م الآخر| من هو الشعب؟

يبقى سؤال يحيرني وهو "من هو الشعب؟".. وبالشعب أقصد الإنسان البسيط، اللي اتولد في بيئة معندهاش مرجعية سياسية ولا ليها مصلحة في أي خلافات على سلطة أو غيره.. بالشعب أقصد الشاب اللي اتولد في عائلة معندهاش فلوس تدخله مدارس ولا عندها الوعي الكافي اللي يساعده على تنمية عقله وفكره الاجتماعي قبل السياسي.. عارفين مين هم عامة الشعب؟.
عامة الشعب هم العيال "البيئة" اللي بتشوفهم قدام المول التجاري، عامة الشعب هم سواقين الميكروباصات اللي بابي ومامي بيقولوا عليهم "عيال حشاشة".. هم العيال الصيع اللي بيعاكسوكي وانتي ماشية في الشارع.. هم الكام عيل اللي بيشربوا "كلة" تحت الكوبري.. عامة الشعب هم اللي لونهم بقا أسود من التراب والطينة اللي بتستوطن على أجسادهم.. هم البنات اللي لابسة طرحة على شعرها بس مش عارفة العصر كم ركعة.. هم الواقع بتاع أفلام خالد يوسف بكل مناظرها الخادشة للحياء.
أنا مش بتكلم على تيار سياسي معين ولا أنا بتكلم عن ثوار أحرار بيكملوا المشوار، ولا فلول فلول بيدوروا على حلول ولا إخوان ولا ليبراليين ولا سلفيين.. أنا بتكلم على "البني آدمين" اللي مشكوك أصلا في آدميتهم من المعاملة البشعة والبيئة الأبشع اللي اتولدوا لقوا نفسهم فيها.. عن آلاف، بل ملايين من الشعب الجاهل اللي هو نتاج نظام قامع، مستبد، منافق واحد بعد التاني.. عن العيال "البلطجية" اللي لا ليهم في شرعية رئيس ولا في معارضة قوية ولا في مجلس شعب ولا غيره.. عن اللي مش عارفين الناس نازلة ليه في الشوارع، بس نزلوا يهيصوا ويتفرجوا ويحششوا ويحسسوا ويتحرشوا ويخربوا!.
أنا بتكلم عن الشاب اللي لو اديتو "مياية" ممكن يروح يقتلك فلان أو يدبحلك علان.. من غير حتى ما توهمه إنه بهدف ديني أو وطني، ففي نهاية الأمر هو ميهموش مين اللي هيمسك البلد دي ولا مين "هينميها".. ما هو أصلا مش محتاج تنمية.. هو كل اللي عايزه سيجارته الملفوفة اللي مش بتفارق إيده وخلاص.. أنا بتكلم، وأنا كلي أسف إن هو ده حال بلدنا.. فكيف يا مصر يسمونكي أم الدنيا وطفلك مرمي في شوارعك بدون أم؟
طب الحل إيه؟
متكلمنيش عن انتخابات ولا عن سياسات
ولا أحزاب ولا حركات
مش عايزة أسمع عن مجالس،
لا شعب ولا شورى
ولا عن ازاي احنا شعب أسطورة
ولا عن فساد إعلام
ولا عن فضيحة فلان وعلان
كلمني عن شعبك يا سيد الناس
وعن حلك لمشكلة الإفلاس
عن لقمة عيش منين تتجاب
وعن بيت يتلم فيه الأحباب
عن نظام تعليم فيه الامتحان
مش تعجيز وإهانة لكل إنسان
عن فرصة عمل تغذي الشهوة
بدل القعاد الظهر على القهوة
عن طريقة مبتكرة للتخلص من الزبالة
مش مجرد ردك ب"بلدنا فيها زبالة ؟ استحالة !
عن عيش..حرية...عدالة اجتماعية
مش عن مفهومك عن الديموقراطية
اللي أصله.. ديكتاتورية !