م الآخر| عيد الحب.. بحبك وانتي متناقضة

أنا جايلك ومتأخّر
وأخاف الحلم يتبخّر
وخايف عمرنا يعدّي
وتنسي حبنا ف بُعدي
وتلقي حد من بعدي
يحبك زيي ويقدّر
أنا مش حد بيهزّر
ولا بلعب ولا أتمنظر
ولا بعرف أعيش قصة متكملشي
ولا بعرف أقول وأوعد ومعملشي
ولا هعرف أحبك وانتي مش ليا
ولو حلمي بحبك مش هيتحقق
مبحلمشي
فيا ريت تقوليلي استنى
يا إما تقولي قوم امشي
بحبك وانتي متناقضة
ساعات غامضة
ساعات لمضة
ساعات ممكن توافقيني
ساعات مجنونة ومعارضة
ساعات راضية
ساعات هادية
ساعات ثايرة
ساعات شاردة
ساعات بتكوني كالشوكة
ساعات بتكوني كالوردة
بحبك رغم ده كله
وأكتر من كده هرضى