مبادرة لإنقاذ القطط والكلاب: «دى أرواح.. وهنتحاسب عليها قدام ربنا»

تحت شعار «انقذ حيوان» نظمت مجموعة شباب قوافل طبية وغذائية لزيارة جمعيات حماية الحيوانات الأليفة، لتوصيل المساعدات اللازمة لتلك «المخلوقات التى لا حول لها ولا قوة»، حسبما قال «شريف مجدى»، الناشط فى مجال حقوق الحيوان وصاحب المبادرة.
«شريف» أكد أن المجموعة التى تشارك فى القوافل ستجمع أكثر من 600 قطعة جبنة مثلثات، ودجاج مسلوق: «لازم القطط والكلاب تاكل وتتغذى.. وإلا هتموت من الجوع»، ويستكمل: «إحنا بنأكّلها بإيدينا.. لأن الحيوانات الأليفة بتحب كده وبتحس بحنية اللى بيأكلها». وأكد «شريف» أن القافلة ستجمع التبرعات لحماية أرواح القطط والكلاب من الهلاك فى حالة تعرضها للإعياء: «الحيوان عنده روح زى البشر وهنتحاسب عليه قدام ربنا.. عشان كده لازم نعالجه». وأشار إلى أن القافلة ستُلقى مجموعة محاضرات للتعامل بوعى ورفق مع الحيوانات التى لا تستطيع التعبير عن أوجاعها: «فى مصر بس بيتحط سم للقطط والكلاب وبيدهسوها بالعربيات».. ويستكمل: «كل جمعة هنزور دار خاصة بالقطط والكلاب.. هما هناك عاملين زى اليتامى، بيفرحوا لما حد يلعب معاهم ويطبطب عليهم». «إحنا هنحميها وهنقف بالمرصاد لأى حد.. ده حيوان أخرس»: هكذا علق الناشط فى حقوق الحيوان، والذى يرفض تعامل البشر مع هذه الحيوانات بطريقة مهينة.. «يضربها أو يطلقها فى الشوارع بعد شرائها والاستمتاع بها، مما يجعلها عرضة للخطر».