م الآخر| تسريبات عبدالرحيم علي

أنا حقيقي مش عارفة أبدأ منين ولا منين، عايزة أقول حاجات كتير مع بعض، عايزة أقول إني مصدومة ومش فاهمة اللي بيحصل من حوالينا، وإيه كمية الخيانة والغدر والخسة دي؟؟ ليه إعلاميين كتير وسياسيين وشباب نشطاء كنا بنحترمهم جدا وبنصدقهم ولمسوا قلبنا وقدروا يأثروا فينا واتفاعلنا معاهم من كل قلبنا ومشينا وراهم ونزلنا في فعاليات كتير وللأسف في بعضهم انتخبناهم في مجلس الشعب وكنا مؤمنين بيهم وبأفكارهم ليه يغدروا بينا كده؟ والله أنا حاسة بمرارة لا توصف، أنا كنت بنتظر بعض البرامج على التليفزيون علشان اللي بيقدموها، الموضوع دلوقتي مختلف تماما وزعلانة من نفسي جدا إني سمحت لهم إنهم يدوني على قفايا بالطريقة دي وأصدقهم وكمان أحبهم وفي أوقات كتير كنت بصفق لهم، يا ترى العيب في أنا؟؟
ليه الناس دي متتعاقبش على اللي عملوه فينا ؟؟ أنا هنا مش هتكلم كلام كبير ولا هقول خيانة عظمى وخيانة وطن لأنه ظاهر جدا، أنا هتكلم عني أنا كإنسان جوايا في خليط من البراءة والأمل وتصديق الآخرين والتفاعل معاهم وعايزة أبني كمان معاهم وعندي استعداد للتضحية بحياتي وده كله بدون أي مقابل مجرد بس إن مصر تتقدم، وبعدين أصحى على الحقيقة المرة دي، ليه عايزين تكفرونا في كل حاجه ونحس إن إحنا كنا بالنسبة لكم صغيرين قوي لدرجة إنكم تدوسوا علينا بجزمتكم بالطريقة دي علشان تعدوا، منكم لله حسستونا إن ملناش لازمة.
خلتونا نشك في كل شيء وفي كل شخص يقول أي حاجة ونشك في المبادئ اللي بنؤمن بيها، وفي الآخر عايزين تمنعوا البرنامج اللي بيقدموا الراجل المحترم وشايل راسه على كفه وبيضحي بأمانه هو وأهل بيته علشان كلام عبيط ومستهلك وتقولولنا حقوق إنسان وشويه تقولولنا انتهاك للخصوصية، أقسم بالله إن كل الكلام السيئ والشتايم اللي في الدنيا عايزة تخرج من بقي مرة واحدة، لأني مينفعش أرد على الكلام ده بأي كلام منطقي أومؤدب .
هتصدقوا لو قلت لكم إني خايفة كمان أحسن أتصدم في الأستاذ عبد الرحيم علي ويطلع وراه أي شيء مشبوه ، أنا عندي استعداد أقبل إن اللي يكون وراك أي مؤسسة من مؤسسات الدولة الوطنية، لكن ماعنديش أي استعداد لأي حاجة خارجية، أرجوك يا أستاذ عبد الرحيم، إحنا عايزين اللي يرجع لنا الثقة تاني إن لسه في ناس شرفاء بيعملوا فقط لأجل البلد وليس لمصالح شخصية، وإلا هتكون صدمة كبيرة.
أنا عديت بمراحل كتير قوي من بعد ثورة 25 يناير أثرت في جدا منهم حادث ماسبيرو، أد إيه الحادث ده كان مهول بالنسبة لي بغض النظر عن اللي حصل والقتلي وبشاعة المنظر في كل شيء ، ده كله كوم واللي عمل كده كوم تاني خالص، اللي عمل كده كان جيش بلدي تصدقوا دي ؟؟؟ أنا قعدت أعيط 3 أيام متواصلة والله، عندي صدمة لا توصف لو وصفت لكم شكلي وقتها كان عامل إزاي كانت عيني مبرقة وعقلي مشلول ولا عندي استقبال لأي كلام ولا إرسال وصعبان على قوي قوي وحاسة بقلة الحيلة وحاسة إني اتعريت ومش لاقية حاجة تغطيني وحسيت إني عايزة أموت وأرتاح وبقيت أقول يابخت اللي ماتوا ارتاحوا وإحنا اللي بنتعذب، ده كان إحساسي وقتها.
وبعد ما الحقائق قعدت تنكشف قصادي ويطلع كل حاجة كانت مؤامرة ومخطط ليها سابقا، وبالمناسبة كان في ناس كتير من اللي كانوا بيطلقوا عليهم (النخبة) كانوا يقعدوا يقولوا إن احنا ضد موضوع المؤامرة والكلام الفارغ ده، ساعتها كنت دايما أسأل نفسي وأقول إن مفيش حاجة اسمها نفي قطعي 100% ولا ثبوت قطعي 100% وإن كل شيء وارد وأكون متضايقة جدا من أي حد يطلع علينا سواء كان مسؤولا في الحكومة أو غيره وينفي نفيا قطعيا لأي إهمال أو تعدي، لييييه النفي هو انت مش شغال تحت إيدك ناس كتير وممكن يحصل أي حاجة، ما بلاش تستعبطونا أكتر من كده خلاص مابقناش نصدق وخليكوا منطقيين وشفافين أحسن لكم .
المهم نرجع لموضوع الجيش وبعد اللي حصل في 30 يونيو ورجعنا نعيد الثقة فيهم من جديد ونصدق معني الشجاعة والبسالة والشرف والوطنية اللي المفروض يكونوا معجونين بيها، أيوه هو ده اللي كنت مؤمنة بيه طول عمري وإن اللي حصل قبل كده كان ليه حسابات تانية خالص وإن كان مضحوك علينا في كل حاجة.
أيوة أنا مع جيش بلدي قلبا وقالبا وبالأخص بعد ما حررنا من الجماعة الإرهابية اللي كانت بتحكمنا ومسحوا كل السيئات اللي في الذاكرة عنهم اللي هي كانت أساسا مزيفة، وأدين لهم بكل شيء جميل كان مسلوب مننا ورجع لنا تاني وضحوا بنفسهم ولسه بيضحوا علشانا وعشان الوطن .
بقي بعد ده كله أرجع وأقول حكم العسكر؟؟؟ حد يفهمني الموضوع ده ياجماعة؟ أنا مش فاهمة اللي بيتكلموا يالطريقة دي، هما عايزين إيه بالظبط ؟ وعايزين يوصلونا لإيه ؟ حد فاهم حاجة؟؟؟ الغريبة إنهم شخصيات مثقفة ومحترمة.
أستحلفكم بالله تردوا عليا هو أنا بس اللي حاسة بالتوهان ده؟ يمكن أنا اللي مش طبيعية ومش فاهمة حاجة ومضحوك على ذي ما بيقولوا ؟ طب في حد معايا واللي معايا دول أد إيه؟؟؟ هو أنا بهذي ولا ده من اللي اتعمل فينا ؟
والله أنا بحب بلدي قوي وعايزاها أحسن بلد في الدنيا.