3 سنين اهتمام.. ولسه ماطلبش يقابل أهلي!!

أنا عندي مشكلة محيراني، من 3 سنين تقريبا بدأت أحس باهتمام شخص، وسؤاله المتكرر عليّ.. وقف جنبي في مواقف كتير سواء وقت الدراسة أو في مرحلة البحث عن وظيفة، وبالاقيه دايما جنبي ورأيه حكيم جدا، واتعلقت بيه أوي، بقى كل حاجة عندي ومشهود من الجميع بأخلاقه ومبادئه القليلة جدا أن تلاقيها في الزمن ده، بس ظروفه مش متظبطة خالص من كتر اهتمامه وغيرته اللي كانت باينة، سألته هو عايز إيه مني؟ في البداية أنكر، وقال إننا أصحاب، وبعد كده قال إن لسه ظروفه مش مستقرة، وعايز يسافر ومش عايز يبهدلني، وشايف إن لو لينا نصيب في بعض ربنا هيكملها لنا وماكانش عايزني أستنى؛ وموضوع إني هاستنى فضل فترة قصيرة بس هو ماكانش يعرف، ولا كان عارف يتعامل معايا على أساس إني مستنية، حاسس إن كده بيضحك عليّ رغم إني مش متضايقة ومستعدة أستنى، فقفل الموضوع، وبعدها كنا بنتعامل عادي زي الأصحاب، عشان ماكنتش عايزة أخسره عشان ده أكتر إنسان محترم شفته، واتعلمت منه حاجات كتير حلوة، بس هو مع الأسف بطيء شوية، وعنده الدنيا ملخبطة، وحس برضه إنه كده بيعلقني فبِعِد عني خالص، بقيت أشوفه بالصدفة كل فترة، وسألته ليه بقى كده؟ قال إنه مشغول الفترة دي وبيذاكر عشان يسافر، وحالته النفسية بقت صعبة جدا، عشان كده أنا عاذراه إنه مش بيضحك علي، هو فعلا بيمر بفترة صعبة أوي خلته بقى لوحده بعيد عن الناس مش بيتكلم كتير، ومع ذلك أنا لسه بحبه، وعايزة أستنى بس مش عارفة أعمل إيه والعمر بيجري، لو هو نصيبي مستعدة أستنى لآخر يوم في عمري، هو أكبر مني ب3 سنين وأنا عندي 25 سنة.. أرجوكم أنا محتاجة أسمع نصيحة.
cotcot
عزيزتي.. وأنا أقرأ رسالتك شعرت بمدى التردد الذي فيه صديقك على الرغم من أنه أكبر منك ب3 سنين يعني عنده 28 سنة؛ مش صغير يعني، ويجب أن يكون قادرا على اتخاذ قرار.
أنا لا أعترض على صراحته؛ ولكن اعتراضي على محاولات التقرب منك دون هدف، هل هو من أجل تسلية الوقت فقط، وعلى حد قولك إنه مهتم بكِ منذ زمن؛ سواء في الدراسة أو في مرحلة البحث عن الوظيفة، أكيد كل هذا الاهتمام اللي بتقولي عليه مش شيء عادي.
عزيزتي.. يجب أن يعلم حبيبك أنه في بداية حياته، وأنه بيبني مستقبله وإن ده شيء طبيعي، ويجب أن يكون إيجابيا في حياته، وإنه لو بيحبك أعتقد إن مش من السهل إنه يبعد عنك حتى لو ظروفه صعبة لازم يفهمك وعليك القبول أو الرفض.
وكان ممكن إنه يتكلم مع أهلك لو عايزك بجد ويفهّمهم ظروفه، ويبدأ في الاجتهاد في حياته؛ عشان يثبت لك حبه ليكِ، وإنه شخص قادر على تحمل المسئولية.
ومن خلال رسالتك.. إنه حتى مش قادر يصارحك إنه بيحبك أو إنه محتاج إنك تكوني معاه ولا لأ على أساس إيه أنت بتقولي إنك مستعدة تستنيه.. تستني إيه؟ الوهم؟!
عزيزتي.. أهم صفة يجب أن تكون في شريك حياتك الصراحة وتحمل المسئولية، وأنا لم أجد في رسالتك أيا منهما.
وأنت عندك استعداد "تستنيه لو هو نصيبك" كلامك كويس.. لكن هو حتى مافكرش يقول لك كده، ده قال لك إن ظروفه متلخبطة، وبِعد عنك خالص.. حتى لو دي ظروفه فعلا لازم يصارحك أو يفهمك هو بيفكر في إيه.. عزيزتي ابعدي عنه زي ما طلب منك فهو غير قادر على تحمل المسئولية وأنت مش للتسلية.
اهتمي بمستقبلك أكتر وبحياتك وابعدي عنه زي ما قال وسيبيه يحدد هو عايز إيه! وأنت كمان تعرفي هو عايز منك إيه.. ولو هو بيحبك فعلا يبقى لازم يتكلم مع أهلك ويفهّمهم ظروفه.
أتمنى من الله أن يوفقك للخير إن شاء الله.

لو عايز تفضفض لنا دوس هنا