا قائدى السيارات من الصعود أعلى الكوبرى نظرا لقنابل الغاز المسيلة للدموع وحتى لا يصاب أحد بأذى رغدة منير : الزميل حازم كمال من أعلى كوبرى قصر النيل نقلت لنا الصورة ونروح على زميلنا فى الإسكندرية مصطفى ياسين ، مصطفى يمكن اسكندرية بعيدة عن منطقة التوتر فى القناة وبعيدا عن القاهرة كمان هى بتلعب دور مهم فى أى توتر وأى فاعليات بتشهدها القاهرة إيه الأخبار عندك مصطفى ياسين : موفد التليفزيون المصرى بالإسكندرية : بالفعل بيتجمع أمامى من بعد عصر اليوم هنا بميدان القائد إبراهيم وتحديدا بحديقة الخالدين هى مطلة مباشرة على كورنيش محطة الرمل كميات قليلة يعنى ربما 200 أو 300 فرد هم من أحزاب مختلفة تبع الإنقاذ الوطنى بالإسكندرية منها حركة 6 إبريل منها الثوريون منها أيضا حركة لازم حركة كفاية أيضا الأحزاب الليبرالية مثل الدستور هم أغلقوا الطريق منذ قليل للأسف أمام كورنيش الإسكندرية القادم من رأس التين والآخر القادم من المنتزه البرودة الشديدة والعاصفة الترابية وبعض الأمطار هنا إلا إنهم بيطالبوا باستكمال أهداف الثورة هناك بعض اللافتات أمامى منها عيش ، حرية ، عدالة اجتماعية أيضا فيه لافتة عدم سيطرة فصيل الإخوان يعنى على الدولة أيضا فيه لافتة أخرى بتنادى بتعديلات دستورية جديدة لبعض مواد الدستور الخاصة يعنى بحقوق المرأة والطفل والأقباط أيضا طالبوا القصاص من قتلة زملاءهم الشهداء بالإسكندرية منذ أحداث الثورة وأكدوا أن هذا الأسبوع يشهد ذكرى أحداث الثورة وارتباطها بذكرى زملاءهم وهم عددهم نحو 83 شهيدا غير المصابين وأن حقهم لم يؤخذ حتى الآن يعنى بينما فرت قوات الأمن للمنشآت الحيوية هنا أمامى ميدان المنشية على بعد أمتار أمامى محكمة يعنى قوات الأمن منذ الصباح أيضا كنت اليوم أمام مبنى اتحاد الإذاعة والتليفزيون بباقوس التابع لإذاعة الإسكندرية أيضا هناك عدد من قوات الأمن المركزى أيضا البنوك رأيت عدد من البنوك تحيطه قوات الأمن أيضا ومديرية أمن الإسكندرية دعمت بوجود رجال مباحث ورجال شرطة أيضا المجلس المحلى والذى شهد الجمعة الماضية أحداث مؤسفة هناك أمامه وخلفه أكثر من 6 سيارات أمن مركزى تحيط أيضا به الجديد فعلا سريعا يا أستاذة رغدة إن اليوم الأهالى والشباب استمعوا لقرار النائب العام المستشار طلعت بأن يتم مساعدة الشرطة بالإمساك بأى عناصر من البلاك بلوك الجديدة والتى ظهرت جديدا فى الإسكندرية هناك شباب فى اللجان الشعبية فى بعض المناطق مثل سموحة ، سيدى جابر ، أمام مديرية الأمن بالإسكندرية أيضا وأيضا فى المنشية ومنطقة كوم الدكة مستعدين من بعد صلاة العصر رغدة منير : طيب مصطفى بسرعة بس عشان أنا مش عندى وقت كثير بالنسبة للجمعة الجاية هل عندك أى دعوات للتظاهر على غرار الدعوات اللى هنا فى القاهرة مصطفى ياسين : نعم يا أستاذة رغدة هم أكدوا إن هذا الأسبوع يشهد فاعليات هى الذكرى الثانية ولكنها ليست احتفالية أكدوا على أنهم يريدوا القصاص لدماء الشهداء زملاءهم ربما تمتد فعلا زى ما قلتى حضرتك ليوم الجمعة رغدة منير : أنا بشكرك شكرا جزيلا زميلنا مصطفى ياسين نقلت لنا الصورة فى محافظة اسكندرية احنا دلوقتى هنرفع آذان المغرب حسب التوقيت المحلى لمدينة القاهرة ونرجع نكمل مع حضراتكم 45 دقيقة فاصل آذان المغرب رغدة منير : مستمرين معاكم لسه فى 45 دقيقة ويمكن من شوية كانت الدكتورة باكينام الشرقاوى مساعد الرئيس للشئون السياسية وهى منسقة الحوار الوطنى كان لها مؤتمر صحفى أعلنت فيه العديد من النقاط قالت إن من الصعب تغيير الحكومة فى الوقت الحالى وفرض حالة الطوارئ هى أصعب الحلول والحالة الأمنية هى اللى ممكن تقيس هذه الطوارئ من حيث المدى الزمنى والرئاسة لن تيأس من التواصل مع قوى المعارضة كمان الدكتور أيمن على مستشار الرئيس للمصريين فى الخارج قال إن ما تم طرحه من قبل جبهة الإنقاذ الوطنى تم التطرق إليه فى جلسة الحوار وإضافة لأمور تتعلق بالوضع الراهن ودى مش مجرد آليات للحوار لإن احنا ما نحبش نكون معزولين عن الواقع وعن اللى بيحصل وأكد حرص الرئاسة والمستشارين على كل ما يطرح فى الحوار وكل ما يتم الاتفاق عليه احنا دلوقتى هنطلع على تقرير لزميلنا محمد عطية نطرح من خلاله وجهة نظر ما يسمونهم بالنخبة اللى هى طول الوقت متهمة بإن هى تعيش فى برج عالى وإن هى معندهاش مشاركة حقيقية مع الجماهير ولكن تظل لهذه النخبة رأيها ويظل لها رؤيتها فى تقييم الأحداث نروح نشوف التقرير ونرجع نكمل مع بعض تقرير أصبح المشهد السياسى فى مصر يزداد تعقيدا يوما بعد يوم عقب مسلسل الحرق والتخريب وتهديد المنشآت العامة والخاصة التى تشهدها البلاد حالة من الانزعاج والقلق انتابت الجميع كيف تخرج البلاد من هذه الأزمة الخطيرة محمد يوسف : الكاتب الصحفى ومدير تحرير الأهرام : نعم البلاد فى خطر لأن الرأى العام لم يميز بعد حق كل مواطن فى أن يتظاهر بالطرق التى تحافظ على أمن وسلامة واستقرار الوطن وبين إشاعة الفوضى وبين قطع الطرق وبين الحرق وبين السلب حسنا علينا أن نميز مرة أخرى بين أعمال الممارسة الديمقراطية وبين الأعمال الجنائية الحلول أقدر كثيرا طلبات المعارضة ولكن أتمنى أن نعلى راية الشعب هو كل واحد رافع راية الشعب فعلا إذا كنا بنعلى راية الشعب فعلا يبقى نفتح ملفات العاجلة أمام الشعب المصرى اللحظة مش لحظة صراع على الحكم لا لأن الرئيس منتخب ولأن البرلمان منتخب ولأن الدستور الشعب اللى أقره وبالتالى الناس دى بتنازع فى إيه على هؤلاء الناس أن يحترموا الشرعية وأن يحافظوا على الشرعية وأن تكون الملفات الأولى بالرعاية والحوار هى مشكلات مصر ومشكلات المواطن المصرى هانى عمارة : الكاتب الصحفى : الحوار هو الذى يحدد أو يصل إلى خرائط طريق تصل بالبلاد إلى بر الأمان وليس وضع الشروط التعجيزية أمام السلطة سواء هذا وذاك الجميع سيدفع الثمن فى حالة انهيار الدولة عطية العيسوى : الكاتب الصحفى : لا خروج من الأزمة سوى بالحوار وأن يتنازل كل طرف عن بعض مطالبه ويلتقيا فى منتصف الطريق للوصول إلى حل ليس مقبولا من الحكومة أن تتمطرس وراء مواقفها وترفض مطالب المعارضة تماما لأن بالتأكيد هناك مطالب يمكن تنفيذها مثل تشكيل حكومة إنقاذ وطنى وتعديل الدستور المواطنون والذين أصابهم الإحباط والخوف على مستقبل مصر كان لهم هذا الرأى مواطنة : طبعا حرية التعبير مكفولة لكل شخص لازم كل واحد عنده اعتراض على حاجة يعترض عليها بشكل سلمى مفيش أى مشكلة والحكومة برضه لازم تحترم المظاهرات اللى بتحصل دى ما تقابلهاش بأى نوع من أنواع العنف عشان احنا فى مرحلة الناس عندها غضب جواها لازم تخرجه ده وضع طبيعى بعد أى دولة قامت بثورة زى مصر هنا مواطن : الحل إن الناس تتنازل لمصلحة مصر يعنى مش كل واحد له رأى عايز ياخده دلوقتى وينفذه دلوقتى ويشوف نتيجته دلوقتى مواطن 1: أول حاجة لازم المظاهرات دى تقف ، ثانى حاجة إن الريس يجيب الناس دى كلها بتوع المعارضة ويقعدوا زى ما قالوا امبارح بس تبقى فيه جدية يعنى تبقى فيه جدية مصداقية للحوار اللى هيحصل كثيرة هى الآراء والحلول للخروج من الأزمة ولكن أيا منها يعيد الأمن والأمان للمواطن البسيط رغدة منير : احنا معانا على التليفون للتعليق الكاتبة الصحفية والروائية القديرة الأستاذة سكينة فؤاد أعلم تماما يا أستاذة سكينة أن حضرتك من مؤيدى أن الحل الأمنى ليس فقط هو المخرج أو الحل الوحيد للخروج من هذه الأزمة حضرتك شايفة الحل ازاى أ.سكينة فؤاد : احنا الحلول الأمنية كانت من أهم أسباب قيام ثورة 25 يناير مفيش شعب مكرتاح ومتحقق له البدايات وزى ما بقول وبكرر دائما احنا المصريين من أبسط الشعوب والقيادات إلى أبسط السمع إذا حطت مجساتها على نبض هذا الشعب واستجابت وساهمت وصارحت وأعلنت وكشفت وتكاشفت هتبقى الأمور يعنى كثير من المشكلات ممكن التغلب عليها هل فيه شعب مرتاح بدأت تصله بعض ثمار العدالة الاجتماعية بعض تأثير أنا ما بقولش كل ولا بقول معجزة ولا بقول ما اتغيرتش الدنيا بين يوم وليلة ليه على الإطلاق إنما البدايات التى كان يجب وما أكثر ما ناديت أن يتمثل هذا الشعب بدايات عدالة اجتماعية بدايات إعادة توزيع عادل للإمكانات اللى فى البلد احنا عندنا قضية خطيرة جدا كم من ولادنا استشهدوا ومازالوا لحد امبارح وأول امبارح مين اللى بيعمل كده هل لو عرف الشعب أن هناك إجراءات جادة وعادلة لإن أنا أثأر لهؤلاء الشهداء ممكن يرتضوا تعالى نقول إن المطالب النهاردة وامبارح فى لقاء الحوار الوطنى استجابات لما تمت المطالبة به من مدة طويلة الاستجابات دى اتأخرت يعنى قانون الانتخابات يعنى المواد المختلف عليها فى الدستور يعنى أى نظام فى الدنيا مكون ممن يحكمون وممن يعارضون المعارضة جزء أصيل من نظام الحكم المعارضة كانت جزء أصيل من وضع الثورة المصرية لثورة 25 يناير أنا أخشى وأنا قلت وكتبت فى الأهرام هذا الأسبوع من أهم أسباب سقوط النظام السابق يعنى ما كانتش الثورة طبعا كل شئ إرادة الله عز وجل إنما قبل الثورة كان استكبار وعناد النظام الأسبق وتعاليه على الاستماع جيدا لمطالب ولآلام الشعب الآن نحن أمام نظام جديد تولى الحكم كأهم ثمار الثورة المصرية الثورة دى عملها مين مش عملها الشعب بجميع مكوناته مش عملها ولادنا ودفعوا الدم المصرى ذهب هل أنا أشركت ولادى دول بالقدر الكافى هل هم حسوا أنهم شركاء فى صناعة القرار هل زى ما اتفقنا وكان الاتفاق إن الخبرات التى يمتلئ بها هذا الوطن خبرات فى جميع مجالات الحياة تكون شريكة للجماعة فى إدارة الوطن لأن قدر ما تمتلك من قدرات يعنى أكيد ليست على قدر هم هذا الوطن رغدة منير : أنا بشكر حضرتك يعنى إذن الثقة والمشاركة هى أساس الحل لهذه الأزمة أستاذة سكينة فؤاد الكاتبة الصحفية والروائية القديرة شكرا جزيلا لانضمام حضرتك لنا ونروح للدكتور أمير بسام عضو مجلس الشورى وعضو الهيئة العليا بحزب الحرية والعدالة دكتور حضرتك شايف الوضع ازاى ويمكن حضرتك استمعت إلى رأى الأستاذة سكينة فؤاد فيما يخص المشاكرة وأزمة الثقة ما بين الشعب وما بين النظام د.أمير بسام : سكينة فؤاد هى قيمة وقامة كبيرة فى مصر ولكنى أريد أن أؤكد على بعض النقاط والتى أرجو أن تكون واضحة للمستمع ما يحدث فى مصر الآن ليس معارضة ونتمنى أن تكون معارضة هناك أدبيات للعمل الوطنى وهناك أدبيات لقواعد الديمقراطية وهذه القواعد تتمثل فى أن هناك صندوق انتخابات يحتكم إليه وأن الجميع ينزل إلى إرادة الشعب هذا الصندوق الذى جاء فى 19 مارس واعترض عليه البعض هذا الصندوق الذى أتى بأكثرية فى مجلس الشعب للتيارات الإسلامية وأتى بجميع الأطياف السياسية فى مجلس الشعب هذا الصندوق الذى أتى بالدستور المصرى والذى يريد البعض إسقاطه الآن هذا الصندوق الذى أتى بالدكتور محمد مرسى والذى لا يعترف به الكثير الآن المعارضة دورها أن تعترف بآليات الصندوق ودورها أيضا إذا كانت هناك أزمة تجتاح الوطن فلابد من الوقوف صفا واحدا ولكن لا يكون هناك مجموعات ملثمة تطلق النار وتحاول أن تعيث فى الأرض فسادا ثم يكون لها غطاء سياسى ويكون لها دافع ويكون عنها مدافع هذا أمر غير مقبول وغير معقول رغدة منير : دكتور أمير بالتأكيد هذا مرفوض ولكن فيه مسيرات حقيقية للمعارضة اللى هى مسيرة مجلس الشورى امبارح د.أمير بسام : بعد إذن حضرتك أنا بتكلم مع حضرتك زى ما حضرتك لم تقاطعى الدكتورة سكينة رغدة منير : لا أنا بس بوضح نقطة نظام أنا ما بتناقشش مع حضرتك خالص د.أمير بسام : ما أنا هأتى إليها اللى حضرتك بتقوليه ده أنا هأتى إليه ولكن اللى فجر الأحداث اللى فجر الأحداث حضرتك دايما بيقولوا احنا بنتكلم على الأغلب يعنى حضرتك اللى ماشيين به فى الشوارع بالبرينوف وبالآلى واللى قتلوا من الشرطة ومن الشعب ودخلوا على سجن بورسعيد حاولوا تخليص من هناك وحرقوا أقسام الشرطة وهاجموا المحافظات والمراكز فى أكثر من مكان هذه معارضة هل هذا النظام سلمى ده ثورة 25 يناير من ضمن عظمتها أنها ثورة سلمية كنا نتقبل القنابل على صدورنا ولا نبادل الاعتداء بالاعتداء لأننا كلنا نقول دم المصرى على المصرى حرام ولكن حينما يحدث هذا ولم تحدث إدانة واحدة ممن يسمون أنفسهم جبها المعارضة رغدة منير : لا هى حصلت بس للأسف جاءت متأخرة د.أمير بسام : على العموم أنا هصدق حضرتك أنها جاءت متأخرة ولكنها لم تحدث يبقى احنا عايزين نؤكد أن ما يحدث الآن فى المجتمع فى مصر ليست معارضة الذى يحدث هو نوع من أنواع تسلط مجموعة على الشعب المصرى كله وفرض الإرادة عليه الدستور الذين يتكلمون عنه ويريدون إسقاطه ألم يصوت له 64 % من الشعب المصرى الدكتور محمد مرسى ألم يأتى ب 52 % مجلس الشعب هذا الذى تم حله ألم يأتى بإرادة شعبية بإرادة صحيحة فهذه النقطة الأولى التى نريد أن نوضحها النقطة الثانية والتى أريد أن أتحدث فيها موضوع الحوار والمشاركة من الغير مشترك يعنى حضرتك الدكتور محمد مرسى تأخر لو تذكرى فى تشكيل الوزارة لأنه هناك الكثير منهم الدكتور البرادعى رفض أن يكون رئيسا للوزراء وقال أنا ليه أبقى رئيس وزراء طالما ممكن أبقى رئيس جمهورية بعد 6 أشهر حضرتك الكثير من الوزراء رفضوا إنهم يتحملوا السمع فى هذه الأيام ثم بعد ذلك حينما تم تشكيل وزارة تم تشكيل وزارة من جميع الأطياف حضرتك تجربة حزب الحرية والعدالة وهو الأكثرية فى مجلس الشعب تجربة رائدة تميز ازاى إن احنا أشركنا الجميع يا فندم حضرتك الرئيس كان من الحرية والعدالة والنائب من النور والوفد بترتيب الأولوية اللجان حضرتك رغدة منير : أنا بعتذر لحضرتك أنا فعلا وقتى محدود شكرا جزيلا دكتور أمير بسام القيادى بحزب الحرية والعدالة وعضر مجلس الشورى شكرا ، منذ قيام ثورة 25 يناير واحنا دايما بنتكلم عن الفلاح المصرى دوره فى المجتمع كم الظلم والإهمال اللى طاله رغم إن مصر بلد زراعية فى الأساس ودايما كنا بنقول إن الفلاح المصرى هو الوحيد اللى حتى وهو عنده مطالب توقف عن العمل ظل منتج وظل طول الوقت هو اللى بيرضى بيته وبيرضى الدولة وهو تقريبا هو اللى معيشنا هنروح نشوف تقرير لزميلنا محمود على حوالين الفلاح المصرى وازاى الأحداث اللى موجودة دلوقتى بتأثر عليه ونرجع نكمل معاكم تقرير المشهد الحالى لا يعبر بالضرورة عن كل الشعب المصرى فهنا وبعيدا عن مناطق الأحداث مواطنون لا يعرفون إلا لغة العمل والإنتاج مع انشغالهم بهموم الوطن فلاح : يعنى خراب فى البلد سيبان سرقة يعنى بوجه نداء للشباب ونداء للناس المتظاهرين إنهم يهدوا ويبقى فيه تفاوض ويبقى فيه راحلة لى و لك وللكل فلاح 1 : لإن احنا عمالين نخرب فى البلد والبلد دى طبعا بلدنا فلاح 2 : ده خراب بيوت للمزارع بالنسبة للزراعة والعربيات والمشى والحاجات دى كلها بتخرب بيت نقلة علف نقلة دواجن نقلة مواشى والكلام ده كله بيخرب بيت الفلاح وبعدين الفلاح ما عندوش مصدر رزق غير الحاجات دى فغلط الحاجات دى والمفروض بالنسبة للاعتصامات والمظاهرات دى المفروض نقف فى ميادين عامة ونعتصم ما نقطعش الطرق فلاح 3: اللى حصل ده خراب فى البلد مش عمار احنا بنعانى من عيش والملح والشغل يعنى أنا راجل سنى 42 سنة شغال أرزاق يوم وعشرين لا ومن صعوبة الحصول على مستلزمات الإنتاج إلى ندرة مياه الرى وسوء حالة التسويق تأتى هذه الاضطرابات لتزيد من هموم هؤلاء البسطاء فلاح : ما تسيبوا العالم الغلابة تعيش واحنا أصلا الخراب جاى علينا احنا ، احنا مش عارفين نشتغل ولا نجيب قرش لعيالنا والملح للأراضى الزراعية الملح غالى ب 150 جنيه والجاز مالقيناهاش من الملح نلاقيها من الجاز وللا نسيب الأراضى بقى خربانة ونسيب بيوتنا تخرب فلاح1 : مش حكاية برضه الأسمدة لا التصدير برضه واقف يعنى الموالح دلوقتى حالها واقف بالنسبة للبرتقال مفيش تصدير ، مفيش تصدير للبصل مفيش تصدير للبطاطس ، البلد حالها واقف وما نعرفش الزراعة بتاعتنا احنا هنوديها فين فلاح 2: احنا زرعة زى اللى احنا بنرزعها جى بتكلفنا ألوفات ماهياش 100 ولا 500 ولا 1000 ده ألوفات بنيجى نسوقها للصعيد البلطجية والحرامية يطلعوا على العربية ياخدوا منها الزرع إن وصلت للسوق وجابت فلوس وهى راجعة فلوس احنا ما بنحصلهاش لأن البلطجية بيطلعوا عليها برضه ياخدوها ما بيدوش لنا فلوس فلاح 3 : رايح أبيع رز بيتاخد منى فى السكة لا بعته ولا كلت بفلوسه فلاح 4 : دلقتى عايزين الشرطة تديها الصلاحية الكاملة لمدة سنة يا سيادة الرئيس كاملة زى أيام جمال عبد الناصر لما كان جمال عبد الناصر شادد الكل ما كانش حد بيتكلم ولا حد بيقدر يعترض صلاحية الشرطة كاملة وصلاحية القضاء كاملة بس مش على الناس كلها على البلطجية واللى معروفين وأى واحد يطلع بمظاهرة قرار كده من وزير أو من رئيس الجمهورية يطلع لو حتى طالع من المسجد وفى إيده سبحة وطالع على المظاهرة لو مات مالوش دية المفروض كده لإن البلد عاوزة شدية الحياة هنا بسيطة ولا صوت يعلو على صوت العمل والإنتاج الكل يعمل ولا فرق بين كبير أو صغير والعلاقة بينهم وبين الأرض هى جوهر الحياة رغدة منير : يمكن التقرير ألقى الضوء الحقيقة على مشاكل غير تقليدية للفلاحين مش مجرد غياب دعم كافى من الدولة لدعم التصدير ودعم المحاصيل الفلاح بيتكلف كثير وفى النهاية اللى بيدخل له من عائد هذه الزراعات هو عائد قليل اتكلموا كمان عن أزمة غياب الأمن وازاى بتأثر عليهم بشكل مباشر وعلى توصيلهم للمحاصيل وفى النهاية العائد اللى بيحصلوا عليه احنا معانا على الهاتف الحاج محمد صبحى الدبش رئيس النقابة العامة للفلاحين والملقب بزعيم الفلاحين حاجة يمكن حضرتك سمعت معانا التقرير مشاكل للفلاحين غير تقليدية يعنى أحب إن حضرتك تعبر عنها بشكل مباشر الأحداث فى مصر بتأثر ازاى على الفلاح الحاج / محمد صبحى الدبش : أولا الفلاح هو الجندى المجهول فى مصر بالكامل كان الأول عندنا آلية لتسويق المحاصيل الزراعية دلوقتى مفيش آلية لتسويق المحاصيل الزراعية زى القطن المفروض إن أنا والقطن ساعة ما بييجى بيتعبى فى أكياس وأسلمه لمراكز التسويق اللى هى الحكومة تتولاها والأرز نفس الوضع المفروض إن أنا أسلمه للشون لتتولاها الحكومة ولإن احنا النهاردة ما عادش عندنا آلية لتسويق المحاصيل الزراعية بالنسبة للأمن أنا حاليا دلوقتى حضرتك لما ... رغدة منير : واضح إن احنا فقدنا الاتصال بالحاج محمد صبحى الدبش نقيب الفلاحين والملقب بزعيم الفلاحين أنا بعتذر لك عن هذا العطل ونرجع نكمل معكم الشخصية المصرية الشخصية المصرية هى شخصية تاريخية ودايما يحضرنى واحنا بنتكلم على المصريين ما حدث للمصريين من المؤرخ العظيم جلال أمين هو بيؤرخ لتطوير المجتمع المصرى فى 50 سنة من سنة 45 لسنة 95 دكتور ميلاد حنا كمان كان له كتاب مهم قوى اسمه الأعمدة السبعة للشخصية المصرية وكان بيقول الشخصية المصرية بترتكز على 7 أعمدة مهمة الانتماء الفرعونى اليونانى والرومانى والقبطى والإسلامى كمان احنا عندنا بعد جغرافى مهم قوى احنا بننتمى للوطن العربى بنطل على حوض البحر المتوسط وأخيرا لنا بعد أفريقى لإن احنا نعتبر احنا ماسكين البوابة الشمالية للقارة الإفريقية تقرير زميلنا نعيم إبراهيم هيرصد لنا الشخصية المصرية واللى طرأ عليها من تطور ونرجع نتكلم عنها تقرير معرفة الإنسان بذاته وقيمه الإيجابية لا تنتج إلا عن طريق توجيه النفس ودفعها فى رحلات تأملية حول استكشاف الذات ومراقبتها والانسجام معها هكذا أوضح علماء النفس والاجتماع مؤكدين على أن القيم الأخلاقية لا تزول د.عبد اللطيف خليفة : أستاذ علم النفس بجامعة القاهرة : القيم الأخلاقية كان فيه انحلال وإلا ما كانش النظام زال لإن كان فساد القيم كان أحد الأسباب اللى أدت إلى الثورة نمو القيم اللى فى المجتمع دى محتاجة لإعادة بناء لإن منظومة القيم نفسه تحلل هذا النسق يحتاج إلى إعادة هذا يحتاج إلى سنوات انت إذا هدمت شئ فى سنة يحتاج إلى 10 سنوات وبالتالى المسألة محتاجة لك تعود مصر ولكى يعود المجتمع إلى القيم الأصيلة فى حاجة إلى وقت وفى حاجة إلى سنوات وسنوات ومحتاجة تظافر كل الجهود ولم الشمل لكى تكتمل الصورة ولكى تكتمل الثورة بنجاح د.أحمد مرسى : أستاذ علم الاجتماع بجامعة القاهرة : هذه الروح اللى موجودة وهى موجودة إنما ييجى عليها تراب يجى عليها غبار فماتباش طب سبب ده كان إيه سبب ده إن الناس كان عندها حلم طالعة شباب طالع عشان يشوف بلده كما يحب لها الخبراء أكدوا على أهمية الحوار بين كافة أبناء المجتمع الواحد حتى ينهض من خلال وحدة أبنائه وتوافقهم د.عبد اللطيف خليفة : الحوار معناه إيه الحوار إن أنا مش رايح أتفاوض مع إسرائيل ولا أفغانستان أنا بتفاوض هنا داخل مجتمعى أبناء المجتمع الواحد بيلتقوا وبالتالى أبناء المجتمع الواحد لابد بصدر رحب كل منا يتقبل الآخر لكن أنا مش مجرد إن ده اتجاه سياسى أو اتجاه إسلامى أعارضه مبدئيا وأقول لا أنا مش هقعد لابد أن نلتقى د.أحمد مرسى : الحوار ضرورى والحوار دلالة صحة ودلالة نضج فى التفكير وبعدين احنا بنتحاور على مصلحة الوطن مش بنتحاور عشان أنا أتمنظر عليك ولا انت تتمنظر على وللا أكسب عليك بنط وللا تكسب على بونط وللا أنا أطلع صح وانت غلطان وانت غلطان وأنا صح لأن احنا فى الحالتين لو عملنا الصح احنا كسبانين هذه دعوة مفتوحة من الأساتذة والدارسين لكل المواطنين مع اختلاف توجهاتهم لإعادة تقييم وتقدير إيجابياتنا كمصريين رغدة منير : الحقيقة احنا كنا نتمنى إن ضيفنا الدكتور رشاد عبد اللطيف أستاذ تنظيم المجتمع بكلية الخدمة الاجتماعية كان المفروض يكون معانا على الهواء مباشرة من استديوهاتنا فى ماسبيرو ولكن لظرف ما تعذر وجوده معانا ولكن هو معانا على التليفون احنا كنا نتمنى إن حضرتك تكون موجود معانا فى الاستديو د.رشاد عبد اللطيف : أستاذ تنظيم المجتمع بكلية الخدمة الاجتماعية : أنا كنت متوجه لكم عند سميراميس لقيت فيه غازات بتنضرب اضطريت إن أنا طبعا خدت شوية غازات وبحاول أوصل مبنى التليفزيون من خلال وسط البلد يعنى بحاول ألف كده فى الشوارع لإن مفيش الشوارع معظمها متقفل وبعدين زحمت نتيجة لما حصل ضرب الغازات دية فاضطر الكثير من المركبات إنها تلف وأنا لفيت معاهم فحصل نوع من التكدس يعنى أنا يسعدنى جدا لإن دى مرحلة حاسمة جدا فى تاريخ بلدنا ولازم ما يبقاش أسلوب التعامل ولا أسلوب الحوار ولا رغدة منير : طب دى نقطة بداية لحوارنا النهاردة يمكن حضرتك تابعت معانا التقرير على التليفون دى نقطة البداية حضرتك بصفتك أستاذ علم اجتماع كيف تتابع موقف أطراف الحوار دلوقتى منهم يعنى بين من لبى الدعوة وبين من قطعها د.رشاد عبد اللطيف : والله يعنى أنا سمعت جزء من الحوار لكن أنا بقول لحضرتك هو مش معروف العملية سابت يعنى جبهة إنقاذ إخوان مسلمين ثوريين العملية سابت يعنى مش عارفين مين بيحاور مين ولا مين بيتقبل مين وده خوف يعنى حينما نعلم لغة الحوار تأتى لغة الطرشان والطرشان محدش بيسمع حد والضحية فى الآخر مصر والضحية فى الآخر الشعب الغلبان المواطن التعبان أنا شايفه وأنا ماشى دلوقتى عشان آجى لكم وعاوز يكسب لقمة عيش مش عارف يكسب لقمة عيش لإن الدنيا ضلمة والناس بتجرى فاللى بيضيع الإنسان الغلبان اللى احنا كلنا على فكرة أنا راجل بتاع خدمة اجتماعية بقول إن كلنا موجودين عشان الناس البسطاء دول اللى هم بيبقى لهم جزء كبير جدا فى بلدنا بالرغم من تدنى أجورهم وبالرغم من تدنى أوضاعهم الاجتماعية لكن لغة الحوار أصبحت يعنى ... نتمنى أنا مش متشائم نتمنى إن الحوار يبقى بطريقة ثانية وخصوصا إن مصر مهما بلغت الذروة فى أى نوع من الخلاف بتنقطع وبيبان معدن المصرى الأصيل رغدة منير : يا دكتور هى مصر تنهض لا تموت أنا بعتذر لحضرتك عن ضيق وقتى دكتور رشاد عبد اللطيف أستاذ المجتمع بكلية الخدمة الاجتماعية شكرا جزيلا لسيادتك خلينا سريعا كده نروح نشوف الوضع فى بورسعيد عامل ازاى مع زميلنا حسام مسعد ، حسام إيه الأخبار عندك فى بورسعيد النهاردة طيب واضح إن احنا مش هنقدر ناخد زميلنا فى بورسعيد بس إن شاء الله نتمنى إن الأوضاع تكون هادئة زى ما هى طول اليوم خلصت حلقة النهاردة بشكركم مشاهدينا على متابعتنا الكريمة وبكرة إن شاء الله لقاء جديد والسلام غليكم
