م الآخر| صاحب حزنك

إزاي بتعامل فرحتك؟! بتعاملها زي المولود الجديد صح.. بتبقى مش عايز تفارقها لحظة، عايزها تكبر قدامك يوم ورا التاني، والفرحة الصغيرة تبقى فرحة كبيرة، والفرحة الكبيرة تبقى سعادة صح.. بتبقى عايز تلف الدنيا بضحكة كبيرة، وتقول أنا فرحان، أنا مبسوط، بتبقى عايز ترش جرعات تفاؤل ببلاش على كل الناس، بتبقى شايف الدنيا جميلة ومفيهاش أي تعقيد.
من الآخر كده، بتبقى إيجابي جدًا وطاقتك في فرحتك تفوق أي بني آدم تاني، كل ده بقى ليه؟ عشان حاجة عايزها خدتها، أو حاجة هتموت إنها تحصل وحصلت.. كده شايف إن الدنيا حلوة عشان خدت اللي إنت عايزه، فاكر إنها جميلة وإنها كده ضحكتلك لما وصلت لحاجة بتتمناها من سنيين، مفكرتش ولو لثانية واحدة إن جايز جدًا تكون دنيتك بتضحك عليك مش بتضحك ليك!.
طيب بلاش نسئ الظن، الدنيا جميلة ومش بتضحك عليك ولا حاجة، مفكرتش إنت ليه مخلي علاقتك بيها علاقة شرطية، ليه لو إديتك فرح تحبها، ولو قدر ربك بحبة حزن تخاصمها وجايز كمان جدًا تكرها؟!.
حاول كده تبص لحزنك من منظور الفرح، أكيد مش هتحب الحزن بس على الأقل، تقبله تعايش معاه سيطر عليه، متخليهوش يسيطر عليك، خليك مرن معاه، من الآخر كده صاحبه، أصله كده أو كده هو اتكتب عليك، وقرر ينزل ضيف عليك يقضي فترة من حياته معاك، ويبقى جزء من حياتك، يبقى إنت اديله كرم الضيافة واعمل معاه الواجب.
لو هو جاي يعكنن عليك متديلوش الفرصة واضحك في وشه، لو جاي يعكرلك مزاجك، عكر إنت مزاجه وبوظله مهمته اللي جالك عشانها، لو جاي يضيع من بين إيديك أيامك، استغل كل ثانية في حياتك واستمتع بيها في كل اللي يفرحك، لو جاي عشان يكسر قلبك ويسكن فيه، إنت ادفنه واردم عليه، وازرع مكانه بذور الفرح واستنى كمان الطرح، لو جاي عشان يضعفك ويسفه منك، إنت قادر تطلع المارد اللي جواك، وتسحق صعوباتك كلها بما فيهم حزنك ذات نفسه.
أكيد مفيش حد هيقدر يمنع الحزن، لكن أكيد نعرف نواجهه ونتعامل معاه، ممكن جدًا تتعامل صح أو تتعامل غلط، إنت اللي في إيدك الاختيار، يا تبقى ناقم على حياتك وبكده تبقى اخترت بنفسك إنك توقف حياتك، واللي أكيد ولا هي ولا اللي فيها هيستناك، وتبقى خسرت اللي فات والحاضر وجايز كمان اللي جاي.. يا إما تختار إنك تصاحب حزنك وتتعايش معاه، تقبل بوجوده لكن متقبلش بتأثيره عليك، تحتويه وتشكله على مزاجك، تتغلب عليه وتكسبه وتكسب معاه أيامك اللي جاية.
افتكر إن كل حاجة في الدنيا لها حكمة، يعني حزنك مجاش لك صدفة أبدًا، لكن أكيد جه عشان له دور، والدور ده يا إما يكون إيجابي يا إما يكون سلبي، ودوره ده يتوقف عليك إنت مش عليه، وعشان كده خليك إيجابي واتعامل معاه بإيجابية، عشان توصل للحكمة اللي جالك عشانها.
ممكن جدًا يكون جالك عشان يكشفلك ناس على حقيقتهم، وممكن يكون جه عشان يغير في تفكيرك، أو في شخصيتك ويخليك ناضج زيادة، وممكن يكون جالك عشان يطلع من جواك طاقة أو إبداع أو فكرة جديدة، وممكن حاجات كتيرة قوي.. عمرك ما هتعرفها ولا هتوصل لها، إلا لو اتعرفت على حزنك وفهمته كويس، وده مش هيحصل إلا لو صاحبت حزنك.. بس نصيحة مني خليك واعي، يعني صاحب حزنك لكن إياك تأمن له.