م الآخر| ابن طنط توتو

جوه كل بيت في مصر واحد كان في يوم من الأيام قرفينك بيه، وإلا بقى معلش ما تبقاش معاك الجنسية أو غريب أوي يا أخي، لازم وانت صغير يكون فيه ابن صاحب بابا أو ماما أيا كان، يعني المهم حد قارفك في عيشتك وخلاص، لو جيت تأكل يا ريتك كنت بتأكل زي فلان ابن عمو فلان لو جيت تشرب أو حتى تتكلم، يعني أدق التفاصيل، لازم حاطينك في مقارنة بينك وبينه، ده غير بقى إن هو بالنسبة لهم التنين المجنح، شايفينه حاجة نادرة أو يعني مفيش زيه، ولازم تعمل زيه في كل حاجة حتى حركاته، طبعا لأنه ده بالنسبه ليهم أمنية.
طب ليه مثلا ميحاولوش يقيموك على أساس شخصيتك انت من غير ما يقارنوك بحد، هل هما أصلاً ده طبعهم بيحبوا يرشقوا عينهم في حاجة الناس ولا بيستقلوا بيك وخلاص؟، نيجي بقى للدراسة طبعا هو أشطر منك وأذكى منك بمقاييسهم اللي موجودة في البلد دي اللي هي الدرجات والشهادات يعني اللي في الآخر بتتعلق على الحيط تبلها وتشرب مايتها ومش بس كده ده انت كمان بتتعلق معاها لحد ما تلاقي شغلانة. المهم لازم تكون زيه وتجيب درجات أحسن منه يا سلام بقى لو انت كان ليك شخصية مستقلة ورافض إنك تكون محطوط في قالب شخص تتطبع بطباعه وكأنك روبرت مثلا في الحالة دي بقى بيشوفوك فاشل أو مش نافع ويفضلوا يكبّروا وينفخوا فيه لدرجة تخليك تكرهه وتكره سيرته وسيرة الست الوالدة، أما بقى لو كنت راجل زي الفل تابع وبتسمع الكلام وبتنفذ كل الأوامر عادي وبتقلد في كل حاجة وتبقى متفوق زيه ومش بعيد تدخل كليته لأ وإيه تلبس نضارة كوباية وتبقى دكتور اسم الله عليك ولا فاهم أي حاجة حافظ يعني مش فاهم وتقرفنا احنا بقى وده طبعا هيفضل مأثر عليك وعلى شخصيتك ومش بعيد تفشل في حياتك وتربي عند أولادك برضو ان شاء الله نفس العقدة.