أهالى حدائق الأهرام يحمون أنفسهم ب«نشرة أخبار»

نجحوا من خلال النشرة فى طرد الباعة الجائلين ومنع الموتوسيكلات

على بعد خطوات من شارع الهرم الرئيسى يسكن الرجل الأربعينى فى «حدائق الأهرام» التى تحولت بفعل زحف العشوائية عليها إلى اسم على غير مسمى، لكن «شريف»، أحد أهالى المنطقة، أصر على محاربة الزحف العشوائى إليها، وصمم صفحة على موقع التواصل «فيس بوك» بعنوان «شبكة سكان حدائق الأهرام الإخبارية» تختص بنقل تقارير مفصلة عن واقع المنطقة الأليم، بحيث تكون الصفحة وسيلة تواصل بين السكان لمساندة بعضهم بعضا ضد سائقى «التوك توك» ولتطوير المنطقة.
«مفيش قسم شرطة ولا حتى دورية، تكاتك فى كل حتة، باعة جائلين بميكروفون طول اليوم، مبانى مخالفة، انقطاع كهرباء ومياه، ده غير السرقة اليومية» 6 مشاكل رئيسية واجهها شريف البربرى خلال 6 سنوات عاشها بالمنطقة، حاول إيصالها لرؤساء الأحياء «قعدت معاهم وكله بيوعد وخلاص».
400 شكوى يوميا على صفحة الشبكة يتلقاها الرجل الأربعينى، مخصصا 3 ساعات يوميا من وقته، لمساندة جيرانه، عن طريق توثيق الجرائم والانتهاكات بالصور والفيديوهات وعرضها على السكان والمسئولين: «مفيش يأس، الحمد لله قدرنا وسط كل ده نطرد الباعة الجائلين، ونخصص مساحات خضراء وقريبا سيكون هناك قسم شرطة ومركز شباب عشان اللى مش هيقدر على تكلفة النادى اللى وصل اشتراكه إلى 25 ألف جنيه». «اللى الموتوسيكل بتاعه مش مرخص متشغلهوش» الخطوة التى يسعى لها «شريف» وباقى سكان البوابات الأربع لحدائق الأهرام نظرا لتكرر حوادث السرقة بفعل الموتوسيكلات والتكاتك «بقينا بنلف على الصيدليات، والمحلات اللى بتطلع ديليفرى وننبههم والحمد لله فيه استجابة»، يناشد الساكن الأربعينى محافظة الجيزة «عملنا نشرة عشان نحمى نفسنا ونطور منطقتنا، ومش طالبين منكم غير توفير قسم شرطة وتحققولنا الأمان، باختصار عاوزين مسئول قلبه على البلد».