لا تخف... لسه فيه حاجة اسمها حب

في الحقيقة أنا مش عارف أبدأ منين، هو أنا كنت بحب واحدة، زميلتي في الجامعة، وكانوا بيسمونا روميو وجوليت الجامعة، وكنت باحاول أسعدها بكل الطرق، وكنت باحاول ما اعرضهاش لأي موقف محرج أو أي حاجة ممكن تزعلها، وبعد فترة حوالي 2سنة حسيت إنها اتغيرت من ناحيتي شوية؛ يعني الكلام بقى على قد السؤال، وكانت تتهرب من الخروج معاي سألتها: إنتي مش عايزة تشوفيني؟ وكنت باسألها وأنا متوقع إنها تقول لي: لا أنا بحبك.. ما تقولش كده.. حاجة زي كده بس الحقيقة لاقيتها بتقول لي آه مش عايزة أشوفك تاني.
في اللحظة دي حسيت إن فيه حاجة غلط، إما فيها أو في، وكمان أنا كنت بالعب رياضة، وكان عندي بطولة في نفس المدة، اعتذرت عن البطولة؛ لأني مش قادر أفكر في أي حاجة غيرها؛ مش حبا فيها بس عايز أعرف مين اللي غلط أنا ولا هي؟ وبصراحة أكتر اتولد عندي إحساس إني بقيت خايف أحب أي حد أو أتحب من أي حد.
يا ريت تقولوا لي ممكن أعمل إيه؟؟ وأنا بجد سعيد إني بقيت من أسرة الموقع الهائل ده. على فكرة أنا اسمي محمود 20 سنة من بورسعيد وشكرا على حسن الاستماع وميرسي.
مادو