انسي ماضيه وسامحيه لكن بعد أن تأخذي منه العهود والمواثيق على جدّيّته

أحب أشكركم على مجهودكم الكبير في مساعدة الناس، وجَعَلَه الله في ميزان حسناتكم..
مش عارفة أبتدي منين، أنا بنت عندي 25 سنة.. من سنة كان فيه شخص أعجب بي، وكان عايز يتقدم لي؛ لكن أنا ماكنتش أعرفه, قلت له: أنا مش هينفع أوافق، وأنا مش عارفاك خالص, قال لي: ممكن تدّيني فرصة تعرفيني.
هو من محافظة تانية ومش بنشوف بعض، مجرد تليفون اللي بينّا؛ لكن بنشوف بعض في الصيف, وبرضه مش كتير.
ومع اهتمامه بي وخوفه عليّ، ارتحت له، وقلت له بعدها بشهرين إني موافقة؛ ساعتها كان عنده ظروف صعبة، وقال لي: بعد ما تعدّي هاتقدم.. ولحد دلوقتي ماتحلتش الظروف دي؛ بس هو كان مستعد يكلم بابا، ويقول له على الظروف، وأنا رفضت لأني عارفة إن بابا ممكن يوافق.
المهم أجّلنا الموضوع, وفضل يتأجل لأكتر من سنة، وفي الصيف اللي فات كان عنده شغل في قرية سياحية. واكتشفت بالصدفة صور ليه هو وأصحابه ومعاهم بنات أجانب على البحر بالمايوهات، وهو متصور جنبهم بطريقة مش كويسة، وهو ماكانش قايل لي، وماكانش متوقع إني أعرف.. ولما واجهته اعتذر لي كتير، وقال لي: ماحصلش أي حاجة أكتر من اللي إنت شفتيه في الصور.. وبيترجاني كتير إني أسامحه.
هو إنسان كويس، وأهله ناس كويسين؛ لكن مش عارفة عمل كده ليه.. دلوقتي هو عايز يتقدم لي رسمي وأهلي عارفينه، وبيشكروا فيه وفي أخلاقه.. أنا مش عارفة أوافق ولا أرفض بعد الموضوع ده، وأعمل إيه في موقف زي ده؟ مع العلم إن عنده 23 سنة ونصف.
أرجوكم ساعدوني، أنا مش هاوافق أو أرفض غير لما تقولوا لي.. وآسفة جداً للإطالة.
rouka

لو عايز تفضفض لنا دوس هنا